Хакім Абай туындылары бүгінде халқымыз үшін, ұлттық тәлім-тәрбиенің негізгі, жастарымыздың адаспай, білімді һәм білікті, тәрбиелі де тәлімді тұлға болып қалыптасуының алтын темірқазығы рөлін атқаруда десек артық айтқанымыз емес. Осы сөзіміздің айқын дәлелі Мемлекет басшысы Қасым-Жомарт Тоқаев «Абай және ХХІ ғасырдағы Қазақстан» атты мақаласында «Абай арманы – халық арманы. Халық арманы мен аманатын орындау жолында аянбағанымыз абзал. Абайдың өсиет-өнегесі ХХІ ғасырдағы жаңа Қазақстанды осындай биіктерге жетелейді» — деп ерекше атап өткен болатын. Абай атамыздың әдеби мұрасы өзінің көркемдік құндылығы мен заманауи ұлттық өнердің қайнар бұлағына айналып, ел тарихында өшпес із қалдырды. Ұлы ағартушының асыл туындылары қанша уақыт өтсе де, өз маңызы мен құндылығын жойған емес. Керісінше, Абай мұрасы – күннен-күнге нәр алып, өз ұрпағының рухани қазынасына айналып отыр. Абай шығармаларында ұлы далада өмір сүрген қазақ халқының бар болмыс-тіршілігі, ұлтымыздың салт-дәстүрлері мен жан-дүниесі суреттелген. Абайдың туындыларына зер салсақ, елдің алға жылжуына, өсіп-өркендеуіне шын ниетімен тілеулес болғанын, осы идеяны барынша дәріптегенін байқаймыз. Ал, ілгерілеудің негізі — білім мен ғылымда жатыр.
Кемеңгер Абай қазақтың дамылсыз оқып-үйренгенін бар жан-тәнімен қалады. Ақын «Ғылым таппай мақтанба» деп, білімді игермейінше, биіктердің бағына қоймайтынын баса айтты. Ағартушы ақынның сол замандағы тұжырымдары қазір де аса өзекті. Себебі, ХХІ ғасырдағы ғылымның мақсаты — биікке ұмтылу, алысқа құлаш сермеу екенін көріп отырмыз. Ал, біздің міндетіміз – осы ілгері көштен қалмай, алдыңғы қатардан орын алу. Кемеңгер Абай білімі терең болғандықтан, оның шығармаларында дүние, өмір, тіршіліктің мағынасы, қоғам мен заман, болашақ туралы толғаған ойлары да терең мағыналы. Ендеше осы тереңдікті жастарымызға ұғындыру біздерден талай дүниені талап етеді.
Өткен бейсенбіде Академик С.А.Жиенқұлов атындағы Байқоңыр жоғары колледжінде «Абайтану- рухани құндылықтар орталығының» ашылу салтанаты болып өтті. Орталықтың ашылуының басты мақсаты: екі мемлекет жұмыс жасап жатқан жер кіндігі – Байқоңыр қаласындағы өскелең ұрпаққа хакім Абайдың қазақтың даналығын бойына сіңіре отырып жазған шығармашылығын, жас ұрпақ тәрбиесіне жүйелі енгізу, барынша қазақиландыру әрі ақын мұрасын оқырман көпшілікке насихаттау.
Ашылу салтанатының шымылдығы Байқоңыр қаласындағы Ресей Федерациясына қарасты №1 музыка мектебінің «Назқоңыр» ансамблінің орындауындағы Абай әндерімен түрілді. Ашылу салтанатында орталықтың лента қию рәсімі Қазақстан Республикасы Президентінің «Байқоңыр» кешеніндегі арнаулы өкілі, облыс әкімінің орынбасары Қайрат Нұртай, Қызылорда облысы білім басқармасының орынбасары Әзизбек Ізімбетов және Ақай ауылдық округінің ардагерлер кеңесінің төрағасы Жақсылық Қыпшақбайұлына берілді. Сонымен қатар «Абай және халық қасіреті» атты көрініс қойылып, Абай шығармаларын студенттер екі тілде оқыса, өз кезегінде колледж оқытушысы Гүлжазира Бәйтерекова «Абайтану-рухани құндылықтар орталығымен» таныстырып өтті.
Салтанатты шара екі кезеңнен тұрды. Бірінші кезеңге «Асыл сөзді іздесең, Абайды оқы, ерінбе!» атты дөңгелек үстелге Қайрат Ырзақұлұлы, Әзизбек Жәнібекұлы, Байқоңыр, Төретам, Ақай елді мекендерінің ардагерлер кеңесінің төрағалары, аудандық мәслихат депутаттары, колледж басшылары және жергілікті мектеп директорлары қатысты.
Дөңгелек үстелде сөз бастаған «Академик С.А.Жиенқұлов атындағы Байқоңыр жоғары колледжінің директоры Ануар Дауленбаев: «Байқоңыр қаласындағы Ресей мектептері мен кәсіптік білім беретін оқу орындарында оқитын жастарымыздың осы орталыққа келіп, ғұлама ақынның шығармаларымен танысуға мүмкіндіктері бар. Абай атамыз айтқандай, жастарымыздың «жүрегі жылы, қайраты ыстық, ақылы нұрлы» азамат болып өсуіне сеніміміз мол» — деді.
Содан соң Қайрат Ырзақұлұлы, Әзизбек Жәнібекұлы, Жанқожа батыр атындағы №269 орта мектебінің директоры Фарида Аманова Абай әлемі туралы әдемі ой-толғаныстарын жария етсе, жиынға қатысушылар арасынан өз пікірін білдіргендер де болды.
Екінші кезеңде «Абайтану-рухани құндылықтар орталығының» ашылуына орай Қызылорда облысындағы техникалық және кәсіптік оқу орындарының білімгерлері арасында Абай Құнанбаев шығармашылығына арналған «Асыл сөзді іздесең, Абайды оқы, ерінбе!…» тақырыбында ғылыми-тәжірибелік конференция болып өтті. Мақсаты Абай мұрасын кеңінен насихаттау, дарынды жас ғалымдарды анықтау. Абайды заман талабына сай жаңа қырынан танытуға, ақын шығармашылығының ғылыми тұрғыдан тың байламдар жасалуына ықпал ету, жастардың әдебиетке деген қызығушылығын арттыру. Жастардың Абай Құнанбаев шығармашылығын тереңінен танып зерттеуіне, ғылыми-әдістемелік қызығушылықтарының артуына ықпал ету, Жастардың сөз өнерін зерделеу, ғылыми талдау құзыреттіліктерін қалыптастыру.
Ғылыми-тәжірибелік конференцияның қорытындысы бойынша 1-орынды Академик С.А.Жиенқұлов атындағы Байқоңыр жоғары колледжінен Ақнұр Бектурарова, ІІ орынды Қазалы көлік-техникалық жоғары колледжінен Темірхан Ринат, ІІI-орынды Қармақшы аграрлы-техникалық колледжінен Индира Жанықұлова иеленді. Өзге қатысушыларға сертификат табысталды.
Шара қорытындысында колледждің бірқатар оқытушылары ҚР Президентінің Байқоңыр кешеніндегі арнаулы өкілі, облыс әкімінің орынбасары Қайрат Нұртайдың алғыс хатымен марапатталды.
Ұлы Абайдай ақынның өмiрi, артында қалған мұрасы – ақындықтың, ойшылдықтың, данышпандықтың мектебi ғана емес, ұлтын сүюдiң, халқына жанашыр болудың өмiрлiк өнегесі болып қала бермек.
Жанат ЖАНҰЗАҚОВА,
Академик С.А.Жиенқұлов атындағы Байқоңыр жоғары колледжінің оқытушысы
