Елімізде 5 қыркүйек – қазақ тіл білімі мен әдебиеттану ғылымдарының негізін салушы, ағартушы Ахмет Байтұрсынұлының туған күні. Қазақстан халқы тілдерінің мерекесіне орай «Тіл мерейі, ел мерейі» атты Қызылорда қаласы бойынша білім бөлімінің ұйымдастыруымен оқушылар арасында мәнерлеп оқудан №198 орта мектепте байқау өтті.
5-7 сынып оқушылары арасында өткен байқауға көздерінде от ойнаған 50-ге жуық өрен қатысты. Олар тіл тақырыбындағы өлеңдерді мәнерлеп оқып, сынға түсті.
«Басқадан кем болмау үшін біз білімді, бай һәм күшті болуымыз керек. Білімді болу үшін оқу керек. Бай болуға кәсіп керек. Ал, күшті болуға бірлік керек»,- деп Ахмет Байтұрсынұлы айтқандай, бүгінде мектеп оқушылары түрлі сайыстарда бақ сынап, жүлделі орындармен марапатталып келеді.
Сайыс қорытындысымен 5-7 сынып оқушылары арасында үздік деп танылған №39 мектептің 5-сынып оқушысы Қасиет Қонысбай, Абай атындағы мектептің 6-сынып оқушысы Ерасыл Сабыралы, №145 мектептің 7-сынып оқушысы Айзере Жақсыбек облыстық кезеңге жолдама алды. Әр істе жаңашылдық таныту, оқушыларды оқыта отырып дамыту әр ұстаздың парызы екенін әр адам сезінді, түсінді, ой түйді. Осындай ауқымды, мазмұнды, мәнді, игілікті істер жалғаса бермек.
«Ұстаз-ақпарат»
