Биыл Қызылордадағы іргелі оқу орны «Болашақ» университетіне 30 жыл. Қаланың сол жағалауында мен мұндалап көрінетін алып ғимаратқа сүйсініп қарамайтын жан жоқ болар. Міне, сол 12 қабаттық әсем ғимаратта университетпен қатар екі колледж орналасқан.
Университет тарихына үңілсек, 1995 жылы Сыр өңірінде Мәскеу Халықаралық бизнес және ақпараттық технологиялар университеті филиалының ашылуынан басталады. Университет беделінің артуы білім алушылар санының ұлғайып, жаңа білім беру бағдарламалары ашылуына негіз болды. 1998-2001 жылдары университетте Л.Н.Гумилев атындағы Еуразия ұлттық университетінің филиалы жұмыс істеді. 1999 жылы Қазақстан Республикасының «Білім туралы» заңының қабылдануына байланысты оқу орны дербес «Қызылорда Экономика, статистика және информатика университеті» болып қайта құрылды. Ал, 2000 жылы университет жанынан колледж ашылды.
2001 жылдың 12 желтоқсанында ҚР Білім және ғылым министрлігінің лицензиясын алуына байланысты ҚЭСИ университеті «Болашақ» университеті болып қайта құрылды. 2013 жылы «Болашақ» медициналық колледжі ашылды.
Осы жылдар ішінде оқу орны талай белестерді бағындырды. 2005 жылы «Болашақ» университеті «Іскерлік тәжірибенің жоғарғы сапасы үшін» халықаралық қорының Алтын медалімен, 2006 жылы Қазақ-Швейцария Бизнес клубын дамытудағы «Мінсіз іскерлік беделі үшін» Алтын медалімен марапатталды. 2014 жылы университет институционалдық аккредитациядан, 2015 жылы мемлекеттік аттестациядан өтті. 2017, 2018 жылы 14 білім беру бағдарламасы бойынша мамандандырылған аккредитациядан өтіп, куәлік алды. 2019 жылғы қаржы-шаруашылық саралау нәтижесі бойынша Қазақстан Республикасының кәсіпорындары арасында «Сала көшбасшысы 2019» номинациясында Қазақстан Республикасының кәсіпорындары арасындағы рейтингі бойынша үздік ондыққа енді. 2020 жылы университет ғылыми және (немесе) ғылыми-техникалық қызмет субъектісі ретінде аккредитациядан сәтті өтсе, 2022-2023 оқу жылында 23 білім беру бағдарламасы бойынша мамандандырылған аккредитациядан өтіп, куәлік алды. Ал, 2024-2025 оқу жылында университет 10 бакалавриат, 4 магистратура білім беру бағдарламалары бойынша мамандандырылған аккредитациядан өтіп, куәлікке қол жеткізді.
Университет құрылымы 2 жоғары мектеп, 7 кафедрадан тұрады. «Болашақ» университетінің 7 кафедрасында бакалавриаттың 35 білім беру бағдарламасы және магистратураның 9 білім беру бағдарламасы бойынша мамандар даярланады.
Көпшілік біледі, 2017 жылдың наурыз айынан бастап Қызылорда қаласының сол жағалауынан «Болашақ» университетінің кампусының құрылысы басталып, 2019 жылы сәтті аяқталды. Университетке бас сұққан адам оқу орнының материалдық базасына қызыға қарайды. 372 және 444 орындық секциялық типтегі екі Студенттер үйі, жайлы спорт зал, тамағы дәмді 300 орындық асхана, заманауи баспахана, медициналық пункт, кітап қоры мол, 150 орындық кітапхана, ерекше форматтағы 500 орындық атриум зал, студенттерге арналған журналистика студиясы, 2 қысқы бақ, аумағы 1 гектарды құрайтын жылыжай орналасқан.
Сонымен бірге «Болашақ» ғылыми-зерттеу институты, Арал теңізінің экологиясы мен биоресурстары жағдайы ғылыми-зерттеу орталығы, «Астаукөл» оқу-далалық, сауықтыру орталығы және «Балжансай» агробиологиялық және ғылыми-тәжірибелік учаскесімен қамтылған. Енді отыз жылдыққа орай 1200 орындық BOLASHAQ HALL студенттер сарайын ашпақ. Болашақтың Студенттер сарайы Сыр өңіріндегі ерекше орын болмақ.
Білім беру бағдарламаларын іске асыру үшін университетте арнайы мақсаттағы оқу кабинеттері, компьютерлік сыныптар, лингафон кабинеттері жабдықталған. Мемлекеттік жалпыға міндетті білім беру стандартына сәйкес оқу процесін сапалы жүзеге асыруға мүмкіндік беретін заманауи оқу зертханалары бар.
Бір сөзбен айтқанда, Болашақ университетінің мақсаты: білім, ғылым, өндіріс интеграциясы қалыптасқан еліміздің әлеуметтік-экономикалық және интеллектуалды капиталын дамытуға қосатын бірыңғай университет болу; республика мен аймақтағы жоғары білікті мамандарға сұранысты қанағаттандыру; білім беруде жаңа ақпараттық технологияларды кең көлемде ендіру, мамандарды даярлау сапасын арттыру. Осы арқылы ғылым, білім және инновация интеграциясында жоғары білікті мамандар даярлауды қамтамасыз ететін заманауи ғылыми және білім беру ортасын қалыптастыру.
Бір айта кетерлігі, Болашақ университетінде журналистика мамандығы оқытылады. Мамандықтың ашылуы университет құрылтайшысы Бақберген Сәрсенұлы Досманбетовке тікелей байланысты. Негізі Б.Сәрсенұлының 1993 жылы Қорқыт ата атындағы Қызылорда университінде алғаш журналист мамандығын ашып, Сыр өңірі журналистикасын мамандармен толықтыруда үлесі зор. Енді Болашақ университеті он жылдан аса уақыттан бері журналист мамандығын оқытып келеді.
Оқу үдерісін сапалы ұйымдастыру үшін түрлі электрондық ресурс құралдары (білім, ғылым саласындағы нормативтік актілер талаптарына сәйкес) мен зертханалық кешендер жаңартылған. Соның бірі ретінде журналистика дәрісханасы, арнайы кабинет жасақталған. Жас мамандар үшін телестудия бар. Практика сабақтарында студенттер осы телестудия мүмкіндіктерін пайдаланады. Телестудия камера, мәтін теру, монтаж жасау компьютерлерімен қамтамасыз етілген. Сонымен бірге жас журналистердің пайдалануы үшін диктофон, фотоаппарат құрылғылары бар.
Сонымен бірге телестудия арқылы оқытушы-профессорлар онлайн жағдайда дәрістерін түсіріп, тікелей эфирлерде де сабақтарын жүргізіп отырады.
Жас ұрпақтың бойына ұлттық құндылықтарды сіңіріп, рухани болмысын қалыптастыру мақсатында университет мемлекет және қоғам қайраткерлері, көрнекті ғалымдар, өнер тарландары мен елге айрықша еңбегі сіңген мамандық иелерімен кездесу кештерін ұйымдастыруда «Мәртебелі мейман» жобасы дәстүрлі түрде жүзеге асырылуда. Жобаны Б.Сәрсенұлы өзі жүргізеді. Жобаның қонағы болып кезінде Бауыржан Омарұлы келіп, университеттің құрметті профессоры атағын алды.
Қазіргі таңда 1100 орындық «Болашақ» конгрессхол құрылысы, типтік ашық стадион құрылысы (инвестициялық құны – 62 млн.теңге) жүргізіліп жатыр. Ал, алдағы жылдарға оқытушы-профессорлар үйі, дендропарк, жағалаудағы ашық аспан астындағы атриум, кинотеатр, бизнес инкубаторды жүзеге асыруға және білім алушылардың ғылыми-зерттеу жүргізуге арналған технопарк, университет жанындағы зияткерлік мектеп, жастар кешенінің құрылысын салу жоспарланып отыр.
Университетке 2012 жылдан бастап журналистика мамандығына абитурент қабылдау басталды. Міне, содан бері екі жүздей түлек бітіріп шығып, қоғамда өз орындарын тапты. Айтар болсақ, Абай Тағыберген, Жұлдыз Прмағамбет, Майра Болатова, Жұлдызай Қалиева, Шапағат Сердәлі, Абзал Жолтерек, Аслан Нұразғали бар.
«Журналистика» білім беру бағдарламасы күндізгі оқу нысаны ретінде жүзеге асырылады. Оқыту қазақ тілінде жүргізіледі. «Журналистика» білім беру бағдарламасы бойынша бакалавр ақпараттық және шығармашылық, ақпараттық-аналитикалық, көркем-публицистикалық, ұйымдастырушылық және басқарушылық, консультациялық және сарапшылық және зерттеу секілді кәсіптік қызмет түрлерін орындай алады.
Оқу процесі жоғары материалдық-техникалық базамен қамтамасыз етілген. Білім беру бағдарламасында жоғары білікті оқытушылар, 2 ғылым кандидаты, 1 магистр, екі бірдей «ҚР Ақпарат саласының үздігі» қызмет етеді.
Жұмыс оқу жоспарына сәйкес оқу-таныстыру, өндірістік және диплом алды және практика базаларымен келісімдер мен меморандумдарға қол қойылған. Айтар болсақ, практиканың барлық түрлері бойынша кафедрада білім беру бағдарламасына сәйкес тағылымдамадан өту бағдарламалары бар. Тағылымдамадан өту үшін Қызылорда қаласындағы сегіз мекемемен келісім шарт жасалған. Солардың ішінде «Сыр медиа» ЖШС, «Ұстаз мәртебесі» газеті, «Қазақстан» РТРК АҚ Қызылорда филиалы (Qyzylorda телеарнасы), «Қоғамдық теледидар» ЖШС бар.
Университетте журналист мамандығын дайындаудың өзіндік ерекшеліктеріне тоқталар болсақ, бірінші дуальды оқыту Болашақтан басталған. Студенттер редакциялардан өтіп, теорияны практикамен ұштастырады. Кейіннен осы редакцияларда жұмыс істеуіне мүмкіндік туады. Бір жағынан, жұмыспен қамтылады.
Екінші, «Журналистің құқықтық негіздері» пәнін оқытуда практикалық сабақтары университеттің сот залында өтеді. Онда роль ойналады. Журналистің сот залында өз-өзін ұстау, сот алдында сөйлеу білу үйретіледі. Журналистің құқықтық білімінің артуына жағдай жасалған.
Үшінші, студенттермен бірге ғылыми мақалалар жазып, ізденіске баулу бір ізге қойылған. Ғылыми семинарларға қатысып, тәжірибе жинақтап, жұмыстары жоғары бағаланып жатады.
Төртінші, практикалық сабақтарда Алматы, Астанада өтіп жатқан вебинарларға қатысу мүмкіндіктеріне ие болады, яғни көп жоғары оқу орындарында бола бермейтін еркіндік бар. Мәселен, «Мінбер» журналистерді қолдау орталығының, «Әділ сөз» сөз бостандығын қорғау ұйымының ұйымдастыруымен өтетін вебинарларына қатысуға мүмкіндік алады. Университет оқытушысына жүктелер міндет те аз емес, кафедраның оқу-әдістемелік семинарының жоспарына сәйкес атқаратын жұмыстар, ғылыми-зерттеу жұмыстары, оқу үдерісінде ақпараттық-инновациялық технологияларды енгізуге байланысты жұмыстар, конференциялар мен семинарларға қатысу бәріне үлгіру қажет.
Биылғы атаулы жыл да басталып кетті. Университет құрылтайшысы, академик Бақберген Сәрсенұлы Досманбетовтің 80 жас мерейтойы мен «Болашақ» университетінің 30 жылдығына арналған шаралар легі дүйсенбіден бастау алды. Онкүндік дүйсенбде «Цифрлы болашаққа қадам: білім мен технологияның дамуы» тақырыбындағы халықаралық ғылыми-тәжірибелік конференция өтті. Конференцияда шетел және отандық ғалымдар ғылыми баяндама жасады.
«Bolashak – чемпиондар мекені» атты Қызылорда «Болашақ» университеті білім алушыларының арасындағы түрлі дәрежедегі чемпиондармен кездесу өтті. Жұмада түлектер форумы, сенбіде Қорқыт ата атындағы Қызылорда университетінде Б.Досманбетовтің80 жасқа толған мерейтойына арналған ғылыми кеңесінің салтанатты мәжілісін өткізді. Жексенбіде Болашақ университетінде де атаулы жылдарға арналған университеттің ғылыми кеңесінің салтанатты мәжілісі өтпек. Онкүндік Б.Досманбетовтің 2 томдық еңбектері жинағының тұсаукесер рәсімі және мәдени шарамен қорытындыланбақ.
Нұрлан Көбегенұлы
