Қыспаққа алған қысылтаяң кезеңде өз алдына дербес мемлекет болып қалыптасудың маңызы зор. Өйткені, айдағанмен жүріп, айтқанға көне салудың жалпақ жұртқа ауыр болғаны ақиқат. Зұлмат ғасырдың зобалаң жылдарында қазақтың басынан кешпегені һәм өткермегені жоқ. Мұның бәрін тасқа басылған тарихтың өзі таңбалап айтып береді. Иә, еліміз еркіндікке құлаш сермеп, егемендік алған сәттен елдігіміздің негізгі нышаны – Мемлекеттік рәміздер қабылданды. Одан бөлек, тұғырлы тәуелсіздігіміздің темірқазығы деп төл валютамызды айтуға болады. Тәуелсіздіктің төл перзенті саналатын теңгенің айналымға енуінің өзі оңайға соқпады. Қаржылық-экономикалық саясатты қалыптастырудың қиын да күрделі жұмысы дер кезінде шешім қабылдап, тәуекел етуге, дағдарыс кезеңінде дамудың даңғыл жолына түсуге түрткі болды. Алғашында теңгеде ұлт үшін қалтқысыз қызмет еткен ардақты азаматтардың, зиялылардың бейнеленуі дүние жүзіне қазақ деген ұлы халықтың барын, дербес ел болғанын дәріптегендей. Сайып келгенде, ұлттық болмыс пен нақыштың ізі нышанда сайрап жатты. Биыл ұлттық валютамызға – 29 жыл. 1993 жылы 15 қараша күні ұлттық валюта – теңге айналымға енгізілген болатын. Сондықтан атаулы күнге орай Өңірлік коммуникациялар қызметінің ақпарат алаңында қаржы саласына елеулі үлес қосқан сала ардагерлері төл теңгенің тарихына шолу жасады.
— 1993 жылдың қараша айында ұлттық теңгеміз қолданысқа енгізіліп, төл теңге ретінде айналымға қосылды. Мінекей, бүгінде ұлттық валютамызға – 29 жыл толып отыр. Тәуелсіздікке енді қолымыз жеткен уақытта қаржы саласында көптеген қиындықтар орын алды. Еліміздегі баға тұрақсыздығы, инфляция деңгейінің жоғарылауы ақша-несие саясатын жедел әзірлеуге ықпал етті. 1993 жылдың мамыр айында Англия елінің фабрикасында теңгеміз басып шығарылып, елімізге әкелінді. Соған сәйкес, 1993 жылы қарашада төл теңгеміздің тарихи сәтіне куә болған едік. Қазіргі таңда еліміздің экономикасы қарқынды дамуда,- деді қаржы саласының ардагері Ниязбек Мақанжанов.
— 1992 жылы ұлттық теңгеміздің толық кескіні бекітілген болатын. Сол кезден бүгінгі күнге дейін төл теңгеміз қаржы саласының ең маңызды бөлігі ретінде рөл атқаруда. Атап айтсақ, ел экономикасына шетелдік инвестициялар тартылып, өндіріс пен ауыл шаруашылығы нарықтық экономикаға сай қайта жаңғыра бастады. Бұл халықтың әлеуметтік жағдайын оңтайландыруға өз септігін тигізуде. Сол себепті бүгінгі атаулы мерекенің тарихта ойып тұрып орын алуы тегін емес,- деді қаржы және салық саласының ардагері Дайрабай Ысқақов.
— Бүгін Ұлттық валюта мен қаржы саласының кәсіби мерекесі. Осыған орай тарих беттерін парақтасақ, 1999 жылдан бастап мемлекетіміздің экономикасы тұрақтала бастады. Халқымыздың әлеуметтік жағдайы жақсарып, елімізде өндіріс саласы дами бастады. Алғаш валюта енгізілген күннен бастап теңгеміздің дизайны әртүрлі болып ерекшеленді. Осы себепті қаржы нарығында елеулі қызмет атқарған сала ардагерлерінің еңбегі өлшеусіз,- деді қаржы саласының ардагері Қалқазбек Әжібеков.
— Аймақтың қаржы қазандығы 1993 жылы бар болғаны 135 млн. теңге болса, білікті қаржыгерлердің жүргізген саясатының нәтижесінде бюджетіміз жыл өткен сайын еселеніп артты. Бүгінде облыстың барлық салалары жоғары көрсеткіштерге қол жеткізуде. Мәселен, республикада облысқа тартылған инвестиция көлемі бойынша бірінші орынға ие болдық. Бұл өңірдің әлеуметтік-экономикасына оң әсер ететіні сөзсіз,- деді облыстық экономика және қаржы басқармасының басшысы Нұрғали Қордабай.
Сонымен қатар, 15 қараша ҚР қаржы саласы қызметкерлерінің кәсіби мерекесі. Осы орайда, облысымызда аталмыш күнге арналған салтанатты іс-шара өткізілді. Облыс әкімінің орынбасары Нұрымбет Сақтағанов төрағалығымен өткен салтанатты жиында басқарманың бірқатар қызметкерлері ұлттық валюта – теңге күні мерекесіне орай Қазақстан Республикасы қаржы саласының дамуына қосқан үлесі үшін марапатталды. Атап айтқанда, Камила Алдажарова Қаржы министрлігінің алғыс хатымен, Ербол Шәмшиев және Айнұр Искакова Қызылорда облысы әкімінің алғыс хатымен марапатталды. Иә, қаржы саласы қажырлы еңбекті қажет ететін, адалдықты талап ететін, үлкен жауакершілік жүктейтін күрделі сала. Қомақты қаражатты игеру, құжаттарға ыждағаттылықпен қарау, тосыннан болатын өзгеріске тосырқамай, білімділігін көрсетуде тиянақтылық керек. Сондықтан әлемдегі экономикалық өзгерістерден хабардар болып, бойында кәсіби шеберліктің болғаны маңызды. Демек, мамандығына махаббатпен қарайтын мамандар қашан да құрмет пен марапатқа лайық.
Замира ДАСТАНҚЫЗЫ
