Біліммен қаруланған жастың болашағы бұлыңғыр, келешегі көмескі болмайтыны хақ. Себебі, инемен құдық қазғандай алапат еңбекпен ізденіп жүріп, оқу біліктіліктің биік шыңына жеткізеріне дау жоқ. Оның үстіне, оқудан опық жейтін жан болмайды. Керісінше, «білсем, көрсем» деп талпынып, талаптың тұлпарын мінсе, жетістікке жетіп, жеңімпаз атанары айдан анық. Әрбір жас білімін жетілдіріп, жан-жақты дамудың даңғыл жолын қалыптастыра алса, өресі биіктей түсетіні тағы бар. «Ақыл жастан» демекші, бүгінде жастар білімділігін байқатып, креативті ойымен ерекшеленіп жүр. Сондықтан жасөспірімдерге демеу беріп, әрбір ісіне қолдау жасауымыз қажет.
Иә, білім ордаларында білімдар оқушылар жетерлік. Ғылымның соңында жүріп, жанына жақын мамандыққа бейімделіп, жаңалық ашуда жаңылыс басуға жол бермеуге тырысады. Талпынудың жолында тауы шағылса да беріспей, қайта бекінуі тура жолдарынан таймайтындығын білдірмей ме? Ертеректе Шығыс ойшылы Әбу Насыр Әл-Фарабидің өзі талай ғылымды меңгерген ғалым болған. Артында құнды еңбек қалдырып, әлемнің екінші ұстазына айналды. Осы орайда, өскелең ұрпақ та ақылға ақыл қосудың артықтық етпейтінін жақсы біледі. Сондықтан олар алған білімін тәжірибеде қолданып, нәтижесін бағамдап, өздерін сынап көруден жасқанған емес. Міне, осындай талабына нұр жауған оқушылар өңіріміздегі Тәкей Есетов атындағы №264 мектеп-лицейінде топтасқан. Білім ордасы шәкірттерге сапалы білім беруде қалыс қалған емес. Ал, оқуда үздік оқушылар мектеп мәртебесін көтеруде жемісті жетістікке жетуде.
Жақында үздік білім беру ұйымы атанған №264 мектеп-лицейде жаңа обсерваториялық орталық пен балалар киностудиясы ашылды. Жаратылыстануға жаны жақын білім ошағының балалары астрономия әлеміне еніп, мектеп студиясы арқылы журналистикаға бет бұра алады. Балалардың игілігіне бағытталған заманауи кабинеттердің ашылуына облыс әкімі Гүлшара Әбдіқалықова қатысып, дарынды және өнертапқыш балалармен кездесіп, пікірлесті. Осы тұста, мектеп оқушылары мұндай мүмкіндікті қалт жібермей, жаңа жобалармен қуантатынын жеткізді. Сонымен бірге бұл жаңалыққа облыстық білім басқармасының басшысы Ақзира Қасымова да келіп, тілектестігін білдірді. Шынында-ақ, бұл шеберлікті шыңдаудағы үлкен шығармашылық алаң іспетті. Мәселен, обсерваторияда балалар телескоп, прцессор, спектроскоп, арнайы призма мен Vive pro 2 шлемі секілді құрал-жабдықтармен жұмыс істей алады. Ал, киностудия арқылы сапалы бейнеконтент түсіруге жағдай жасалған. Сонымен қатар, «Bio Master» кабинеті негізінде оқушылар қолдан макет жасап, ілімін тереңдете түспек. Мектеп басшылығы ерекше қолдауды қажет ететін балаларға да ерекше көңіл бөлген. Яғни, жаңадан ашылған инклюзивті кабинетте аталған санаттағы оқушылар ребилитациядан өтеді. Мұнда сенсорлық кабинет пен емдік дене шынықтыру бөлмелері қарастырылған.
Білімге зор ынта қоятын, оқушылардың оқуда құштарлығын оята білетін мектеп ұжымы алыстан қатынайтын балаларға мүмкіндік қарастырған. Мәселен, бұл оқу орны жапон елшілігінің арнайы бағдарламасы аясында белгілі мөлшерде қаржы грантын иеленіп, алыстан қатынап оқитын оқушыларды тасымалдау үшін автобус сатып алған. Алдағы уақытта да жүйелі жоспарлары бар көрінеді.
Замира ҚОНЫСЖАН
