Өткен жыл өзегімізден көп тепсе де, өз кезегінде жақсы жаңалықтары да болды. Сан салалардың тұралап қалған тамырына қан жүгіріп, жүрмей қалған жұмыстар жанданды. 2022 жыл «Жаңа Қазақстан» деген айдар алып, айды аспанға бір-ақ шығарды. Иә, көптеген салаларға жаңашылдық пен жанашырлық келді. Соның ішінде білім саласының шоқтығы биік екені даусыз.
Білім сонау ғасырлардан адам баласына танылған. Күллі адамзат өмірін білімге арнайды. Себебі білім ұрпақтан ұрпаққа берілетін шежіре, тарих, өнеге, тәрбие! Жас ұрпақтың білімге деген қызығушылығы қашан да жоғары. Адамдар бір орында тұрған жоқ, жылдан жылға түрлі технологиялар, жаңа білім бағдарламалары ойлап табылып, білім сапасы артады. Білімді ұрпақ сау келешектің кепілі. Білімді адам – ең бай адам. Адам ешқашан толықтай білімге қанық бола алмайды. Байлық, мақсат, мансапқа жету жолында білімнің маңызы зор. Тарих қойнауына енген барыс жылы білім саласы үшін табысты болды. Ұстаздарымыз түрлі деңгейдегі байқауларда топ жарып, оқушыларымыз үздіктер қатарынан көрінді. Қызылорда облыстық білім басқармасы мен кәсіподақ комитетінің ұйымдастыруымен жылдың қорытынды кеші өткізілді. Салтанатты шараға білім саласында жемісті еңбек етіп, саналы ғұмырын ұстаздық қызметке арнаған білім саласының ардагерлері мен білім жанашырлары, педагогтер қатысты. Мерекелік кеште басқарма басшысы Мейрамбек Шермағанбет әріптестерді жаңа жылмен құттықтап, жыл бойы атқарылған жұмыстар мен жетістіктерге тоқталды.
— Биыл ұстаздарымыз үлкен белестерді бағындырды. Атап айтқанда, дәстүрлі өтетін «Үздік педагог-2022» республикалық байқауына қатысқан 4 ұстазымыз үздіктер қатарынан көрініп, жеңімпаз атанды. «WorldSkills» ұлттық чемпионатында колледж студенттері 2 алтын, 1 күміс, 1 қола медаль олжалап, жетістігімізді еселеді. Әрине, мұның барлығы да ұстаздарымыздың маңдай тер еңбегінің, күн-түн демей, уақытпен санаспай жасаған ерен жұмысының арқасы,- деді басқарма басшысы.
ХХІ ғасыр – ақыл-ой, білім-ғылым, инновация мен креативтілік негізінде үнемі өзгеріп отыратын орта қалыптастырды. Жылдам өзгермелі кеңістікте сапалы білім арқылы осы қасиеттерді азаматтар бойына сіңіру адам капиталын дамытудың жолы болмақ. Сапалы білім ғана өркендеген мемлекеттің, қуатты экономиканың және бақуатты қоғамның кепілі бола алады. Бұл ағартушы Ыбырай ұстаздың «Өнер – білім бәрі де, оқуменен табылған» деген сөзінің өзектілігін айғақтайды.
Жылжабар тұста ардақты мамандық иелеріне құрмет көрсетілді. Биыл сала ардагерлері Күләй Сағындыққызы Ермағамбетова 75 жасқа, Гүлзия Жұмағалиқызы Оспанова 70 жасқа, Назир Мадемханұлы Жәнібеков 70 жасқа толды. Салтанатты шарада басқарма басшысы М.Шермағанбет абыройлы қызмет етіп, салада өзіндік қолтаңбасын қалдырған ұлағатты ұстаздарды мерейлі мерекелерімен құттықтап, ілтипат көрсетті.
Иә, ХХІ ғасыр – ақпарат пен технологияның заманы. Ендігі адамдардың білім алу деңгейі мүлде жаңа деңгейге көтерілді, сапасы артты. Ізденген адамға білім ақпарат алу көздері жетерлік. Тіпті технологияның арқасында адам тілді ешқайда шықпай бір орында жатып-ақ үйрене береді. Мұның бәрі білімнің шексіз құдіреті.
Осы білімнің қасиетін ұқтырған жиында «Білім және ғылым қызметкерлерінің кәсіподағына сіңірген еңбегі үшін» белгісін, ҚР Кәсіподақтар Федерациясының Құрмет грамотасын, «Қазақстандық оқу-ағарту, ғылым және жоғары білім қызметкерлерінің салалық кәсіподағының» Құрмет грамотасын табыс етті. Мұнан соң жыл бойы зор жетістікке жеткен білім беру ұйымдарына «Үздік әлеуметтік әріптес», «Озық идеялар мен технологиялар ордасы», «Ынтымағы жарасқан ұжым» номинациялары табысталды. Бұдан бөлек, республикалық байқауларда топ жарып, үздік атанған білім ордалары «Үздік білім беру ұйымы – 2022» номинациясымен, халықаралық, республикалық кәсіби байқауларды бағындырған және жеңімпаз шәкірт даярлаған ұстаздар «Жыл үздігі» номинациясымен марапатталды.
Марапаттар легін тарқатып айтар болсақ, «Үздік әлеуметтік әріптес» деп бірнеше ұжым ғана таңдалынып алынған. Олардың қатарында Арал ауданындағы №281 негізгі мектебі, Қазалы ауданындағы №93 орта мектебі, Қармақшы ауданындағы №274 орта мектебі, Жалағаш ауданындағы «Ақмаржан» бөбекжай- бақшасы, Сырдария ауданындағы №174 орта мектебі, Шиелі ауданындағы «Айналайын» бөбекжай бақшасы, Жаңақорған ауданындағы Ә.Әбутәліпов атындағы №209 орта мектебі, Қызылорда қаласындағы К.Қаракөзов атындағы №235 орта мектебі бар.
Ал, «Озық идеялар мен технологиялар ордасы» номинациясын Арал ауданы бойынша білім бөлімінің №220 орта мектебі, Қазалы ауданындағы №92 орта мектебі, Қармақшы ауданындағы №277 мектеп-лицейі, Жалағаш ауданындағы №201 мектеп-лицейі, Сырдария ауданындағы №36 Ә.Тәжібаев атындағы мектеп-лицейі, Шиелі ауданындағы №47 мектеп-лицейі, Жаңақорған ауданындағы №163 қазақ орта мектебі, Қызылорда қаласындағы «Сыр шуағы» бөбекжай бақшасы, Смағұл Ысқақов атындағы Қызылорда құрылыс және бизнес колледжі еншіледі.
Сонымен қатар, «Ынтымағы жарасқан ұжым» номинациясы Аралдағы «Желкен» бөбекжай-бақшасына, Қазалыдағы №182 орта мектебіне, Қармақшыдағы №26 орта мектебіне, Жалағаштағы №38 орта мектебіне, Сырдария ауданы, О.Мәлібаев ауылындағы №131 Талғат Қозыбаев атындағы орта мектебіне, Шиелідегі №45 Ақ Орда мектеп гимназиясына, Жаңақорғандағы №180 орта мектебіне, Қызылорда қаласындағы С.Әлжіков атындағы №144 орта мектебіне бұйырды.
Білім – асыл қазына. Білім инемен құдық қазғандай қиын сала. Адам өмірінің соңына дейін білім алады, ал кейде тіпті оның өзі аз болады. Адам қаншалықты білімді болса, соншалықты бай-қуатты болмақ. Адамның білімсіз өткен бір күні бос күні. Батыл бірді жықса, білімді мыңды жығады. Білім – адам бойына біткен ең мықты қару. Адамзаттың жетер ең биік шыңы білімді толық меңгерген күні. Сондықтан да ұлағатты ұстаздардың еңбегі орасан зор.
Бір облыстың ізгі үрдісін қаланың білім саласының сырттандары жалғап әкетті. Оқушылар сарайында Қызылорда қаласы білім саласының барыс жылы қорытындыланды. Шара Қызылорда қаласы бойынша білім бөлімі мен қалалық кәсіподақ комитетінің ұйымдастыруымен өтті. Мерекелік кешке білім бөлімінің басшысы Ерлан Теңізбайұлы Боданов және мектеп директорлары мен балабақша меңгерушілері қатысып, жыл бойы атқарылған жұмыстар мен жетістіктерге тоқталды.
«Тәрбиесіз берілген білім адамзаттың қас жауы» екендігін айтқан әлем ұстазы Әл-Фараби бабамыздың ойы да заманауи шарттармен сәйкеседі. Өйткені бүгінгі күні оқудың сапасы берілген білімнің тереңдігімен ғана емес, оқушының қоғам мен қоршаған ортаға тигізген пайдасымен де өлшенеді. Жаңаша ойлау мен ортаны өзгертуге талпыныс – осы екі ұғымды бүгінгі буынның үкілі ұстанымы және оны ұрпақтың көз алдында хатталып тұратын ұлағатына айналдыру басты міндет. Білім саласының жанашыр жандары осы тұрғыда көптеген келелі істер атқарып, ұлағат ұғымын ұғындыруда ұлылық танытты.
Расымен қызылордалықтар 2022 жылы білім саласы бойынша айтарлықтай жетістікке қол жеткізді. Шәкірттер әлемдік, республикалық білім бәйгесінде топ жарса, спортшылар әлемдік додаларда оза шауып, көк байрағымызды көтеріп, өнер конкурстарында лауреаттар мен жеңімпаздар атанды. Ұстаздар да белестерді бағындырды. Мұғалімдер арасында түрлі байқаулар мен жарыстар өткізіліп, білім бәйгесінде үздік шыққан мұғалімдер облыстық және республикалық сайыстарда аймақ абыройын лайықты қорғады.
Атап айтсақ, №15 мектеп-лицейінің математика пәні мұғалімі Балтабай Жәмішев Президент қолынан «Ерен еңбегі үшін» төсбелгісімен марапатталды. Ал, «Үздік педагог – 2022» республикалық кезеңіне №23 мектеп-лицейінің химия-биология пәнінің мұғалімі Айгүл Қиясова қатысып, жеңімпаз атанып, жетістікті еселеді.
— Өткеннің ізі болмаса, бүгіннің сазы сылдыр, базары бұлдыр болмақ» дейді. Өткеннің күйін ой елегінен сүзіп, өткеннің тарихы мен бүгінгі күннің тынысын бір бағытта ұшастырып, жұмыстар атқарылуда. Ағымдағы жылы №10, 173 мектептер 60 жылдық мерейлі мерекесін, №235 мектеп 50 жылдық, №112 мектеп 70 жылдық мерейтойын ауқымды түрде атап өтті.
Үш ауысымды мектеп мәселесі бүгінде қоғам назарында. Оны жою мақсатында №101 және Абай атындағы ДБА мектептеріне қосымша ғимараттың құрылысы жүруде. Бұл өз кезегінде үш ауысымды мәселесін болдырмайды. Бүгінде «Бәйтерек» мөлтек ауданында 600 орындық мектеп құрылысы жүруде. Сонымен қатар, «Сабалақ» саяжайында 150 орынды дарынды балаларға арналған мектеп интернаттың құрылысы аяқталды. Оны 2023 жылы ашу жоспарлануда. Балаларға жайлы жағдай жасау, сапалы білім мен тәрбие беру, саналы ұрпақ өсіру елміздің бірегей міндеттерінің бірі. Осы мақсатта алдағы жылдары аймағымызда заманауи үлгідегі «Жайлы мектептер» салыну жоспарлануда. Құрметті әріптестер, өміршең істер, жарқын жобалар, табысқа бастаған таңдаулы жұмыстар әлі де жалғасын таба береді,– деді Қызылорда қаласы бойынша білім бөлімі басшысы Ерлан Теңізбайұлы.
Жиында «Ақпараттық технологиялар мектебі», «Үздік ұжым», «Үздік өнер ұжымы», «Ауыл-ел бесігі», «Рухани мұра мектебі», «Белсенді мектеп ұжымы», «Жастар жанашыры», «Үздік балабақша», «Ынтымағы жарасқан ұжым», «Бала жанының қамқоршысы», «Бала жанының бағбаны» номинацияларымен марапатталды.
Еліміздің ерен ұлдарының бірі Міржақып Дулатұлы: «Жалғыз сүйеніш, жалғыз үміт – оқуда. Теңдікке жетсек те, жұрттығымызды сақтасақ та, дүниедегі сыбағалы орнымызды алсақ та, бір ғана оқудың арқасында аламыз. Жақсылыққа бастайтын жарық жұлдыз – оқу. Надан жұрттың күні – қараң, келешегі – тұман» деп ғылым, білім, оқудың маңызын қара халыққа жап-жарық етіп көрсеткен. Білімнің сапасын көтерудің қазіргі таңда жолдары көп. Ең бастысы білімді де білікті, ұшқыр ойлы шығармашылық қабілеті мол ұстаздың шәкіртімен бірлесе еңбек етуі талап етіледі. Білім балабақшада бапталып, мектепте бақ тауып, жоғары оқу орында үміті ақталады. Одан соң барып елге қызмет етпек. Осы орайда болашаққа алтын көпір болған еліміздегі ұстаздардың қажырлы еңбегі еленгені біз үшін де қуаныш.
Айдар САЙЛАУОВ
