М.Мәметова атындағы Қызылорда педагогикалық жоғары колледжінің ұйымдастыруымен өткен жастардың патриоттық форумы әлі көпшіліктің есінен кете қойған жоқ. Биылғы республикалық форумға еліміздің педагогикалық мамандар даярлайтын 11 колледжінен 80-ге жуық қатысушы, аймақтағы 27 колледжден 100-ге жуық қатысушы келді.
Форум аясында дәстүрлі түрде тек қана қыздардан құралған «Мәншүк маршы» өтті. Оған 500-ден аса студент қыздар қатысты. Достық үйінде өткен форумның пленарлық мәжілісінде 300 қатысушыға бабалар ерлігін дәріптеуге байланысты баяндамалар, зерттеу жұмыстары, жобалар ұсынып, студент жастардың үндеуімен қорытындыланды.
— Форум мақсаты — жас ұрпақ бойында Отаны үшін мақтаныш сезімдерін қалыптастыру, аға буынның жанқиярлық еңбегін бағалап, тарихты құрметтеуге үндеу. Құндылықтарға негізделген «Біртұтас тәрбие бағдарламасының» аймағымызда жоғары деңгейде жүргізіліп жатқанын насихаттау. Жеңістің 80 жылдығы аясында оқу орны 73 жыл есімін иеленген Мәншүктің батырлық болмысы, ғибратты ғұмыры арқылы студент жастарды ерліктің өнегелі ізін өшірмей тағзым жасауға, отансүйгіштікке тәрбиелеу, ұрпақтар сабақтастығын жалғастыру,- дейді колледж директоры Жақсыгүл Тоғанова.
«Достық» үйінде жалғасқан форумда колледжің қысқаша тарихы, ардагер ұстаздар, патриоттық бағытта жүргілетін тәрбие жұмыстары жайлы бейнеролик көрсетілді. Қызылорда облысы әкімінің орынбасары Ш.Байманов, ҚР Оқу-ағарту министрлігі өкілі Қ.Бөрібеков форумға қатысушыларға құттықтауын жеткізді.
Форум барысында Ақтөбе облысының мәдениет, архивтер және құжаттама басқармасының «Әлия» облыстық патриоттық тәрбие беру орталығының басшысы Бағдаш Әбдіжамиқызы әлеуметтік әріптестік туралы және «Әлия» облыстық тәрбие беру орталығының жұмысы жайлы айтты. Қ.Дүтбаева атындағы Атырау гуманитарлық колледж студенті Нұрай Алпысбаева сөйледі. Сыр елі батырлары жайлы қалам тартып жүрген ғалым, Қорқыт ата атындағы Қызылорда университетінің аға оқытушысы Бақытжан Ахметбек М.Мәметованың қарулас командирі жайлы баяндама жасады. Колледж түлегі, студент шағында «Әкелер даңқы жолымен» жорығының қатысушысы, бүгін аймақ қана емес, ел мақтанышы, «ҚР Еңбек сіңірген ұстазы» құрметті атағының иегері Нағиша Есбосын өзі барған жорық жайлы, сол кездегі ерекше сезім және колледж туралы әңгімеледі.
Форумға қатысушы жастар атынан «Ақпараттық қауіпсіздік жүйелері» мамандығы студенті, «Ғылыми жоба-2025» байқауының жеңімпазы Әбілқасым Орынбасар Үндеуоқыды. «Достық» үйіндегі форум жұмысы М.Мәметова атындағы Қызылорда педагогикалық жоғары колледжінің көшбасшы студенттерінің жалынды ұранымен аяқталды.
Н.Бекежанов атындағы қазақ академиялық музыкалық драма театрында колледждің 200-ге жуық оқытушысы мен студенттерінің қатысуымен Т.Әліпқали, А.Мәметованың «Мәңгілікке маздаған қыршын ғұмыр», А.И.Халимульдина, А.К.Халимульдиннің «Звездный час Маншук» кітаптарының желісі бойынша дайындалған «Батыр Мәншүк» мультиформатты перформанс (көпформатты қойылым) 700 көрерменге сахналанды. Көпшіліктің тәнті болғаны сондай, қойылым соңында таңқалыстарын жасыра алмады. Кәсіби әртіс болмаса да, сахнаны еркін меңгеріп, көрермен жүрегіне жол тапқан колледж оқытушылары мен студенттері өз ролдерін жоғары деңгейде сомдап шықты. Қойылым соңында Мәншіктің бейнесіне жасанды интелект арқылы жан бітірткені ұмытылмас әсер қалдырды.
Келесі күні форум қатысушылары Қармақшы жеріндегі Қорқыт ата кесенесіне барып, мұражайын аралап, Қорқыт ата амфитеатрындағы арнайы қойылымды тамашалайды. Форумға қатысушы студенттерге Қызылорда қаласындағы мәдени орындарға экскурсия жасалып, колледж базасында «Мерген ару» сайысы өткізіледі.
Форум аясында Жеңістің 80 жылдығына орай «Ұлы Жеңіс – мәңгілік тағзым!» айдарымен колледждің барлық топтарында ашық тәрбие сағаттары өтіліп, «Менің атам – майдангер» айдарымен 150-ден астам колледж студенті өздерінің ҰОС қатысқан аталары мен тылда еңбек еткен ата-әжелері жайында бейнероликтерін колледж әлеуметтік парақшаларында жариялады.
— Жеңістің рухы – әр жүректе, ал сол рухты сақтау әрқайсымыздың парызымыз. Өткенге құрмет, болашаққа сеніммен қарау арқылы біз Ұлы Жеңістің рухын сақтап қаламыз. Бейбітшілік пен еркіндік, тек қана бүгін емес, ертең де біздің басты құндылығымыз болатыны сөзсіз. Алаштың анасы атанған Сыр еліндегі Мәншүк Мәметованың есімімен аталатын оқу орны — ерлік пен елдіктің, білім мен парасаттың қасиетті ордасы. Біз үшін Мәншүк ерлігі — құр сөз емес, ол – жүрекке орнаған сенім, рухымызды асқақтатар ұлы ұстаным,- дейді коллледж ұстаздары.
Н.Естемес
