Білім – бүгін мен болашақтың бағдаршамы

Бүгінгі заман білім беру жүйесі жан-жақты дамыған, өздігінен жұмыс істей алатын, үздіксіз ізденуге ынтасы бар жастарды дайындауды талап етеді. Себебі, қоғамның әлеуметтік-экономикалық дамуында білім беру жүйесі жетекші рөл атқарады. Елімізде ондаған жылдар бойы қалыптасқан дәстүрлі білім беру моделі әлемдік көшке ілесуге ниетті. Ал, оның алғышарттары жыл сайын қабылданатын мемлекеттік бағдарламалар. Бағдарламаның басты тетігі – білім, мақсаты – бәсекеге қабілетті маман дайындау. Демек, ұдайы дамып, үздіксіз жаңалықпен толығып отыруға бейім салмақты салаға артылған жүк те ауыр. Себебі, интеграциялық даму мен инновациялық өрлеу қарыштаған сайын бірқалыпты жүйемен көшке ілесу мүмкін емес. Осы ретте, нарықтық экономика тұсында сапалы білімнің қолжетімділігін қамтамасыз етуге қаржыландыру жүйесін оңтайландырып, білімнің бәсекеге қабілеттілігін арттыру маңызды құбылыс. Дәл осы бағытта Сыр елі білім саласында біршама жұмыс атқарылып, екіұдай сұрақтарға жауап табылып жатыр. Оған қоса, алдағы оқу жылына да дайындық басталып кетті.

Нақты айтар болсақ, Қызылорда облысы бойынша 2022-2023 жаңа оқу жылында 1-сыныпқа 18 мыңға жуық бала қабылданады деп күтілуде. Осыған сәйкес аймақта 4350 орынға арналған 9 мектептің құрылысы жүргізілуде. Бұл білім ордалары жаңа оқу жылына орай пайдалануға берілмек. Ал, өңірде мектепке дейінгі білім беру ұйымдарының үлесі 73 пайызды құрайды. Аталған ұйымдар өткен жылдан бастап мемлекеттік тапсырыс негізінде меншік нысанына қарамастан жан басына қаржыландыру әдістемесі бойынша бірдей көлемде қаржыландырылуда. Бұл туралы облыстық білім басқармасы басшысының міндетін атқарушы Бағдат Бердаулетов хабарлады.

Мектепке дейінгі ұйымдарда білім беру ісін жаңа сапалық деңгейге көтеру міндеті – бүгінгі күннің өзекті мәселесі. Бүгінде өңірдегі 439 жекеменшік балабақшада 29868 бала тәрбиеленуде. Аталған ұйымдардың 52 пайызы ауылдық жерде орналасса, 48 пайызы қалалық және аудан орталықтарында жұмыс істеуде. Жоғарыда аталған сандық мәліметтерден-ақ облыстағы 1-6 жас аралығындағы балаларды мектепке дейінгі ұйыммен қамтуда жекеменшік балабақшалардың үлесінің айтарлықтай екендігін көруге болады.

– Биыл бір балаға арналған мемлекеттік тапсырыс көлемі қалалық жерде 9 сағаттық топтар үшін – 47,4 мың теңге. Сонымен қатар жаңа оқу жылында облыстағы 311 мектепте 180 мыңнан астам оқушы білім алады деп жоспарлануда. Оқушылар саны өткен жылмен салыстырғанда 4087-ге артатын болады,- деді облыстық білім басқармасы басшысының міндетін атқарушы Бағдат Камбозұлы.

Қызылорда облыстық білім саласында сапаны қамтамасыз ету департаментінің басшысы Ғалия Дәулетова да мектепке дейінгі білім беру ұйымдарын лицензиялауға байланысты бірқатар мәселелерді түсіндірген болатын. Айтуынша, лицензия алу кезінде мектепке дейінгі ұйымдар мемлекеттік, сондай-ақ жеке меншік ұйымдар үшін бірыңғай ең төменгі біліктілік талаптарына сәйкестігін растауы тиіс.

– Оқу-ағарту министрлігі мектепке дейінгі ұйымдарда лицензиялауды енгізу бойынша тиісті жұмыстарды бастады. Ең алдымен заңнамада белгіленген тәртіппен енгізілетін лицензиялаудың талаптарына талдау жүргізіледі, содан кейін тиісті заң жобасы әзірленеді. Яғни, лицензиялауға қойылатын бастапқы талаптар нарықтың нақты шарттары мен мүмкіндіктерін ескеретін болады. Қазіргі уақытта басты мәселе – мектепке дейінгі білім беру сапасы. Әрине, лицензиялау сапаны қамтамасыз етудің жалғыз жолы емес. Министрлік сапаны қамтамасыз ету бойынша бірқатар шаралар кешенін қабылдауда және лицензиялау – сол шаралардың бірі. Қазіргі таңда мектепке дейінгі білім беруді кезең-кезеңімен лицензиялау жоспарлануда,- деді облыстық білім саласында сапаны қамтамасыз ету департаментінің басшысы Ғалия Ноғайқызы.

Білім – болашақтың бағдаршамы. Ал, бала шақтан болашаққа сәтті қадам басқасы келетін білімгерлер өз жолынан жаңылыспай, білім биігі мен белесінен бой көрсетеді деп сенеміз.

Айдар САЙЛАУОВ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған