Балалар ескертпені елейтін емес

«Балалардың қауіпсіздігі әрқашан басты назарда және оқу жылының басталуымен оған ерекше назар аударылады. Қазіргі таңда жергілікті атқарушы органдармен бірлесіп балалардың қауіпсіздігі бағытында шаралар қабылдануда. Жаңа оқу жылының алғашқы күндерінен бастап күнделікті мектеп алдындағы жол өткелдерінде балалар травматизмінің алдын алу мақсатында таңертең, түскі және кешкі уақытта ювеналды және патрульдік полиция инспекторлары қызмет атқаратын болады»,- дейді Қызылорда облысы Полиция департаменті бастығының бірінші орынбасары, полиция полковнигі Шамшидин Амитов.

Ас ішерде қозғалатын әдетіміз бар емес пе? Республика көлемінде өткен «Назар аударыңыз балалар!» шарасы аясында облыстағы 295 мектептің аумағында жол қозғалысын реттеудің техникалық құралдарына, жол белгілері, жол үсті таңбаларына тексеру жүргізіліп, айтарлықтай кемшіліктер анықталған. Айтар болсақ, Полиция департаменті көліктің жылдамдығын мәжбүрлеп азайтуға арналған жасанды тегіс-еместіктің 31, жол белгілерінің 100 данасы қайта қалпына келтіріліп, жаңадан 75-і орнатылу үшін жергілікті атқарушы органдарға 258 нұсқама, 8 ұсыныс-хабарлама жолдапты. Ескертпенің себебінен мектеп алдындағы 91 жаяу жүргіншілер өткелінің таңбалары жаңартылған.

Жылда «Абайлаңыз, балалар!», «Абайлаңыз, жаяу жүргінші!», «Балалар, жолда абай болыңдар!», «Мектепке жол» атты кәмелетке толмағандардың қатысуымен жасалатын жол-көлік оқиғаларының алдын алу мақсатында тұрақты түрде профилактикалық шаралар болып жатады. Атқарылған профилактикалық жұмыстарға қарамастан, есепті мерзімде облыста кәмелетке толмағандардың қатысуымен орын алған жол көлік оқиғалар саны 34%-ға (55-тен 74-ке), жарақат алғандар 36%-ға (58-ден 79-ға) өсіп кетіпті.

Ендігі мәселе, ата-аналардың балаларының өміріне жауапсыздықпен қарауы. Басқару құқығы жоқ болса да көлік басқарған 82 жасөспірім анықталып, олардың ата-аналарына және көлік иесіне әкімшілік шара көрілген. Соның кесірінен көлік басқарған 7 жол көлік оқиғасы орын алып, 1 жасөспірім қайтыс болса, 8 адам жарақат алған.

– Тағы бір мәселе, балалар электросамокаттар мен гидроскутерлерге қызығып, пайдаланып келеді. Ал, электросамокаттар тротуарда 6 км. сағат жылдамдықпен қозғалады. Осыған орай олардың қауіпсіздігін қамтамасыз ету мақсатында Мемлекет басшысы жол жүрісі туралы заңнамаға өзгерістер енгізіп, күшіне енді. Қабылданған жаңа заңға сәйкес, электросамокаттар веложолдарда, жолдың жүріс бөлігінің оң жақ шетінде, оның ішінде маршруттық көліктерге арналған жолақтың бойымен бір қатарда 25 км. жылдамдықпен қозғала алады және жүргізушілері 18 жастан жоғары, кез келген санаттағы жүргізуші куәлігі бар, шлемде болуы қажет. Тәуліктің қараңғы уақытында электросамокат жүргізушілерінде жарық қайтарғыш элементі бар зат болуы қажет, яғни ол күртеше, қалпақ, жилет аяқ киім, рюкзак және арнайы жарық қайтарғыш лента секілді кез-келген киім болуы мүмкін. Электросамокатпен жолаушылар мен жүктерді тасымалдағаны үшін және жол жүрісіне қатысушыларға қойылатын өзге де талаптарды бұзғаны үшін ҚР Әкімшілік кодекстің 593 (шлемсіз басқару, жүк және жолаушы тасымалдау) және 620-бабымен (жүргізуші куәлігі жоқ) әкімшілік жауапкершілік қарастырылады. Тек жазалау шарасын қолданып, жол қауіпсіздігін қамтамасыз ету мүмкін емес. Біздің басты мақсатымыз адамның өмірі мен денсаулығын сақтап, қауіпсіздігін қамтамасыз ету,- дейді полиция полковнигі Шамшидин Егенбердіұлы.

Е.Ерболұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған