«Көптің көңілі енді орнына түсті ме» дегенде, карантиндік шаралар қайта басталуы мүмкін. Соңғы уақытта еркіндікті сезінгенімізбен, тәжді вирустың толық жойылмауы тынысты тарылтып жіберді. Маскалы режимнен мезі болса да, саулық үшін қолдан келгеннің бәрін жасайды жұрт. Себебі, тажал дерттен қаншама адам ажал құшты. Алматы қаласы «жасыл аймақтан» сырғып, «сары аймаққа» өтті. Елордадан да қауіп бар. Енді ең қауіпті саналатын «қызыл аймаққа» өтпеудің амал-әрекетін жасау қажет. Індет өршімесін, әйтпесе көптің көкейінен өшпеген күйбең кезең орын алып, мазамыз қашады. Жалпақ жұртпен жағаласқан дерттен көз жұмғандар көп болды. Тіпті, ауру жұқтырғандар санында шек болмаған соң ауруханадан орын да табылмай, дәлізде емделіп, басқаларына жөнелтілді емес пе? Дәріханада да дәрі таусылып, тапшылық сол кезеңге тап келді. Қысқасы, аталған дерт әбден әбігерге салып, біраз әуреледі.
Тәжді вирустан тыншып қалғанымызда езуіміз екі құлағымызға жетіп, мәз-мейрам боп едік. Той тойлап кеттік. Түнделетіп көше кездік. Қайткенде де, түрлі шектеулер жан-жақтан анталап, эпидахуалдың тұрақсыздығы байқалған соң жанның жай табуы қиын-ақ. Соңғы кездегі ақпарат көпті елеңдете бастады. Бүгінде вирус жұқтырғандар саны артуда.
— 2022 жылдан бері короновирус инфекциясымен Қызылорда облысында тіркелген науқастар саны 24179. Облыста ұжымдық иммунитетті қалыптастыру мақсатында екпе алуға қабілетті 452 мың тұрғынның І компонентпен 95%-ы, ІІ компонентімен 94,6%-ы вакцина алды. Пфайзер вакцинасымен бүгінге І компонентімен 85848, ал ІІ компонентімен 85621 адам вакциналанды,- деді облыстық денсаулық сақтау басқармасы басшысының орынбасары Жангелді Шайымбетов.
Өткен жылдың 22 қарашысынан бастап ревакцинациялау жұмысы басталғаны баршаға белгілі. Бүгінде 228265 тұрғын қайта екпе алған. Облысымыз жыл басынан бері «жасыл аймақта» тұр. Бір жағынан тұрақтылық тұрақтағаннан кейін халықтың екпе алу белсенділігі төмендеп, ауруды жұқтыру қаупі арта түскен.
— Қазақстандағы ахуал қайта күрделене бастады. Пандемия басталғаннан бері короновирус инфекциясын жұқтырғандар саны 1 миллион 310 мың 370-ке артты. Эпидемиологиялық ахуалды бағалау матрицасына сәйкес «сары аймаққа» Алматы қаласы енді. Инфекция жұқтыру көрсеткіштерінің өсуіне байланысты елдегі ахуалды негізге ала отырып, коронавирус инфекциясына жол бермеу жөніндегі ведомствоаралық комиссиямен қауіп аймақтарына байланысты шектеу шараларын қарастыру бойынша шешімдер қабылданды. Соның ішінде Қызылорда облысында шілде айының 11 күнінде барлығы 40 жағдай анықталды, 44 ауру ошағы бар,- деді облыстық санитарлық-эпидемиологиялық бақылау департаменті басшысының орынбасары Әлия Әбдіқайымова. Дүние жүзін дүрліктірген дерттің өршуі әлем елдерінде де байқалуда. Көз жұму көрсеткіші көбейіп, күніне көптеген тұрғыннан ауру анықталып жатыр.
ҚР Бас мемлекеттік санитариялық дәрігерінің мәліметінше, жүргізілген эпидемиологиялық зерттеулер соңғы уақытта вирус жұқтырғандардың 80%-ке жуығы індетке қарсы вакцина алмаған немесе соңғы вакцинадан кейін 6 ай өтіп кеткен адамдардың үлесінде. Сондықтан амандықты тілесек аурудың асқынуына жол бермегеніміз жөн. Тағы да сақтық шараларын сақтау мен екпе алуды ескерткенге мән берген дұрыс. Бүгінгі күні Қызылордада вакцинациялау мен ревакцинациялау отандық QazVac, VeroCell, Pfizer препараттарымен жүргізілуде. Не де болса, жұрт екпені еріккеннен алмайды. Бәрі деннің сау, ауру-сырқаудан аман болудың тиісті шарты. Сәйкесінше, «жасыл аймақ» деп жағаны жайлауға жіберіп, босансымау қажет екендігі баса айтылуда. Сонымен қатар, бұрынғыдай карантиндік талап күшеймегенімен арақашықтықты сақтап, қажетті шараларға қарайлау керектігі айтылды. Ертеңнің не боларын ешкім білмейді. Бүгін тұрақтылықты тіреу етіп қуанғанымызбен, әп-сәтте жағдай өзгере салуы мүмкін. Қысқасы, әр адам өз денсаулығына көңіл бөлу арқылы бүтін бір қоғамның жағдайына ықпал етеді.
Замира ҚОНЫСЖАН
