Жаз мезгілі балалар үшін демалыс уақыты. Каникул кезінде бірі басқа қалаларға саяхаттап кетсе, бірі ауылдағы ағайынға қыдырып барады. Ал, қаладағы оқушылар үшін мәдениет мекемелері қарап қалған емес.
Тамыздың бірі күні кешкілік Қызылорда қалалық мәдениет және тілдерді дамыту бөлімінің қолдауымен, А.Тоқмағамбетов атындағы мәдениет үйі мен қалалық мәдени-демалыс паркінің ұйымдастыруымен балалардың жазғы демалысын тиімді өткізу мақсатында «Көңілді старт» атты эстафеталық ойындардан сайыс өткізді. Қалалық мәдени-демалыс паркінде өткен қызықты сайысқа 3 топ, 30-дан астам бала қатысып, ептілік пен тапқырлығын дәлелдеу жолында сынға түсті.
Сайысқа қала мектептерінің 5-6 сынып оқушылары қатысып, олар “Балдәурен”, “Сұңқар”, “Айбатыр” атты 3 командаға бөлініп, “Ұзындыққа секіру”, “Алтын қасық”, “Пингвин”, “Қаппен секіру” сайыстары бойынша бақ сынасты. Бір-бірінен озуға талпынып, ойынның қызығына кірген балалар балалық шақтың уайымсыз кезеңін бастан кешірді. Кешкі уақытты көңілді өткізген оқушылар ұйымдастырушыларға рақметін айтты.
Сайыс соңында белсенділік танытқан қатысушыларға алғыс хаттар мен естелік сыйлықтар берілсе, жеңімпаз командаларға арнайы диплом, бағалы сыйлықтар табыс етілді. Сайыс соңында барлық балаларға тегін балмұздақ таратылып, би кешіне ұласты.
Б.Бағдатұлы
