АҒЫЛШЫН ТІЛІ ПӘНІ МҰҒАЛІМДЕРІНІҢ СЕМИНАРЫ

№268 мектеп-лицейінің 10 жылдық мерейтойына орай өтті

Қызылорда қаласы бойынша білім бөлімінің ұйымдастыруымен №268 мектеп-лицейінің 10 жылдық мерейтойына орай «Global English in changing world» тақырыбында ағылшын тілі пән мұғалімдерінің қатысуымен қалалық семинар өтті. Семинарға қалалық білім бөлімінің әдіскері Ғалия Ермағанбетқызы, педагогикалық шеберлік орталығының Қызылорда қаласындағы филиалының аға менеджері, тренер Ерболат Оспанов, мектеп директоры М.Абильдаев және қалалық мектептердің ағылшын тілі пәнінің мұғалімдері қатысты.

Семинар жаңартылған білім беру бағдарламасы аясында ағылшын тілі сабақтарында тілдік дағдыларды дамытуды, оқытуда қолданылатын тиімді әдіс-тәсілдер арқылы оқушылардың функционалдық сауаттылығын арттыруды, сондай-ақ практикалық және әдістемелік көмек көрсетуді мақсат тұтты.

Педагогикалық шеберлік орталығының Қызылорда қаласындағы филиалының аға менеджері, тренер Ерболат Тұрсынтайұлы қай бағытта жұмыс жасау керектігі туралы үздік тәжірибелерімен бөлісті. Қатысушылар тренер берген сұрақтарға пікірлесу, ой бөлісуде белсенділік танытты.

Семинарда №268 мектеп-лицейінің ағылшын тілі пәнінің мұғалімі Гүлзат Қарымсақова және №212 мектеп-гимназиясының ағылшын тілі пәнінің мұғалімі Гүлмаржан Исаханова “Social problems” тақырыбында 9 сынып оқушылырымен ашық сабақ өткізді. Сонымен бірге №268 мектеп-лицей мұғалімі Сандуғаш Қуандықова, №172 орта мектеп мұғалімі Гүлжанат Нұржанова және №261 орта мектеп мұғалімі Мухаббат Кенжебаева педагогикалық шеберліктерін көрсетіп, өз тәжірибелеріндегі жаңа әдіс-тәсілдерімен бөлісті.

QR код арқылы ұстаздар кері байланыс берді. Семинарға қатысушылар шараның жақсы дәрежеде өткізілгені жайлы пікірлерін білдірді.

Мерейтой қуыршақ театрының және мектеп өнерпаздарының орындауындағы мерекелік сазды бағдарламасына ұласты.

Б.Бағдатұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған