Жақында облысымызда волейболдан 5-6 сынып оқушылары арасында жас спортшылардың шеберлігі мен жігерін сынға салған тартысты дода болды. Ауданда өткен ұлттық мектепішілік лигада І орынды иеленген №20 З.Шүкіров атындағы Бөген орта мектебінің намысты өрендері бұл жолы да үлкен үмітпен жарыс алаңына аттанды. Жалағаш, Қармақшы Қызылорда командаларымен өткен кездесулерде олар ұйымшылдық пен табандылықтың үлгісін көрсетті. Әр ойын ерік-жігер мен қайсар мінездің айғағы болды. Команда жетекшісі С.Ұснадиновтың тиянақты дайындығы мен талапшылдығы шәкірттеріне сенім беріп, нәтижесінде жүлделі ІІІ орынға қол жеткізді. Ойынның шешуші сәтінде 6-сынып оқушысы Ердәулет Мұхамбетұлының асқан шеберлік танытып, маңызды ұпай алып беруі жанкүйерлерді ерекше толқытты. Оның батыл қадамы командаластарына жігер сыйлап, жеңіске деген құлшынысын арттыра түсті.
Облыстық сайысқа жол тартқан өрендерге мектеп түлектері Төлебаев Берік, Андызбаев Болат, Өтегенов Берік, Ұснадинов Берік, Нысаналиев Саматай, Мұратов Азамат, Жұбандықов Рақым, клуб қызметкерлері Абсахиев Бақытбек, Тайжанов Байғали, Берекетов Шәмші және мектеп қызметкерлері демеушілік жасап, өз қолдауларын білдірді. Туған мектебінің намысын қорғауға аттанған жас дарындарға қаржылай көмек көрсетіп қана қоймай, ақ тілектерін арнап, жігер берді. Бұл – ұрпақтар сабақтастығының, мектепке деген құрмет пен жанашырлықтың жарқын көрінісі. Түлектердің қолдауы оқушыларға үлкен сенім сыйлап, жауапкершілігін арттыра түсті.
Жеңісті сәттен кейін ауылға оралған жас спортшыларды ауыл кіреберісінде мектеп басшысы Марат Андызбаев пен бір топ қызметкерлер, ата-аналар салтанатты түрде күтіп алды. Ақжарма тілектер айтылып, олардан ризашылық пен мақтаныш сезімі анық байқалды. Ата-аналардың ақ пейілі ерекше әсер қалдырды: олар балаларына доп сыйлап, алдағы өмір жолына сәт сапар тілеп, ақ батасын берді. Бұл – тек спорттық жетістікке ғана емес, бала еңбегіне деген құрметтің, қолдаудың жарқын көрінісі еді.
Ел намысын, мектеп абыройын асқақтатамыз деген кішкентай жүректердің үлкен арманы осы күні айқын сезілді. Бұл жарыс олардың спорт жолындағы маңызды белес болып, жадында мәңгі сақталары сөзсіз. Жас спортшыларымызға алдағы уақытта да биік белестер мен жарқын жеңістер серік болсын!
Ш.Батаманова,
№20 З.Шүкіров атындағы орта мектебінің тәрбие ісі жөніндегі орынбасары.
Арал ауданы
