Батырлық пен ерлік символы: жеңіске жеткен қаһарман ерлердің ізбасарлары

Ұлы Отан соғысының аяқталып, халқымыздың бейбіт өмір сүріп жатқанына биыл 78 жыл. Ардагерлерімізге мемлекет тарапынан құрмет көрсетіліп, халқымыздың қатысуымен облысымыздың төңірегінде Жеңіс күні аталып өтті. Отан қорғаушылар күнімен, Жеңіс күнінің халқымыз үшін айтулы күндер екендігін Сыр тұрғындары көрсеткендей. Ел тыныштығын күзеткен отан қорғау­шыларымыздың жұмысы да, жауапкершілігі де ауыр. Ал, ардагерлеріміздің ерлігі Отан қорғаушыларымызға үлгі болып, рухтандыратыны сөзсіз.

Отан қорғаушылар күні

Халқымыздың тыныш ұйқысының себепкерлері, еліміздің тұтастығына кепілдік беріп, түн ұйқысын елдің тыныштығына арнаған адамдар отан қорғушылар. Қазақ мемлекетінің жер көлемі бойынша 9-орында тұрғандығы, халқының тату-тәтті өмір сүріп жатқандығы кімді болмасын қызықтырмай тұрмайды. Жеріміздің пайдалы қазбаға толы екендігі де белгілі, жау жағадан келсе қарсы тұратын да шекара қызметіндегі әскерлер. Мемлекет тарапынан Отан қорғаушыларға жыл сайын лайықты түрде көңіл бөлінуде. Әскер қатарына қосылғысы келетін жастар алдыңғы буын сарбаздардың ерлігіне қызыға қарап, бойындағы патриоттық рухты оята алады. Отан қорғау­шылардың күніне орай, Нартай Бекежанов атындағы қазақ академиялық музыкалық драма театрында салтанатты іс-шара болып өтті. Аймақ басшысы Нұрлыбек Нәлібаев іс-шараға қатысушы қонақтарды Отан қорғаушылар күнімен құттықтап, тілегін білдірді.

Қазақстан Республикасының Президенті – Жоғарғы Бас қолбасшы Қасым-Жомарт Кемелұлы Тоқаев марапаттау рәсімінде: «Қазақ – даңқты тарихын ат тұяғымен жазған халық. Біз – ұлан-ғайыр жерін жауға бастырмаған батыр елдің ұрпағымыз. Алапат соғыс­та жеңіске жеткен қаһарман ерлердің ізбасарымыз. Қазір еліміздің күштік құрылымдары Қазақстанның қауіпсіздігін қас қақпай күзетіп тұр. Отанымыздың іргесі берік болуын қамтамасыз ету – әр азаматтың перзенттік парызы. Өмір жолын әскери қызметке арнаған мамандардың кәсіби міндеті» – деген болатын.

Біз өңірге қатысты өнегелі істерді әрдайым үлгі етуге тиіспіз. Өткен жылы Қызылорда облысының полиция департаментінің басшысы генерал-майор шенін алған болатын. Бүгін Мемлекет басшысы Елорда төрінде Қазақстан Республикасы Ұлттық қауіпсіздік комитеті Қызылорда облысы және Байқоңыр қаласы бойынша департаментінің бастығы Болат Аюбайұлы Қалмырзаевқа генерал шенін табыстады. Бұл Президентіміздің облыс әкімдігі мен құқық қорғау органдарының бірлескен жұмыс нәтижесіне берген лайықты бағасы деп білеміз, – деді облыс әкімі.

Бірқатар әскери және құқық қорғау органдарының қызметкерлері салтанатты іс-шарада марапатталды. Жиын соңы концерттік бағдарламамен жалғасты, халықты отансүйгіштікке үндейтін патриоттық әндер шырқалып, көрермендер әсерлі кештің куәсі болды.

Жүз жасаған абыз ардагерлер

Халқымыздың ынтымақта болып, бірлігінен ажырамай жүруінде ақсақалдардың тигізер үлесі мол. «Көпті білгеннен емес, көпті көргеннен сұра» деп дана халқымыз айтқандай, ақылын айтар қарияларымыз барда халқымыз адаспайды. Кейінгі өскелең ұрпақ аңыз қылып айтатын, соғыстың қиындығын көріп, түрлі ауыртпалықты басынан кешкен соғыс ардагерлерінің соңғы куәгерлері біздерміз. Лайықты көмек көрсетіп, біздің болашағымыз үшін жанын пида еткен батырларымыз ешқашан ұмытылмайды. Облысымызда қалған санау­лы ардагерге қызмет қылу – біздің парызымыз.

Жеңіс жолында қатарластарымен кері шегінбей, жауға қарсы тұрған майдангерлердің көбісі арамызда жоқ. Жыл сайын облысымызда ардагерлерге алғыс айтып, мемлекет тарапынан көмек көрсетіледі. Облыс әкімі Нұрлыбек Нәлібаев Шиелі ауданында тұратын Ұлы Отан соғысының ардагері Сәрсенбек Байжановтың үйіне барды. Ғасыр жасаған абыз ақсақалды мерейтойымен құттықтап, Сыр халқының атынан автокөлік кілтін табыстады.

– Қазақта «қос тойың қабат болсын, екі дүниең абат болсын» дейді. Биыл сіздің 100 жасқа толуыңызбен қатар Ұлы Жеңістің 78 жылдығын да тойлаудамыз. 9 мамырды Ұлы Жеңіс мерекесі десек те, оған жететін жолдың қаншалықты ауыр болғанын бүгінгі ұрпақ ешқашан ұмытпайды. Туған елдің тәуелсіздігі мен бостандығы үшін жанын қиған боздақтарымыз­ды біз мәңгі есте сақтаймыз. Майдан даласында Отан үшін кеудені оққа тосқан ерліктеріңіз бен қайсарлықтарыңыз үшін бас иіп алғыс білдіреміз,- деді облыс әкімі.

Абыз ақсақал Сәрсенбек Байжанұлы қонақтарға ақ батасын беріп, береке-бірліктің халқымызға қажет екенін, бірлік бар жерде барлық істің оңтайлы шешілетінін айтты.

Сәрсенбек Байжанов 1923 жылы Шиелі ауданында дүниеге келген. Соғыс жылдары Сталинградтың Солтүстік батысындағы Магеллан қаласындағы шайқасқа қатысқан. Сол жолы көзінен, қолынан, аяғынан жарақат алып, бір жылдай госпитальда емделген. Екінші топтағы соғыс мүгедегі болып елге оралған ол «Қызыл жұлдыз», «Германияны жеңгені үшін» ордендерімен және Ұлы Отан соғысының 50, 60, 65, 70, 75 жылдық мерекелік медальдарымен марапатталған. Жұбайы Жәмила Сейітжанқызымен бірге 5 ұл, 6 қыз, 40 немере, 65 шөбере және 3 шөпшек тәрбиелеп өсірген.

Қызылорда облысы әкімі Нұрлыбек Нәлібаевтың құттықтауы мен арнайы сыйлығы Қазалы ауданындағы ғасыр жасаған майдангер Қабақ Смағұлқа да табысталды. Осы күні Қазалы ауданында екі соғыс ардагері бар болса, соның бірі – Қабақ Смағұл және Тілеуберген Тобабергенов.

Отан қорғаушылар күні және Ұлы Жеңістің 78 жылдығына орай Қазалы ауданы, Бекарыстан би ауылында Қабақ Смағұлдың жүз жасқа толған мерейтойына орай “Ғасыр жасаған майдангер” атты жиын өтті. Жиынды аудан әкімі Мұхтар Оразбаев ашып, көпшілікті қатар келген мерекемен және Ұлы Отан соғысының ардагерлерін құттықтады. Мұнан соң аудан әкімі Мұхтар Әуесұлы Қабақ Смағұлға “Қазалы ауданының құрметті азаматы” атағын табыстап, қазақы дәстүрге сай иығына шапан жапты.

Аудан әкімі осы күні Ұлы Отан соғысының ардагері Тілеуберген Тобабергеновке арнайы барып, Жеңіс күнімен және Ұлы Жеңістің 78 жылдығымен құттықтады. Мұхтар Әуесұлы майдангерге облыс әкімі Нұрлыбек Нәлібаев пен ҚР Қорғаныс министрі, генерал-полковник Руслан Жақсылықовтың құттықтауын жеткізіп, “Қазалы ауданының құрметті азаматы” атағын табыстады.

Ұлы Отан соғысы батырлары рухына тағзым етті

Соғыстың суық хабарын естімеген қазақ отбасылары жоқ. Қара қағазбен ақ жаулықты аналарымыз­дың көз жасын төккен де соғыс, некелі жарды жұбайынан, баланы әкесінен айырған да соғыс. Халқымыздың тыныштығын бұзған соғыс­та қазақ халқының көрсеткен ерлігі ұшан-теңіз. Жылдан-жылға елімізде соғыс ардагерлері азайып жатыр, халқымыз да, мемлекетеміз де ардагерлерге жылда көмектерін көрсетуде. Ерлікті ұмытуға болмайды, батырлықты тарих бетінен алып тастау мүмкін емес. Балақтан қан кешіп, өздерін құрбан еткен батырларымыздың ерлігі халқымыздың санасында жаңғырып тұр. Соғыстан аман оралған батырларымыз аз, бірі қолын, бірі аяғын соғыс алаңында қалдырған ардагерлеріміздің ерлігін айтып тауыса алмаймыз. Халқымыз ардагерлерімізге үлкен құрметпен қарайды. Сыр шаһарымыз да жыл сайын ерлікке тағзым етіп, Жеңіс күнін жоғары деңгейде атап өтеді.

Биыл Жеңіс күніне орай Тағзым алаңында өткен Ұлы Жеңіс күніне арналған салтанатты шараға облыс әкімі Нұрлыбек Нәлібаев қатысып, тұрғындарды құттықтап, жылы лебізін білдірді.

– Еліміздің Президенті Қасым- Жомарт Кемелұлы «9 мамыр­дың төл тарихымыздағы орны ерекше. Бұл – жанқиярлықпен ел қорғаған аталарымыз бен әкелеріміздің, әжелеріміз бен аналарымыздың рухына тағзым ететін күн. Біз ержүрек аға буынның алдында мәңгі қарыздармыз. Олардың қайсарлығы мен төзімділігінің, табандылығы мен патриоттығының арқасында бейбіт заманда өмір сүріп, жарқын болашағымызға жол аштық,- деген болатын.

Расында, 9 мамыр – қан майданда, тылда патриоттық парыздарына адал болған, кеудесін от пен оққа төсеп, ұрпақ болашағы жолында жанын аямаған, рухы асқақ, қайсар да батыл ағаларымыз бен апаларымыздың ерен ерлігіне бас иетін күн,- деді аймақ басшысы.

Соғыс жылдарында ерлік көрсетіп, жанын құрбан еткен қаһармандардың құрметіне 1 минут үнсіздік жарияланып, гүл шоқтарын қою рәсімі өтті. Соғыс уақытында Сыр елінің 21 азаматы ерлігі мен қаһармандығы үшін Кеңес Одағының батыры атанып, 20 мыңнан астам қызылордалық жауынгерлер орден-медальдармен наградталған.

Биылғы Жеңіс күні мерекесін облысымызда Ұлы Отан соғысының 6 ардагері мен 2408 тыл еңбеккерлері қарсы алуда.

Зұлмат соғысты көзімен көріп, жауға бетпе-бет қарсы тұрған батыр­лармыздың саны жыл сайын азаюда. Бар кезінде бағалап, құрмет көрсете білу – тәуелсіз өмірде туылып, соғыссыз тыныштықта өмір сүріп жатқан біздің міндетіміз.

Қазақбай

ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған