Республикалық қоғамдық-әлеуметтік, ғылыми-көпшілік «Ұстаз мәртебесі» газеті 2011 жылдың 18 наурызынан бастап жарық көріп келеді. Газет ҚР Байланыс және ақпарат министрлігінің Ақпарат және мұрағат комитетінде тіркелген, 2011 жылы 16 ақпанда №11459-Г куәлігі берілген. Тақырып аясының кеңеюіне орай 2017 жылы 9 қаңтарда ҚР Ақпарат және коммуникациялар министрлігінің Байланыс, ақпараттандыру және БАҚ саласындағы мемлекеттік бақылау комитетінде қайта тіркеліп, №16279-Г куәлігін алды. Басылым 8 беттен тұрады, аптасына бір рет үш тілде жарық көреді. Газетке филология ғылымдарының кандидаты, Қазақстан Журналистер одағының мүшесі Нұрлан Көбегенұлы Нұрмаханов жетекшілік етеді. Н.Көбегенұлы жас шәкірттерді де тәрбиелейді. Қазірде ол «Болашақ» университетінің аға оқытушысы, «Сөз құны» журналистер клубының жетекшісі.
Газеттің бір ерекшелігі, әр бетте ұсынылған материалдардың мазмұнына орай оралымды ой, сөз тіркестері және нақыл және қанатты сөздер беріледі. Білім беру саласының, мектеп өмірінің жарқын жаңалықтарымен қоса өзекті мәселелерді ұдайы жариялау да басылымның бұлжымас қағидасы болып қалыптасқан.
Барлық мамандық атаулының өз ұстазы бар. Бұл – басылым ұстанымы. «Ұстаз мәртебесі» газетінің ауқымы мен ұстанымы осынысымен кең. Тіпті педагогикалық, ағартушылық бағытымен бірге қоғамдық-әлеуметтік, құқық, кәсіпкерлік, денсаулық, спорт, медицина мәселелеріне де үн қатып, басылым алшаңдап қадам басып келеді.
Оқырман қызығып, газетпен етене араласуы үшін «Ұстаз мәртебесі» – арнайы жобаларды қолға алған бірден бір басылым. «Аламан» спорт бәйгесі – газеттің алғашқы жобасы. Жас ұрпақты спортқа баулу, саламатты өмір салтын насихаттау басылым назарынан тыс қалған емес. Бұдан соң ғылыми бағытта «Үздік жас ғалым» байқауы ұйымдастырылды. «Руханиятты жаңғырту» қоғамдық қорымен бірлесе жасаған жоба жастарға үлкен жаңалық болды. «Зерек» интеллектуалды сайысы газеттің 5 жылдығына орай ұйымдастырылды. Сайыс облыс бойынша БАҚ арасында бірінші рет онлайн түрде өтуімен есте қалды.
2011 жылы «Ұстаз мәртебесі» газетінің шығармашылық ұжымы басылымның онжылдығы қарсаңында жарияланған байқау талаптарына сай үш номинация «Үздік ақпарат», «Үздік мақала», «Үздік сабақ» бағыттары бойынша үздік танылғандарды марапаттады.
Басылымның өзіне тән ерекшелігі – мұғалімдердің тәжірибе алмасатын алаңы. Өйткені мұнда мұғалімдердің шеберлік сабағы, білім процесіндегі жаңалықтар, әдістемелік жаңашылдықтар, оқушыны ынталандыруға ықпал ететін түрлі әдіс-тәсілдер және осыған орай мұғалімдердің өз пікірі үзбей жарияланып тұрады. Қазақ тілді мұғалімдермен қоса орыс тілі және ағылшын тілі пәнінің мұғалімдері де бұл алаңды еркін пайдалана алады. Бұл, әсіресе, жас мұғалімдер үшін өте пайдалы дүние.
Басылымның өткеніне көз жүгіртсек, редакциядан тәрбиеленіп шығып, биікке самғаған мақтаныштарымыз жетерлік. «Qazaqstan» ұлттық арнасының Қызылорда облысы бойынша меншікті тілшісі Әділбек Жақанов, «Qyzylorda» телеарнасының арнаулы тілшісі Асқар Тәжиев, «Сыр бойы» газетінің тілшісі Дәулет Қырдан, «Халық» газетінің тілшісі Әйгерім Нажмадин, Қызылорда облысы әкімі баспасөз қызметінің маманы әрі облыстық білім басқармасының баспасөз хатшысы Абай Тағыберген, «Mangystaumedia.kz» сайтының тілшісі Жұлдызай Қалиева, «Қазалы» газетінің тілшісі Абзал Жолтерек, облыстық жастар орталығының баспсөз хатшысы Айдос Мырзалы, М.Мәметова атындағы Қызылорда педагогикалық жоғары колледжінің жастар маманы Шернияз Жалғасбекұлы аталған басылымда жұмыс істеп, тәжірибе жинақтады.
Бүгінде басылымның жауапты хатшысы болып Айдар Сайлауов қызмет атқарса, тілшілер Елдос Асан, Замира Дастанқызы газет жұмысының алға басуына аянбай еңбек етіп келеді.