сол жағалауға көрік берген университет мектеп түлектеріне есігін айқара ашты
Әр жоғары оқу орнының өз ерекшелігі болады. Қызылордадағы жалғыз 14 қабатты зәулім ғимарат, Сырдария өзенінің сол жағалауына көрік беріп тұрған Қызылорда «Болашақ» университетінің кампусына қайбір адам болсын, қызыға көз тастайды. Тіпті, жастар ең жоғары қабатынан қаланың барлық аймағын қарауды армандайды екен. Бір кездерде жас жігіттер алып ғимараттың төбесіне жақсы көрген қызын шақырып, сөз салғанын естігеніміз бар еді. Көрдіңіз бе, Болашақ университеті тұнып тұрған романтика. Жастардың арманына қол жеткізе алады.
Иә, расында сәрсенбінің сәтті күні Қызылорда қаласы мектептерінің 11-сынып түлектері алғашқы армандарына қол жеткізді. Қызылорда «Болашақ» университеті кампусымен танысып, экскурсия жасаған оқушылар оқу орнының жылыжайын, спорт кешенін, жатақханасын, әлі көпшілік көріп үлгірмеген 1200 орындық «Bolashak Hall» Студенттер сарайын көріп, таң-тамаша болды. Ең қызығы, университеттің 14-қабатынан сол жағалауды тамашалады. Қаланы алақанына салып көргендей әсерде болды.
Осы күні университет «Ашық есік» күнін ұйымдастырды. Әр мектептен келген ұстаздар, оқушылар Қызылорда «Болашақ» университеті құрылымдық бөлімдерінің көрмесін тамашалады. Бәрін өз көздерімен көріп, Қызылордада осындай оқу орнының барына таңданып, көкейлерінде жүрген сұрақтарын қойып, жауабын алды. Қорытындысында «Болашақ бүгіннен басталады» атты қала мектептерінің 11-сынып түлектеріне арналған кәсіби бағдар беру салтанатты шарасына қатысты.
Қызылорда «Болашақ» университеті 1995 жылы Мәскеу Халықаралық бизнес және ақпараттық технологиялар университетінің Қызылорда филиалы ретінде ашылған. Былтыр осы датаны негізге алып, университеттің 30 жылдығын республика көлемінде жоғары деңгейде атап өтті. Сол кезде жан-жақтан жиналған қонақтар әлеуметтік желілерде «Қызылорда қаласының сол жағалауының сәнін келтіріп тұрған бірден-бір ғимарат Болашақ университетінде оқыған студенттерде арман жоқ шығар» деп жылы жазба қалдырған болатын.
Төрт жылдан кейін, яғни 1999 жылы филиал дербес жоғары оқу орны – Қызылорда экономика, статистика және информатика университеті болып қайта құрылып, орта, жоғары, жоғары білімнен кейін және қосымша білім беру бағдарламалары бойынша мемлекеттік лицензияға сәйкес жұмысын бастады. Осы жылы университет базасында Л.Н.Гумилев атындағы Еуразия Ұлттық университетінің Қызылорда филиалы ашылды. 2001 жылы университет «Болашақ» университеті болып қайта құрылды.
«Университет миссиясы – ғылым, білім және инновация интеграциясында жоғары білікті мамандар даярлауды қамтамасыз ететін заманауи ғылыми және білім беру ортасын қалыптастыру. 2017 жылы заманауи талаптарға сай кампустың құрылысы басталды. Кампуста ауданы 21000 шаршы метр болатын 14 қабатты бас оқу-әкімшілік ғимараты, 300 орындық асхана, студенттер кафесі, 200 орындық оқу залы, 78600 кітап қоры бар кітапхана, журналистердің шығармашылық шеберханасы – ТV студия, спорт-сауықтыру кешені, мәдени-ағарту іс-шараларын өткізуге арналған 500 орындық атриум залы, 800 орындық 2 жатақхана, 2 қысқы бақ, 8 блоктан тұратын 4 орталық жылыжай кешені, бассейн, 1200 орындық «Bolashak Hall» Студенттер сарайы бар. Оқу орнымызда «Студенттік Үкімет», «Студенттер Альянсы» ұйымы, «Жастар рухы» ұйымы, сонымен қатар «Мейірім» қайырымдылық қоры, Студенттер театры, «БУ» жайдарманшылар клубы, «Кербез» би ансамблі», «Ойдария» дебат клубы құрылған. Сондай-ақ, университетте студенттерге білім алуымен қатар, спортпен шұғылдануларына барлық жағдай жасалған. Бүгінде бес жарым мың студент білім алып жатыр»,- деді университет ректоры, филология ғылымдарының кандидаты Гүлжахан Снасапова.
«Ашық есік» күніне жиналған оқушылардың Болашақта оқуға деген қызығушылығын бал-бұл жанған жүздерінен байқадық. Оқу ғимараттарының талғамға сай, заманауи үлгіде салынғаны өз алдына, ондағы жалынды жастар үшін бар жағдайдың жасалғаны қызықтырды. Өнерге, спортқа, ғылымға талабы бар студенттер үшін керемет мүмкіндіктің бары, корпус ішінен бір сәт далаға шығып, ауланы аралағанда әсем Алматыда жүргендей сезінгендерін білдік. Оқу гранттарымен қатар талапкерлер үшін оқу ақысының өзге жоғары оқу орындарына қарағанда төмендігі, оқуға ынталы жастар үшін көптеген жеңілдіктердің қарастырылғанын естіген жастар «Болашаққа» жақындай түсті. Бакалавриат білім беру бағдарламалары бойынша оқытылатын 32 мамандықтың бірін оқушылар еш қиналмай таңдауына болады. Мамандықты игергеннен кейін 9 магистратура білім беру бағадарламасының бары ғылымға құштар жастар үшін үлкен мүмкіндік. Ендеше жарқын болашағыңның сәтті қадамын Болашақ университетінен баста, талапкер. Келесі арманына қол жеткіз.
Н.Көбегенұлы
