Қоғам дамуына көз жіберсек, жеткіншек ұрпаққа жастайынан кәсіптік-техникалық білім берудің мәні зор екендігін өмір дәлелдеп келеді. Ертеңгі білікті маманның кәсіптік шеберлігі кәсіптік-техникалық білім ордаларының қабырғасында қаланады. Осы тұрғыдан алғанда, жастарға кәсіптік білім беру бірінші кезектегі өзекті мәселелердің бірі бола бермек.
Ел экономикасының дамуына үлес қосатын өндіріс орындарына қажетті жас мамандарды дайындауда озық тұрған білім ордаларының бірі, ғасырға жуық тарих сүрлеуінде із қалдырған оқу орны Қазалы көлік-техникалық жоғары колледжі – Қазалы теміржол училищесі болған тұста-ақ одақтағы теміржол мамандарын даярлайтын санаулы оқу орындарының бірі болса, бүгінде республикалық «Жас маман» жобасының жеңімпазы қатарына енгізілген білім ордасы.
Нарықтық қоғамның зор сұранысына ие оқу орны халыққа қызмет ететін 11 мамандық 49 біліктілік бойынша жан-жақты, білікті кәсіпқой жұмысшы мамандарды оқытып дайындауда. Сонымен бірге барлық оқытылатын мамандықтар бойынша институциональды және мамандандырылған аккредиттеуден өткен. Ұжымда 100-ге жуық инженер-педагог еңбек етсе, мемлекеттік тапсырыс негізінде 500-ге жуық студент білім алуда. Колледжде 11 мамандықты оқытуға арналған жаңа оқу-техникалық құралдармен жабдықталған 36 оқу кабинеті, оның ішінде 18 арнаулы пән, 16 жалпы білім беретін пән кабинеттері, 10 шеберхана, 10 зертхана және үш полигон, 100 орындық жатақхана, 150 орындық мәдениет үйі, 100 орындық асхана, 20000 жуық кітап қоры бар электронды кітапхана, өлкетану мұражайы және оқу-жаттығу залы (фитнес клуб) студенттердің оқып, білім алуы мен демалуы мақсатында жасақталған. Материалдық-техникалық базасы бай қара шаңырағымызды «теміржол мамандарының ұстаханасы» десек, білім ордасынан тәлім алған талай шебер, майталман мамандар еліміздің түкпір-түкпірінде еңбек етуде. Колледждің 26 ұстазы алыс-жақын шет елдерде білімін шыңдаған.
«Жас маман» жобасы бойынша былтырғы оқу жылында «Теміржол жылжымалы құрамдарын пайдалану, жөндеу және техникалық қызмет көрсету», «Локомотивті жөндеу бойынша слесарь», «Вагондарды жөндеу слесары», «Электр жабдықтарын жөндеу слесары» біліктіліктері бойынша соңғы үлгідегі құрал-жабдықтар алынып, өз кезегінде білікті мамандарды даярлау бойынша жұмыстар жандандырылуда. Қазіргі таңда оқу орнында «Жас маман» жобасы аясында «Жылжымалы құрамдардың кешенді тренажорлары», «Вагондардың құрылымын 3D модельдеу», «Жылжымалы құрамдардың электроника негіздері», «Цифрлық жүйелердің негіздері» оқу кабинеттері мен «Дәнекерлеу ісі» шеберханасы бойынша бірнеше инновациялық технологиялармен жабдықталған оқу-зертханалық кабинеттері мен шеберханалары іске қосылып, студенттерге теориялық білімді тәжірибемен ұштастыра оқыту, кәсіптік құзыреттілікті қалыптастыру үшін білім процесінде пайдаланылатын қазіргі жаңа үлгідегі оқу өндірістік жабдықтар, материалдық құралдарды еркін қолдана алатын болдық. Жаңа технологияларды қолдану арқылы оқыту студенттердің аналитикалық ойлау қабілетін, интеллектуалды және шығармашылық қабілетін дамытады. Білім сапасын арттыру жəне нəтижеге бағытталған үлгіге бет алу барысында оқытушылар мемлекеттік стандарттармен берілген нəтижелерге жетуде кəсіби шебер, ақпараттық-коммуникативтік мəдениеті жоғары тұлғалық-дамытушылық функцияны атқарады. Сонымен қатар, оқу орнында даярланатын мамандықтар негізінде 46 әлеуметтік серіктестік мекемелердің директорларымен екі және үш жақты келісімшарт жасалған. «Қамқор вагон» ЖШС Қазалы вагон жөндеу депосы» филиалының директоры Т.Әліпбаевпен дуальды оқыту жүйесі негізінде өндіріс ошағынан тәлімгерлер бекітіліп, өндірістік оқу мен кәсіптік практиканы өткізуге зор мүмкіндік жасалып келеді. Сонымен бірге, жоғарыда аталған мекемелерде еңбек ететін қызметкерлердің 60%-ы Қазалы көлік-техникалық жоғары колледжінің түлектері екендігі қуантады.
«Жас маман» жобасы аясында оқу-материалдық базаны жаңғырту негізінде аталған жоба форматында кадрларды даярлау және қайта даярлау мақсатында оқу орны жанынан құзыреттілік орталығы ашылды. Осы жобаларды жүзеге асыру барысында шетелдік әріптестермен бірлескен жұмыс нәтижесінде мәлімделген үш біліктілік бойынша халықаралық аккредиттеуге дайындалудамыз. Жаңа оқу технологиялармен заманауи техникалық құрылғылардың арқасында колледждің оқу-материалдық базасы нығайды. Ал, колледжде дуалдық жүйенің алғашқы тәжірибесі теміржолдағы жылжымалы құрамдарды пайдалану және техникалық қызмет көрсету мамандығы бойынша басталды. Алға қойылған мақсат – кәсіби-функционалдық құзіреттілік деңгейі жоғары, еңбек нарығында бәсекеге қабілетті, сұранысқа ие, кәсіби потенциалы мығым маман даярлау. Дуалдық білім беруге негізделген тәжірибелік эксперименттің бірінші кезеңінде оқу дидактикалық, оқу базаны дайындау және ұйымдастыру жұмыстары жүргізілді.
Оқу жоспарындағы функционалды модульдер бойынша арнайы пәндерге берілген практикалық сабақтарды өткізу үшін мекеме базасында арнайы шеберханалар жабдықталды. Дуальдық жүйе бойынша білім алатын топ студенттері өндіріс стандартындағы білім беру салалары бойынша қажетті білік дағдылары кәсіптік (оқу өндірістік, технологиялық, диплом алды) практикалық оқу әдістері барысында меңгеріп, тәжірибе жинақтау күндерінде бекітіп отырады. Жүргізілген жұмыстардың қорытындысы колледж білім алушыларының кәсіби құзіреттіліктері деңгейінің өсуімен де даму көрсеткіштерінің жоғарылағандығын көрсетті.
Түйіндей келе, кәсіби білікті маман даярлау, техникалық және кәсіптік білім берудің сапасын арттыру – басты мақсат. Биіктен көрінуге бағытталған еліміздің қәсіптік білім саласының болашағы жарқын, келешегі зор болатынына сеніміміз мол.
Болатбек АХМЕТОВ,
Қазалы көлік-техникалық жоғары колледжі директоры,
ҚР Білім беру ісінің құрметті қызметкері
