Апта басында Қызылорда облысының Білім саласында сапаны қамтамасыз ету департаментінің басшысы Ғалия Дәулетова 2025 жылдың 8 айында атқарған жұмыстары бойынша журналистер алдында брифинг берді. Департамент осы мерзім ішінде 157 мемлекеттік бақылау шараларын өткізіпті.
Мектепке дейінгі 97 білім беру ұйымында жүргізілген аттестаттау қорытындысы бойынша 17 білім беру ұйымы бірінші рет аттестатталса, 79-ы аттестатталмаған, 8 жеке меншік балабақша жабылған.
— Мемлекеттік аттестаттау аясында жүргізілген кешенді тестілеуге 48 мектептен 3696 білім алушы қатысты, білім сапасы — 39%, үлгермеуші – 18,6% көрсетті, яғни бұл 2 деген бағаны білдіреді. 48 мектептің ішінде 4 мектеп оқушысы кешенді тестілеудің шекті деңгейінен өте алмады. Бұл мектептерде кешенді тестілеу жыл соңында қайта өткізілетін болады.
Қармақшы ауданы мен Қызылорда қаласы бойынша білім бөлімдеріне жоспарлы тексеру жүргізілді. Жоспарлы тексеру «Білім туралы» заңда белгіленген 20 бағыт бойынша жүргізіліп, оның ішінде бірнеше бағыт бойынша бұзушылықтар анықталды. Ағымдағы жылдың 1 қазанына дейін қалпына келтіруге уақыт берілді,- дейді Ғалия Ноғайқызы.
Мемлекеттік бақылау қорытындысымен біліктілік талаптарға сәйкес келмейтін 1 мемлекеттік балабақша, 3 бастауыш мектеп өз жұмыстарын тоқтатып жабылыпты. 9 балабақша реестрден шығарылған, ал 3 бастауыш мектептің лицензиясын қайтару бойынша жұмыс жасалып жатыр екен.
Осы тұста тоқталып өтетін жайт, департамент басшысы Арал ауданындағы Көнту бастауыш мектебінде білім алатын 8 оқушының және Шиелі ауданындағы Жуантөбе бастауыш мектебіндегі 6 баланың білімі туралы жағдайды жайып салды. Көнту ауылында оқу жоспарына сәйкес орыс тілі, музыка, цифрлық сауаттылық, денешынықтыру пәндерінің тиісті маманмен жүргізілмейтінін, медициналық кабинетпен, спорт залмен қамтамасыз етілмейтінін, білім алушыларға ыстық тамақ берілмейтіндігін анықтаған. Ал, Жуантөбедегі оқушылардың білім деңгейі өте төмен болып шыққан. «Мемлекеттік аттестаттауға қатысты 3-сыныптан 3 оқушыдан алынған тест қорытындысында 100 пайыз 2 деген бағаны алып отыр, яғни үлгерімдері 0 пайызды құрайды. Балалар мектеп бағдарламасын мүлде игермеген» дейді Г.Даулетова.
Бұл мектепте де жағдай төмен, мектеп мамандармен толық қамтамасыз етілмеген. Медициналық кабинет, спорт зал жоқ, балаларға ыстық тамақ берілмейді. Сөйте тұра мектептің жылдық бюджеті 53 млн. 880 мың теңге екен.
Департаменттің 2024-2025 оқу жылында жүргізген мемлекеттік бақылау шаралары мен мониторинг қорытындысы нәтижесімен білім беру қызметіне қойылатын біліктілік талаптарға сәйкес келмейтін, тиімсіз, білім сапасы өте төмен білім беру ұйымдарын жабу нәтижесінде жергілікті атқарушы орган 1 жылда 1 млрд теңгеге дейін қаржы үнемдеген.
Енді жыл соңына дейін 52 мектепке мемлекеттік аттестаттау жұмыстарын, 20 балабақшаға қайта аттестаттау, 4 мектепке талаптарға сәйкестікті тексеру жүргізбек. Ал, қазан айында Қызылорда облысының білім басқармасына жоспарлы тексеру жүргізу белгіленген. Сонымен бірге 3 мектепке мемлекеттік аттестаттау жұмыстары, 1 мектепке талаптарға сәйкестікті тексеру жүргізу қазан-қараша айларына жоспарлапты.
— Бүгінгі күні республика бойынша жекеменшік мектептердің 40%-ы жалға алынған ғимараттарда орналасқан. Бұл қауіпсіздік пен инфрақұрылым тұрғысынан тәуекел болып табылады. Министрлік лицензиялық талаптарға өзгеріс енгізіп, жалдамалы ғимараттарда мектеп ашуға тыйым салуды жоспарлап отыр. Мемлекет сапалы білім беретін, білім саласында заңнама талаптарын сақтайтын және балалардың мүддесін басты орынға қоятын жеке мектептерді ғана қолдауды жалғастыратын болады, — дейді департамент басшысы Ғалия Дәулетова.
Алдағы уақытта жалдамалы ғимараттарда мектеп ашуға тыйым салынатын болса, Қызылордадағы кей жеке мектептерге қауіп төнетіні белгілі. Қаладағы екі жеке мектептің ісі сотқа жолданып, жағдайы шатқаяқтап тұрғаны да айтылды. Ендігі кезекте келесі жылы мектепке дейінгі мекемелерге лицензия берілетін болса, көптеген балабақшалардың жағдайы мәз болмайын деп тұр.
Н.Меңдібай
