Мектеп оқушыларына берілетін ыстық тамақ мәселесі күн тәртібінен түскен жоқ. Астың сапасы, көлемі өз алдына кей шеткі ауылдардағы асханасы жоқ мектептерге құрғақ түрінде баланың қолына ұстата салу кездесетіні жасырын емес. Жақында Қызылорда облысы әкімінің орынбасары Шахмардан Байманов мектептердегі ыстық тамақты ұйымдастыратын кәсіпкерлермен және мектеп басшыларымен арнайы мәжіліс өткізді.
Бұған дейін тамыз айында осы тақырыпта арнайы мәжіліс өткізіліп, жаңа оқу жылының басында мектептердегі тамақтанудың сапасына зерделеу жұмыстарын жүргізу тапсырылған болатын.
«Биыл бірінші жартыжылдықта 87331 бала, оның ішінде әлеуметтік осал топқа жататын 35067 бала, бастауыш сыныптардағы 52264 бала 100 пайыз тегін тамақпен қамтылған. Білім беру ұйымдарында ас мәзірінің нормалары ҚР Үкіметінің №320 қаулысының №15 қосымшасына сәйкес жас ерекшелігіне қарай ұйымдастырылып отыр. Бір реттік тамақтану құны орта есеппен 580 теңгені құрайды. Азық-түліктің нарықтық бағасының өсуіне орай тамақтануға бөлінетін қаржы жыл сайын 10-12% көтеріліп отыр», – деген болатын тамыз айының аяғында «Аманат» партиясы жанындағы Партиялық бақылау комитетінің отырысында облыс әкімінің орынбасары Шахмардан Байманов.
Дегенмен буфеттік құрған тамақ ұйымдастырылған жеті мектептің төртеуі Арал, үшеуі Шиелі ауданына тиесілі.
«Арал, Шиелі аудандары бойынша 7 мектеп ғимараты асхана ашуға талапқа сай келмеуіне байланысты бұл білім ордаларында тегін буфеттік тамақ ұйымдастырылған. Бұл мектептерде 289 бала білім алса, олардың 223-і тегін буфеттік тамақпен қамтылып отыр. Қазіргі таңда, Арал ауданындағы Ақшатау және Тоқабай елді мекендеріндегі мектептердің құрылысы демеушілермен жүргізіліп жатыр. Шиелі ауданы, Жансейіт елді мекеніндегі №133 негізгі мектептің жаңа ғимараты жақын күндері пайдалануға беріледі деп жоспарланып отыр. Жаңа мектепте 40 орындық асхана қарастырылған. Келесі жылдан бастап мұндағы 51 бала ыстық тамақпен қамтылады. 2021-2025 жылдар аралығында өңірде 236 мектептің асханасына жабдықтау жұмыстарын жүзеге асыру көзделсе, биыл 47 мектептің асханасы жабдықталды», – деп, облыс әкімінің орынбасары Шахмардан Баймановтың айтқанына да екі ай болды. Содан бері не өзгерді?
Қызылорда облысының білім басқармасының баспасөз қызметі таратқан ақпаратқа сүйенсек, қазіргі таңда аймақтағы 297 мектептің 290 мектебінде ыстық тамақ ұйымдастырылады екен. Бірақ сол 7 мектепте әлі буфеттік құрғақ тамақ беріліп келеді екен. Облыс бойынша 1-4 сынып оқушылары мен әлеуметтік осал отбасылардын шыққан барлығы 89572 бала тамақтандырумен қамтылған.
Биыл облыс әкімінің бастамасымен аймақтағы мектептерде ыстық тамақты ұйымдастыру бойынша конкурс облыстық мемлекеттік сатып алу басқармасымен өткізілген. Мұндағы мақсат – білім беру ұйымдарының басшысы мен кәсіпкерлер арасындағы сыбайлас жемқорлық тәуекелдерін жою.
Күн тәртібінде тамақтанудың сапасын бақылау жөніндегі ведомствоаралық сараптамалық тобымен жүргізілген зерделеу нәтижесін облыстық бала құқықтары жөніндегі уәкіл Жақсыгүл Тоғанова баяндаған. Қыркүйек-қазан айларында ведомствоаралық сараптамалық топ 284 мектепке зерделеу жүргізген. Облыстық сараптамалық топ 15 мектеп, қалалық, аудандық сараптамалық топ 269 білім беру ұйымдарын зерделеген. Нәтижесімен мектептердегі бракераждық комиссиялардың жұмысын күшейтуге ұсыныс беріліпті.
Келесі күн тәртібі бойынша облыстық санитариялық-эпидемиологиялық бақылау департаменті басшысының орынбасары Ерлан Ұзақбаев аймақ мектептерінде тамақтандыру қызметін көрсететін кәсіпкерлердің асханаларға рұқсат құжаттар алу барысы жағдайын айтып берген. Санитарлық-эпидемиологиялық қорытындыны мерзімінде алмаған өнім берушілерге қатаң ескертіліп, талапқа сәйкестендіру қажеттілігі айтылыпты.
Облыс әкімінің орынбасары мектеп асханаларында жүргізілген зерделеу жұмыстары барысында анықталған кемшіліктерге тоқталып, оқушыларды сапалы әрі құнарлы тамақтандырудың маңыздылығын, санитарлық талаптардың қатаң сақталуын ескерткен.
Мәжіліс соңында қызмет көрсетуші кәсіпкерлерге кемшіліктерді қысқа мерзімде жою тапсырылып, заңбұзушылықтар қайталанған жағдайда қызмет көрсету шарттары біржақты бұзылатындығы айтылған.
Қараша айында осы мәселе бойынша өтетін жиында ұсыныстардың орындалуы мен кемшіліктердің жойылуы талқыланатын болды.
Н.Естемес
