ЖОЛ САЛАСЫНДА БІЛІКТІ МАМАН ТАПШЫ

Соңғы кездері елімізде жол инфрақұрылымын дамытуға айрықша мән беріліп келеді. Мемлекет басшысы да 2025 жылға дейін елдегі жолдардың 95 пайызы жақсы жағдайға жетуі тиіс деген пәрмен берді. Жалпы жыл сайын республика аумағында шамамен 10 мың шақырым жергілікті жолдар жаңғыртудан өтеді. Бірақ, сол жұмыстар сапалы әрі уақытында аяқталып жатыр деп нақты айта алмаймыз. Өйткені, бүгінде елімізде жол құрылысында білікті кадрлар тапшы. Жолшы атанып, осы мамандықты жақсы игерген жас мамандар қазір алтынмен тең. Ал жұмыс ауқымы өте көп. Осы мәселені «Жол активтерінің ұлттық сапа орталығы» РМК-ның бас директоры Зәмір Сағынов 2019 жылдан бері көтеріп келеді. Және де жастарды жол саласында еңбек етуге шақыру мақсатында орталық тарапынан «2000 мектеп» жобасы қолға алынды. Содан бері, еліміздің әр өңіріндегі филиал мамандары білім ордаларында оқушылармен кездесіп, жол саласы бойынша кәсіби бағдар беріп келеді. Бұл бағытта, қызылордалық жолшылар да өте белсенді.

 Мәселен, жыл басынан бері мамандар 124 мектептің жоғары сынып білім алушыларымен кездесу өткізді. Және қаланың білім ошақтарында ғана емес Жаңақорған, Шиелі және Сырдария аудандарын да қамтып, жол мамандығын кеңінен насихаттады. Айта кетеу керек, орталықтың кәсіби бағдар беру бағытында үш жыл ішінде жүргізген үгіт-насихат жұмыстары оң нәтиже беруде. Статистикаға сүйенсек, соңғы жылдары жол мамандығын таңдаған түлектердің саны едәуір көбейген. Ең басты жетістік, ол қаладағы Исатай Әбдікәрімов атындағы Қызылорда аграрлық-техникалық колледжінде биыл алғаш рет «автомобиль жолдары мен аэродромдар құрылысы және пайдалану» мамандығы ашылып, бүгінде 25 жас білім алуда. Яғни, болашақ автожол мамандарын енді өзімізде даярлап, маман тапшылығы мәселесі шешілетін күн алыс емес.

Ержан УСМАНОВ

«ЖОЛ АКТИВТЕРІНІҢ ҰЛТТЫҚ САПА ОРТАЛЫҒЫ» ҚОФ

БӨЛІМ БАСШЫСЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған