Бәсекеге қабілетті білім шаңырағы

Шиелі ауданындағы №50 Абай атындағы орта мектебі жоғары талаптарға жауап бере алатын, оқушыларды сапалы біліммен сусындатып келе жатқан білім шаңырағы. Мектеп жаңа модификацияланған кабинеттермен, атап айтатын болсақ, физика, химия, биология, роботтехника кабинеттерімен жабдықталған. 2022-2023 оқу жылында 867 оқушымен бастаған мектепте 137 мұғалім жұмыс жасайды. Оның 17-cі педагог-зерттеуші, 64-і педагог-сарапшы, 25 мұғалімі педагог-модератор. 2022-2023 оқу жылында мектепті 50 түлек бітіріп, 1 оқушы «Алтын белгі» иегері, 6 оқушы «Үздік аттестат» иегері, 9 сыныптар бойынша 4 оқушы «Үздік аттестат» иегері атанды.

Еліміздің білім беру саласында соңғы онжылдықта көптеген өзгерістер орын алуда. Осындай өзгерістерді Абай атындағы орта мектепке енгізу мақсатында «Мектепті дамыту жоспары» сауалнама қорытындысы негізінде алынған басымдықтарға сүйене отырып жасалынды. Анықталған басымдықтар: педагогтердің зерттеу дағдыларын дамыту, педагог қызметкерлердің кәсіби біліктілігін арттыру және кәсіби әлеуетін дамыту, халықаралық зерттеулерге қатысу, сандық білім беру ресурсын оқу-тәрбие үдерісіне пайдалану, ұлттық құндылықтар негізінде көпмәдениетті тұлға тәрбиелеу.

Мектепте оқу және тәрбие жұмыстарын жетілдірудің, мұғалімнің инновация­лық даярлығын қалыптастырудың тиімді формасы – мұғалімдердің шығармашылық тобы. Осыған орай, мұғалімнің жұмысында шығармашылық басым болу керек. Мектептегі «Зерде» шығармашылық тобының жұмыстары да оң нәтиже берген. Шығармашылық топ жетекшісі, мектеп тренері, педагог-зерттеуші Раиса Карибаева бастаған белсенділігі жоғары, шығармашыл ұстаздар өз тәжірибелерін жетілдіру үшін Lesson study-сабақты зерттеуді ұйымдастыру мен іске асыруды қолға ала отырып, сабақта зерттеу жұмыстарын жүргізген. Мұғалімдерге сабақтарды бірлесіп жоспарлауды, тиімді әдіс-тәсілдерлі қолдануды, сабақты бақылау мен рефлексиялық талқылауды үйретіп, оқытуды жақсарту, білім сапасын арттыру бағытында мектепті оқыту мәдение­тін қалыптастырды. Биылғы оқу жылында өз тәжірибелерін жетілдіруге ынталы ұстаздар өзара ынтамақтастықта топтар құрып, 5 сыныпты қамтыған іс әрекеттегі зерттеу сабақтарын жыл бойы жүргізіп, шығармашылықтағы кәсіби оқу ортасын құрып, зерттеу жұмыстырының қорытындысын жинақтады.

Екінші басымдық – құндылыққа бағдарланған білім беруді іске асыру. Қазақстан Рес­публикасында білім беруді және ғылымды дамытудың 2020-2025 жылдарға арналған мемлекеттік бағдарламасында білім беруді дамытудың маңызды міндеттерінің бірі – тұлғаны ұлттық және жалпыадамзаттық құндылықтар негізінде тәрбиелеу және оқыту. Осы бағдарламаның негізінде мектепте даму командасы құрылып, жұмыс жоспары жасалынды. Даму командасы мұғалімдерге оқыту семинарларын өткізді. Зерде даму командасы «Жаратылыстану-математикалық бағыттағы құндылыққа бағдарланған тәсіл» тақырыбында мектепішілік семинар ұйымдастырылды. Мақсаты – білім беру процесінде құндылықтарды қалыптастыру және дамыту, сабақта құндылықтары бағдарланған білімді іске асыру.

Мұғалімдер құндылыққа негізделген ашық сабақтар өткізіліп, 11 сыныптар арасында IQ-Дода интелектуальды ойыны ойнатылды. Құндылықтарды дарыту мақсатында сыныптарда «Оқуға құштар сынып» жобасы жолға қойылды. Жобаның аясында әр сыныпта «Оқуға құштар сынып» бұрыштары жасалынып, оқушылар үзіліс кезінде түрлі әдеби кітаптарды оқыды. Білім алушылар рухани құндылыққа негізделген іс-әрекеттерге қадам жасады. Сонымен қатар мектеп театры, мектеп парламенті де жұмыс жасады. Атап айтатын болсақ, қыркүйек айында «Шаңырақ» оқушылар қауымдастығымен «Мектеп театры» жобасы бойынша «Береке» шаңырақ қауымдастығы оқушылары «Менің сүйікті кейіпкерім» тақырыбында сахналық қойылым көрсетті.

Үшінші басымдық – халықаралық зерттеулерге қатысу. Мақсаты – білім алушылардың функционалдық сауаттылығын арттыру, алған білімдерін өз өмірлерінде қолдану. Оқушылардың білім жетістіктерін бағалау бойынша PISA халықаралық бағдарламасы оқушылардың оқу барысында алған білімдері мен дағдыларын өмірлік жағдайларда қолдана білу машықтарын, нақты бір оқу пәндерімен тікелей байланысты емес мәселелерді шеше білу құзыреттіліктерін бағалауға бағытталған. Мұғалімдер күнделікті сабақта халықаралық зерттеулердің тапсырмаларын қолдану арқылы оқушылардың жыл бойы функционалдық сауаттылықтарын арттырып келеді.

Төртінші басымдық – мұғалімдердің кәсіби әлеуетін арттыру, инновациялық идеяларды жүзеге асыру. Осы басымдықтар бойынша мұғалімдер арасында «Ой мен ойын» интелектуальды ойыны, шығармашылық құзыреттілігін дамыту мақсатында «Көңілді тапқырлар алаңы» ойыны, «Үздік сынып жетекші» мектепішілік байқауы, «Химия, биология сабақтарында заманауи білім беру технологияларын қолданудың тиімділігі» тақырыбында мектепішілік семинар, «Білім беру жүйесіндегі психологиялық қызмет аясында жүргізілетін тиімді жұмыстар» тақырыбында облыстық семинар тағы да басқа іс-шаралар жүргізілді. Мектепті басқарудың, білім мен тәрбие берудің барлық саласына енгізілген өзгерістер тиімді әсер етті.

Қазіргі таңда АКТ ресурстарын қолдану біліктілігін арттыру бойынша қашықтықтан және онлайн оқытуды ұйымдастыру, әлеуметтік желілерді, бұлтты сервистерді, түрлі платформалар, QR-кодтау технологиясы мен арнайы сервистерді интерактивті білім беру қосымшалары, ашық онлайн-оқыту, геймификация, «Төңкерілген сабақ» технологиялары т.б. күнделікті білім беру үдерісінде пайдаланатын педагогтер үлесі 78% құраған.

Заман талабына сай бәсекеге қабілетті, ұлттық құндылықтың туын биік ұстайтын жас ұрпақты тәрбиелеу – маңызды міндет. Демек, күн санап ақпарат кеңістігі өркендей түскен заманда жас ұрпаққа сапалы білім беру мұғалімнің, ұжымның бір жағадан бас, бір жеңнен қол шығарып жұмыс істеуін талап етеді. 2022-2023 оқу жылында №50 Абай атындағы орта мектебі оқушылары және ұстаздар ұжымы жоғары нәтижелерге қол жеткізді. Шәкірт жетістігі мұғалімінің жемісі екені айқын.

Мектепте оқушылар түрлі мектепшілік сайыстарға және пән олимпиадаларға, аудандық, облыстық, республикалық жарыстарға, олимпиадаларға қатысып, әр түрлі жетістіктерге жеткен. Мектептегі пән айлықтарының аясында дарынды балалардың қабілетін шыңдау, білімге деген қызығушылығын арттыру мақсатында зияткерлік жарыстар ұйымдастырылып, әр пән бірлестігінің айлық жоспарларына енгізіліп, іс-шаралар өткізілген.

Дарынды балаларды қолдау, білім олимпиадалары бойынша республикалық олимпиаданың аудандық кезеңіне қатыстырылып, нәтижесінде 14 оқушы жүлделі орындарға ие болса, 5-6 сынып оқушылары арасындағы республикалық олимпиаданың екінші аудандық кезеңінен 6 оқушы жүлдемен оралыпты. Дарынды және талантты оқушыларды дамытуда оқушылардың зияткерлік қырларын жетілдіру үшін олимпиадалар, конкурстар, ғылыми жобаларға тарту қолға алынған, соның нәтижесінде республикалық қашықтық пәндер олимпиадасында 22 оқушы жүлделі орындарға ие болған. Ермұхан Бекмұхамедов мұрасын насихаттау мақсатында Қазақстан тарихы пәнінен қашықтықтан олимпиадасына 3 оқушы, республикалық «Ақбота» олимпиадасында 61, Кенгуру ойындарына 30 оқушы жүлделі орындарды еншілеген.

Ғылыми жобалар бойынша жалпы білім беретін пәндер бойынша ғылыми жобалар байқауының аудандық кезеңінде «Менің өлкемнің визит карточкасы» жобасымен 9-сынып оқушысы Тұрар Арайлым (жетекшісі Алуа Аширбекова) ІІ орынды иемденсе, «Дарын» қосымша білім беру орталығының жоспарына сай өткізілген «Менің кіші Отанымның тарихы» жобасында 8-сынып оқушылары Күлтай Сағыныш пен Жанболат Жанель жүлделі ІІІ орынға қол жеткізген. Жетекшісі Гүлнар Алтайбаева.

Аудандық Оқушылар үйінің «Жасыл аула» жобасының жеңімпазы Аружан Мұхамедииярова өзінің экологиялық проблемаларды шешу жолын ұсыну жобасы арқылы көпшілік көңілінен шықты. Жетекшісі география пәнінің мұғалімі Мейрамкүл Амирбекова. «Тарихи шежірем. Менің тегімнің тарихы» 5-10 сыныптар арасындағы аудандық байқауда тарих пәнінің мұғалімі Зиякүл Рысбаеваның жетекшілігімен Қайнар Мұратбаев ІІІ орын иеленіп қайтты.

Білім мен спортты егіз ұғым деп қарас­тыруға болады. Мектеп оқушыларының жеткен жетістіктері жетерлік. Айтар болсақ, 1 таеквандодан республикалық, 4 облыстық турнир жеңімпаздары бар. Қазақ күресі мен дзюдодан да жеңімпаздар бар.

Өз еңбектерін заман талабына сай ғылыммен ұштастыра білетін, оқытудың, тәрбие берудің әдістемелерін жетілдіру, дамыту мақсатында жан-жақты ғылыми ізденісте жүрген ұлағатты ұстаздар мектеп мақтаныштары. Қорқыт ата университетінің кәсіби бағдар беру жұмысының марапаты мектеп директорының бейіндік ісі жөніндегі орынбасары Айна Абуоваға бұйырса, 2 мұғалім «Білім беру саласының құрметті педагогы» республикалық байқау жеңімпазы атанды. «Білім беру саласының үздік жас маманы» төсбелгісі 2 жас маманға, 6 ұстаз «Құрметті ұстаз» республикалық байқауының марапатына ие болған. Одан өзге «Көп тілді меңгерген мұғалім», «Үздік сынып жетекшісі», «Үздік бірлестік жетекшісі», «Шығармашыл ұстаз», «Үздік педагог», «Парасатты педагог», «Мәңгілік ел ұстаздары», т.б байқау жеңімпаздары мектепте қаншама!

Бір ғана қазақ тілі мен әдебиеті пәнінің мұғалімі Нүрила Молдабаева өзінің ізденімпаз ұстаз екендігін дәлелдейтін қоғамдық шараларда мектеп атына мақтаныш әкелуде. «Жырлайды ақындар» аудандық жыр мүшайрасы, «Ұлы дала ұлағаты» аудандық мұғалімдер арасында жазба жыр мүшайрасы, Ұлы Отан соғысының ардагері Сәрсенбек Байжанұлының 100 жылдығына орай жыр додаларындағы жүлделер – соның дәлелі.

М.Жұмабаев «Баланы мұғалімнің өзіндей қылып шығармай, келешек заманына лайықтап дайындау керек» деген екен. Отбасының да, мектептің де, қоғамның да мақсат- мүддесі біреу, ол – заман талабына сай ұрпақ тәрбиелеу. Болашақта бұдан да жоғары жетістіктерге қол жеткізіп, білімнің биік шыңдарын бағындыра беру – №50 Абай атындағы орта мектебінің басты мақсаты.

Қ.Әндешұлы,

Шиелі ауданы