министрлік бұған не дейді?
Биыл талай көңілді күпті еткен ұлттық тестілеудің қорытындысы бойынша 137 түлектің гранты жарамсыз деп танылғаны хабарланды. Ал, бұған дейін, Ұлттық тестілеу орталығының мәліметіне сүйенсек, 327 түлек тестілеуге кіргізу кезінде тыйым салынған заттарды алып өту әрекеті салдарынан ҰБТ тапсыру мүмкіндігінен айырылыпты. Ал, ережелерді бұзғаны үшін тестілеу кезінде аудиториядан 322 адам шығарылған. Ол аз болғандай, бейнежазбаларды қарау нәтижесі бойынша 153 тест тапсырушының ҰБТ нәтижесі жойылған. Оның 137-сі білім грантының иегерлері екен.
«Біз қазірдің өзінде тиісті шаралар қабылдадық. Олардың грант сертификаттары жарамсыз деп танылды», — деп, әңгімені төтесінен айтқан Ұлттық тестілеу орталығының басшысы Руслан Емелбаев аталған заң бұзушылық фактілері бойынша Ұлттық тестілеу орталығының қызметкерлеріне қатысты қызметтік тексерулер жүргізіліп, тиісті мемлекеттік органдарға әрі қарай жұмыс істеу үшін хаттар жолданатынын да жасырмады. Сөйте келе келесі жылы оқу бітіретін түлектерге жылап қалған талапкердердің күйін құшпау үшін ескертуін де жолдап үлгірді.
«Құрметті 2023 жылғы талапкерлер! Жауапты шешім қабылдайтын кез келді, өйткені алдыңызда емтихан мен ҰБТ бар. Сіздер білімдеріңіз бен адалдықтарыңыздың арқасында ғана ҰБТ-да жоғары нәтижелерге қол жеткізесіздер және бұл қателіктерді қайталамайсыздар деп сенеміз»,- деді Руслан Емелбаев.
Оқудан қағылған талапкерлердің етектері жасқа толғанда, жоғары оқу орнына түсіп, арман жетегінде Алматыға барған студенттер көшеде қаңғып қалды. Жатақханаға орналаса алмаған жастар төрт күннен бері вокзалда, метрода түнеуге мәжбүр болғаны жайында желілерде ақпарат тарады. Расында, пәтер жалдағылары келсе, баға ұшып тұр. Бір бөлмелі пәтердің құны 150 мың теңгеден басталып, 200 мың теңгеге жетіп жығылатыны өтірік емес. Ал, оған студенттің қалтасы көтере ме? Жоғары оқу орындары болса, студенттерді жатақханамен неге толық қамтымай отыр? Бұл жөнінде ҚР Ғылым және жоғары білім министрлігі таралған мәліметті растамады. Тіпті, «қажет болған жағдайда орын жетпеген студенттер хостелдер мен қонақүйлерге орналастырылады» деді. Ол қалай жүзеге аспақ, оны уақыт көрсетеді. Қазірде қоғамдағы ақпарат ашық күйде, ешкімді алдай алмайсыз.
Н.Меңдібай
