Тәжді вирус толық тұрақталып болған жоқ

Халықтың тәжді вируспен тартысып келгеніне 2 жылдан аса уақыт болыпты. 2019 жылы наурыз айының бел ортасында тажал дерттің елге енгені белгілі болып, сақтық шараларын сақтау талап етілді. Қоғамдық көліктер қатынасы белгілі уақытқа дейін жүріп, маскалы режим орнап, жұртшылықтың жиі жиылып, бір ортада шоғырлануына тыйым салынды. Аурудан азат болу үшін екпеге егілу көп айтылып, сырттан вакцина сатып алу қарқыны үдей түсті. Ойда-жоқта ойсыратып, табан астынан тұрақтылықты бұзған тәжді вирустың есеңгіретіп жібергені рас. Той-томалақты қалт жібермейтін, арқа-жарқа әңгіме айтып бас қосатын бауырмал халық карантин қамағында қалды. Қысқасы, екі жыл уақытта ақпарат айдынында тәжді вирус туралы жаңалықтар легі толастаған жоқ.

Көгілдір экранға көз салса да, телефонға телмірсе де, халықтың алдымен ашып қарайтыны статистика мен елдегі жағдай жайлы жаңалықтар болды. Себебі, бәрінің аңсағаны – қалыпты өмірге қайта оралу мен вирустың толықтай жойылуы еді. «Басқа түссе баспақшыл» демекші, халық сын сағатта сынып кетпей, езілген еңсені қайта тіктеп, бұл сынақты да еңсеруге дайын болды. Бетпердені үнемі тағып, «ашық жүйесіне» де үйреністі. Сондай-ақ, сырқаттан сау болу үшін сақтық шараларын сақтады. «Аурудың алдын алады» деп танылған вакциналарды алып, иммундық жүйені қалыптастыру үшін реті келгенде ревакцинациядан да өтті. Әйтеуір, тәжді вирустың таптауынан шығу жолында қолдан келгенше тырысып бақты. Әлемді алаңдатқан, дүниежүзін дүрліктірген тажал дерттің дәурені де, салған сайраны да көп болғаны рас. «Енді жағдай реттелді-ау» дегенде қайта ушығып, «оңалды-ау» дегенде өрши түсетін. Өйткені, «жасыл аймаққа» енгенде жағамыз жайлауға кетпей, «қызыл аймаққа» ілінбесек деген қор­қыныш болатын. Тәулік сайын жария­ланатын мәліметтер, қабыл­данған қарарлар, бекітілген бұйрықтардың бірі кейде көңіл қуантса, кейде құлазытып жі­бер­генін талай көрдік. Деген­мен, көптің тілегені қабыл бол­ған сыңайлы. Себебі, қазір толығымен «жасыл аймаққа» ендік. Көңілден күдіктің арылуы, қауіптің сейілгені осы болар, сірә?!

Қазіргі таңда жағдай оңалып, қаз-қалпына қайта орал­ғандай. Оған себеп, бірқатар қау­лы­лардың жариялануы. Яғни, қазір «ашық жүйесі» біраз орын­дар мен орталықтардан алы­нып тасталды. Бұрынғыдай бетпердені тағып жүру міндетті емес. Оған қоса көпшіл қауыммен қуанышты бөлісіп, той тойлауға да рұқсат етілді. Бастысы, қатаң талаптардың қатары азайып, бәрі бірыңғайланды. «Қазіргі таңда «ашық жүйесі» алынғанымен, бірнеше кәсіпорындар, білім беру нысандары, басқа да орталықтар ерікті түрде жүйесін іске қосуына болады. Сондай-ақ, иммундық жүйені күшейту үшін уақытылы ревакцинациядан өткен дұрыс» деді облыстық санитарлық-эпидемиологиялық бақылау департаментінің баспа­сөз хатшысы Айман Жанахаева. Осы орайда, ақ халатты абзал жандар әлде де сақтық шара­ларына салғырт қарамау керек­тігін ескертуде. Бұл деге­німіз тәжді вирустың қайта тайран­да­майтынына кепілдік жоқ. Сондықтан денсаулыққа барынша көңіл бөлу керек.

Қорыта айтсақ, сала ма­мандары індетті ауыз­дықтаудың бірден-бір жолы вакцинация екенін қайталап айтуда. Кезең-кезеңімен алынған вакциналар ағзаның аурумен күресті жеңіл­дететінін қаперге салып, түсіндірме жұмыстарын түгел жүргізіп жатыр. Демек, жұрт­шылық жұмыла талапты тия­нақ­ты орындаса, ауруды толық ауыз­дықтаудың ауылы алыс емес.

Замира ҚОНЫСЖАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған