Үкімет ғимаратында Премьер-министрдің орынбасары — Ұлттық экономика министрі Серік Жұманғариннің төрағалығымен өткен жиында шілде айындағы инфляция және әлеуметтік маңызы бар азық-түлік өнімдерінің бағаларының динамикасы қаралды. Инфляциялық жағдай туралы Ұлттық экономика вице-министрі Азамат Әмрин баяндама жасады. Вице-министрдің мәліметінше, 2025 жылғы шілдеде Қазақстанда жылдық инфляция 11,8 пайыз деңгейінде сақталған. Жылдық азық-түлік инфляциясы 11,2 пайызды құраған. Тауарлар мен қызметтердің айлық бағасының өсу қарқыны 0,8 пайызға жетіп, маусым айымен салыстырғанда 0,1 пайыздық тармаққа төмендепті. Ақылы қызметтер сегментінде де бәсеңдеу байқалады екен: өсім 14,9 пайызды құрап, алдыңғы аймен салыстырғанда 1,2 пайыздық тармаққа төмендепті.
Ал, әлеуметтік маңызы бар азық-түлік өнімдері нарығындағы жағдай туралы баяндаған Сауда және интеграция бірінші вице-министрі Айжан Бижанованың дерегінше, шілде айында өнімдердің басым бөлігінің бағасы тұрақты болыпты. Тіпті, бір ай ішінде кейбір өнімдердің бағасы төмендеп кетіпті. Мысалы, сәбіз 9,1 пайызға, картоп 7,9 пайызға, пияз 1,8 пайызға, күріш 0,6 пайызға, жұмыртқа 0,1 пайызға арзандапты. Нан, макарон және сүт өнімдерінің бағасы тұрақты қалпын сақтаған.
Сонымен бірге, кейбір өнімдер бағасында өсім байқалған. Қырыққабат бір айда 12,3 пайызға, тауық еті 2,6 пайызға қымбаттаған. Сиыр етінің баға өсімі бәсеңдеп, 1,4 пайызды құрады деп отыр. Оған дәлел ретінде сиыр етінің бағасын ұзақ мерзімді тұрақтандыру мақсатында Ауыл шаруашылығы министрлігі кешенді шаралар қабылдағанын айтады. Ірі қара мал басы мен ұсақ малды кәсіби жемдеуге маманданған кәсіпорындарға айналым қаражатын толықтыру бағдарламасы іске қосылыпты. Асыл тұқымды аналық мал басын сатып алу үшін жылдық 5 пайыздық мөлшерлемеде жеңілдетілген несие механизмі әзірленген. Сонымен қатар, өңдеуші кәсіпорындарға сатылған әр килограмм сиыр еті үшін 175 теңге мөлшерінде субсидия беріледі екен. Бұдан бөлек, күріш пен қарақұмық бағаларын тұрақтандыру үшін «Продкорпорация» өндірушілер мен өңдеушілер арасында осы өнімдердің қорын қалыптастыру туралы үшжақты меморандумға қол қойған. Нәтижесін енді көретін боламыз, әйтпесе етке келгенде сену қиын, қазірде базар нарығы төрт түлік етінің бағасын өсіріп жіберді. Айтып ауыз жиғанша, Қазақстандағы ет бағасы бір айдың ішінде қымбаттағанын Сауда министрі жасырмай жайып салды. «Нарықтағы баға әлі де құбылады, оны ерте болжап біле алмаймыз, бірақ бағаны дәлізден асырмаймыз»,- дейді ол.
Күнбағыс майы нарығын реттеу мақсатында Майлы дақылдар өңдеушілерінің Ұлттық ассоциациясымен келісімге қол жеткізіліпті. Ауыл шаруашылығы министрлігі мен Сауда және интеграция министрлігінің қатысуымен өткен келіссөздер қорытындысында халыққа қолжетімді бағада өнімді сату жөніндегі үшжақты меморандумға қол қойылғанын жария етті. Және «Аралтұз» компаниясымен бірлесіп, өнім бағаларын кезең-кезеңмен төмендету туралы алдын ала келісімге қол жеткізілгенін, қажетті шаралардың биылдың соңына дейін жүзеге асырылатынын айтты.
Аймақтағы жағдайға тоқталған Айжан Бижанова Астана, Алматы, Түркістан және Алматы облыстарында бағаның өсу қарқынының бәсеңдегенін айтып отыр.
Жиынды қорытындылаған Серік Жұманғарин егін жинау маусымында көкөніс өнімдерінің бағасын тұрақтандыру мақсатында өңірлерде ауыл шаруашылық жәрмеңкелерін белсенді ұйымдастыруды тапсырды. Сонымен қатар, ішкі нарықтағы ұсынысты арттырып, бағаны төмендету үшін Қырғызстан, Өзбекстан және Түрікменстан шекараларында көкөніс-жеміс өнімдеріне арналған «жасыл дәліз» ұйымдастыруды тапсырды.
Қазір тамыз айы. Үкіметтің өнім бағасын тұрақтандыру саясаты бұл айда өз жемісін бере ала ма әлде базардағы саудагерлер тиындап, граммдап тұтынушы қалтасына қол сұға ма, көретін боламыз?
Р.Ғалин
