Қай қоғамда да ұрпақ санасына білім нәрін құйып, халыққа бағыт көрсетуші бағдаршам саналатын – ұстаздар қауымы. Әйткенмен қоғамда сілкініс болып, еліміз тәуелсіздікке қол жеткізген тұста қоғамдағы қордаланған мәселелердің ықпалынан мұғалім мәртебесі аяғын сылтып басатын халге душар болды. Міне, осы қысылтаяң кезеңде Қызылорда облысында ұстаздардың беделін биіктетіп, абыройын асқақтату үшін жаңа бағытта республикалық қоғамдық-әлеуметтік, ғылыми-көпшілік «Ұстаз мәртебесі» газеті жарық көріп, барлық педагогтардың жанынан табылып, жөн сілтеушісіне айналды. Осылайша газет солғын тартқан саланың тамырына қан жүгірте бастады. Барлық мамандықтың өз ұстазы бар. «Ұстаз мәртебесі» газетінің ауқымы мен ұстанымы осынысымен кең. Тіпті педагогикалық, ағартушылық бағытымен бірге қоғамдық-әлеуметтік, құқық, кәсіпкерлік, денсаулық, спорт, медицина мәселелеріне де үн қатып, басылым нық қадам басып келеді.
Міне, араға 15 жыл салыпты. Осы уақыттың ішінде елімізде қаншама өзгерістер орын алды. Қай сала болсын, даму үстінде. Саланы кері тартатындар да жоқ емес. Уақытында баспасөз арқылы үн қатқан кей шенеуніктер қағынан жеріген құлан секілді баспасөзге жазылуға кері насихат жасағаннан кейін оларға сөз шығын. Баспасөзді тауарға теңеп, теріс ойлайтындар немен қоректеніп жүргені белгісіз. Баспасөз – журналистиканың атасы. Газет-журнал – идеологиялық құрал, мемлекеттің ақпараттық иммунитеті. Оған мемлекеттік деңгейде көзқарас керек. Оны жақында Президент айтып, дем берді:
«Газет-журналдар қайта өрлеу дәуірінің бастауында тұр. Себебі, әлеуметтік желі адамның ойлау қабілетіне зор зиян келтіріп жатыр. Жасы қырыққа жетсе де, білімі мен ой-өрісі он бес жастағы жасөспірімдер деңгейінде қалып қойған азаматтарды қазірдің өзінде кездестіруге болады.
Газет тілшілері жан-жақты шолулар мен терең сараптамалар жасауға баса мән береді, ағартушылықпен айналысады. Кәсіби әрі өз ісіне адал журналистер сапалы материалдар әзірлеп, дәстүрлі құндылықтарды сақтауға елеулі үлес қосып келеді. Мен сүйікті Отанымыздың игілігі үшін барлық салада табысты еңбек етіп жүрген мықты азаматтар туралы мәліметтерді көбінесе газеттерден аламын.
Қоғамымыз елең етерлік жаңалық оқып, бейнежазба көрумен шектелмей, мән-мағынасы терең ақпараттың да қадірін білгені дұрыс деп санаймын. Оқу мәдениеті жоғары елдер әрдайым жаһандық дамудың алғы шебінде бола беретіні сөзсіз. Бұған еш күмәнім жоқ».
Дегенмен Президент сөзін іліп әкетіп жатқан министрлер мен жергілікті жердегі әкімдерді байқамадық. Осы күнге дейін кітапханада өткен шараларға барған болмаса меншік иесіне қарамастан редакцияларға бас сұғып, журналистермен пікірлескен әкім-қараларды көрмеппіз. Мүмкін алдағы уақытта жоспар құрып, Президент сөзін жандандыратын болар. Күтейік.
Сонымен «Ұстаз мәртебесі» газетінің жарыққа шыққанына биыл 15 жыл, ойлы оқырман. Он бес жылдыққа орай байқау ұйымдастырып жатырмыз. Әр кезде өздеріңізбен байланыстамыз. Ой-пікірлеріңізді, ұсыныстарыңызды тыңдауға әзірміз.
Редакция алқасы