Жастық шақ – адам өміріндегі арман мен мақсат айқындалып, білім мен қабілет шыңдалатын, болашаққа бастар бағыт қалыптасатын ең жауапты әрі маңызды мезет. Әсіресе, студенттік өмір – тек білім алып, мамандық меңгерумен шектелмейтін, тұлғалық қасиеттер қалыптасып, азаматтық ұстаным орнығатын, өмірлік құндылықтар сараланатын ерекше уақыт. Бұл кезеңде жас адамның бойындағы табиғи дарыны мен жеке қабілеті сапалы біліммен, саналы тәрбиемен ұштасып, табанды еңбек пен үздіксіз ізденіс арқылы кәсіби шеберлікке ұласады. Өйткені білікті маман болу – белгілі бір кәсіптің қыр-сырын меңгеру ғана емес, алған білімін өмірде қолдана білетін, жауапкершілігі жоғары, ізденімпаз әрі ел игілігіне қызмет етуге дайын азамат болып қалыптасу. Осы тұрғыдан алғанда, студенттік шақтың әр күні – болашаққа салынған инвестиция, әрбір ізденіс – жетістікке бастар баспалдақ. Білімге құштарлық, еңбекқорлық, табандылық пен тәрбиелілік қатар жүргенде ғана жас ұрпақтың бойындағы әлеует толық ашылып, кәсіби және тұлғалық дамудың берік негізі қаланады. Осы ұстанымды өмірлік бағытына айналдырып, білім мен біліктілікті, шығармашылық ізденіс пен қоғамдық белсенділікті қатар алып жүрген жастардың жетістігі – еліміздің білім беру жүйесіндегі маңызды көрсеткіштердің бірі. Елімізде 2020 жылдан бастап, жыл сайын дәстүрлі түрде дарынды өрендерді анықтап, олардың еңбегін бағалау мақсатында техникалық және кәсіптік білім беру ұйымдарының студенттері арасында «Қазақстан Республикасы колледждерінің ТОП-100 студенті» республикалық байқауы ұйымдастырылып келеді.
«Қазақстан Республикасы колледждерінің ТОП-100 студенті» жобасы – кәсіби білімі мен біліктілігін ұштастырған, көшбасшылық қабілетімен, шығармашылық ізденісімен, белсенді азаматтық ұстанымымен және қоғамдық өмірдегі нәтижелі қызметімен ерекшеленген дарынды жастарды қолдауға бағытталған беделді бастама. Жобаның негізгі мақсаты – білім алушылардың кәсіби және тұлғалық әлеуетін таныту, олардың жетістіктерін дәріптеу, бастамашылдығы мен жауапкершілігін ынталандыру, сондай-ақ еліміздің әлеуметтік-экономикалық дамуына үлес қосатын бәсекеге қабілетті мамандардың қалыптасуына жол ашу.
Атаулы байқаудың жеңімпаз жастарын марапаттау рәсімі бұл жылы 6 қарашада Астана қаласындағы «TANYM» көпфункционалды кешенінде өтті. Қазақстан Республикасының Оқу-ағарту министрі Жұлдыз Сүлейменова «Қазақстан Республикасы колледждерінің ТОП-100 студенті» республикалық байқауының жеңімпаздарын салтанатты түрде марапаттап, арнайы Диплом мен сертификат табыстады. Еліміздің түкпір-түкпірінен жиналған үздік студенттер бас қосқан айтулы жиын техникалық және кәсіптік білім беру саласындағы жас таланттардың жетістігін айқындап, олардың кәсіби әлеуеті мен азаматтық белсенділігін кеңінен танытқан маңызды оқиға болды. Байқау жеңімпаздары – өз мамандығын терең меңгеруге ұмтылған, білімін тәжірибемен ұштастыра білген, түрлі байқаулар мен жобаларда белсенділік танытып, оқу ордасының қоғамдық-мәдени өміріне де елеулі үлес қосқан жастар. Олардың әрбір жетістігінің артында қажырлы еңбек, мақсатқа деген адалдық, ұстаз тәлімі мен отбасылық тәрбиенің тоғысы жатыр.
Биылғы республикалық байқауда М.Мәметова атындағы Қызылорда педагогикалық жоғары колледжінің төрт студенті үздіктер қатарынан көрініп, оқу орнының абыройын асқақтатты. Бұл – колледж тарихындағы елеулі жетістіктердің бірі әрі білім ордасында білім мен тәрбие беру ісінің нәтижелі жолға қойылғанының айқын дәлелі. Атап айтқанда, республикалық деңгейде жоғары нәтиже көрсеткен жеңімпаздар қатарында «Филология» бөлімінің студенттері Еділбек Ақжүніс Бақытбекқызы және Өмірзақ Нұрару Тұрарбекқызы, «Шетел тілі» бөлімінен Сағынайқызы Ақбота және «Бастауыш білім беру» бөлімі бойынша Нақыпбек Нұргүл Нұрлыбекқызы үздік жүздіктің қатарына енді. Әрине, бұл марапат – бір сәттік жетістіктің нәтижесі емес. Оның негізінде жүйелі дайындық, үздіксіз ізденіс, кәсіби білімді тереңдетуге деген ынта, өз қабілетін дамыту жолындағы табандылық жатыр. Студенттердің осындай биік белестен көрінуі олардың жеке еңбегінің жемісі болумен қатар, ұстаздарының бағыт-бағдары мен тәлім-тәрбиесінің, колледж ұжымының жас ұрпаққа сапалы білім мен саналы тәрбие беру жолындағы ортақ еңбегінің нәтижесі. Сондықтан колледж қабырғасында қалыптасқан кәсіби дағдылармен қатар, адамгершілік қасиеттер, еңбек мәдениеті, ізденімпаздық, бастамашылдық пен отансүйгіштік ұстанымның да маңызы зор. Осы құндылықтарды бойына сіңірген жас маман қай салада еңбек етсе де, өз ісіне адалдық танытып, қоғамның дамуына өзіндік үлесін қоса алады.
М.Мәметова атындағы Қызылорда педагогикалық жоғары колледжінде білім алушылардың жан-жақты дамуына, кәсіби құзыреттілігін жетілдіруіне, шығармашылық және көшбасшылық қабілеттерін шыңдауына ерекше мән беріледі. Білім беру мен тәрбиені сабақтастықта жүзеге асыру, студенттердің қоғамдық бастамаларына қолдау көрсету, кәсіби байқаулар мен жобаларға қатысуына мүмкіндік жасау – оқу орнының негізгі бағыттарының бірі. Осындай жүйелі жұмыстардың нәтижесінде білім ордасының студенттері облыстық, республикалық деңгейдегі түрлі байқауларда жоғары нәтижелерге қол жеткізіп, колледж мерейін үстем етіп келеді. Төрт студенттің бір байқауда үздік жүздіктің қатарынан табылуы – осы еңбектің жарқын көрінісі. Бұл жетістік – студенттер үшін үлкен мәртебе ғана емес, сонымен қатар алдағы кәсіби жолында жаңа мақсаттар қоюға, тың бастамалар көтеруге және биік белестерді бағындыруға берілген зор мүмкіндік. Сондай-ақ олардың табысы өз қатарластарына үлгі болып, білімге ұмтылған әрбір жасқа еңбек пен табандылықтың ешқашан елеусіз қалмайтынын дәлелдейді.
Жастардың жетістігін бағалау – олардың болашағына сенім арту, еңбегін мойындау және жаңа мүмкіндіктерге жол ашу. Ал сол жастардың бойындағы қабілетті танып, дұрыс бағыт-бағдар беріп, кәсіби тұлға болып қалыптасуына ықпал ету – ұстаздар қауымының абыройлы міндеті. Осы ретте жеңімпаз студенттерді тәрбиелеп, білім нәрімен сусындатқан ұстаздардың еңбегі де ерекше құрметке лайық. Жеңімпаз студенттерімізді, олардың жетістігіне үлес қосқан ұстаздарын және ата-аналарын шын жүректен құттықтаймыз! Білім жолындағы ізденістеріңіз толассыз болып, кәсіби мақсаттарыңыз биік белестерге жетелесін!
Назерке БАЙДІЛДА
М.Мәметова атындағы Қызылорда педагогикалық жоғары колледжінің медиа менеджері
