М.Мәметова атындағы Қызылорда педагогикалық жоғары колледжінде «Мектепке дейінгі тәрбие және оқыту» бөліміне қарасты «Әлеуметтік-экономикалық пәндер» пәндік-циклдік комиссиясының ұйымдастыруымен «Тәуелсіздік жолы: қалыптасуы, дамуы және келешегі» атты патриоттық-танымдық апталықтың ашылуы өтті.
Апталықтың ашылу салтанаты «Ежелгі Қазақстан» (б.з. V ғ. дейін), «Орта ғасырлардағы Қазақстан» (VI – XVII ғғ.), «Жаңа замандағы Қазақстан» (XVII – XIX ғғ.) және «Қазіргі замандағы Қазақстан» (XX ғ.) кезеңдерінің тарихи жолын бейнелейтін театрландырылған көріністен бастау алды.
Бұдан кейінгі іс-шара «Ақтабан шұбырынды, Алқакөл сұлама» тарихи оқиғасының 300 жыл толуына орай «Қазақстанның дербестігі үшін күрес» тақырыбында тарихи-танымдық кездесуге ұласты. Шараға Қорқыт ата атындағы Қызылорда университетінің тарих ғылымдарының докторы Тастанбек Сәтбай және Қызылорда облыстық тарихи-өлкетану мұражайының ғылыми хатшысы Асхат Сайлау қатысты.
Тарихи-танымдық кездесу барысында кеш қонақтары 1723 жылдың көктемінде жоспарланған жаулап алу жорығы қазақ халқының тарихына «Ұлы апат жылдары» — «Ақтабан шұбырынды, Алқакөл сұлама» атауымен енгендігін, Шәкәрім Құдайбердіұлының түсіндірмесіне сәйкес, «жаяу-жалпы адамдардың ақ табан болғанша жүгіріп қашуы» деген секілді құнды тарихи ақпараттармен таныстырды. Дәл сол жылдары қазақтың ең көне әні-жоқтау «Елім-ай» қазақ қайғысының символы ретінде дүниеге келгендігін де айтып өтті.
«Ақтабан шұбырынды, Алқакөл сұламаның» шырғалаңы мен аласапыраны қазақтардың еркіндік пен ерлік рухын шыңдады. Айбынды тарихқа лайықты ұрпақ өссе екен деген тілекпен білім алушылармен бірге өткізілген шара қорытындыланды. Шара соңында білім алушылар өздерін қызықтырған сұрақтарын қойып, аталмыш тақырыпта тереңірек ақпарат алды.
Апталық аясында алдағы күндері атқарылатын жұмыс жоспары: «Тәуелсіздіктің сырлы бояулары» атты сурет көрмесі «Сахнадагы тарих. Егемендік декларациясы: Тәуелсіздік. Мемлекеттілік. Ұлттық жаңғыру» тақырыбындағы жас актерлардың театрландырылған тарихи қойылымдар желісіне жалғасты. «Кәсіптер әлемін ашамыз» бизнес жобалар сайысында білім алушылар кәсіпкерліктің заманауи әдіс-тәсілдерімен бөліссе, «Архивтегі аманат. «Қазақстан әуелсіздігінің тарихи жолы» атты облыстық ғылыми практикалық конференцияда жас ғалымдар өздерінің ғылыми зерттеу жұмыстарын қорғады.
Ш.Жалғасбекұлы
