Қызылорда облысында 2 Ұлы Отан соғының ардагері тұрады. Қазалы және Сырдария аудандарының дәрігерлері қос қарияның денсаулығын үнемі бақылайды. Бүгін ардагердің үйіне ақ халаттылар арнайы барып, медициналық тексерістен өткізді. Ардагерлер медицина саласы қызметкерлеріне алғыстарын айтып, ақ батасын берді.
Ұлы Отан соғысының ардагері Яхия Тасыров 1922 жылы Қызылорда облысы Тереңөзек ауданы, Қараөзек елді мекенінде дүниеге келген. Ташкенттегі тоқымашылар оқуын оқып, 1940 жылы тоқыма фабрикасына мастердің көмекшісі болып жұмысқа орналасқан. 1941 жылдың аяғында Ташкент облысы Фрунзе аудандық әскери комиссариатының шақыруымен әскерге алынған. Омбы қаласында алғашқы әскери дайындықтан өтіп, 1942 жылдың қазан айында майданға жіберілген. Соғыс жылдарында Сталинградты, Курскіні, Барановты, Польшаны жаудан азат етуге қатысқан. Данцинг портында аяғынан ауыр жараланған. Соғысты Германияда аяқтап, 1945 жылы қыркүйек айында елге оралған. «Қызыл жұлдыз» орденімен, «Ұлы Отан соғысы» І, ІІ дәрежелі ордендерімен, «Ерлігі үшін», «Германияны жеңгені үшін», Ұлы Жеңістің 40, 50, 60 жылдығы медальдарымен марапатталған.
Сырдария ауданының «Құрметті азаматы», ардақты ардагер жас ұрпаққа патриоттық тәрбие беру мақсатында ауданда өткізілетін барлық іс-шараларға қатысып, жас ұрпақтың тәлім-тәрбиелі болуына өз үлесін қосып келеді.
Ұлы Отан соғысының ардагері Тілеуберген Тобабергенұлы 1924 жылы Қазалы ауданы, Жамбыл колхозында дүниеге келген. 1942 жылы Отан алдындағы борышын өтеуге шақырылған бозбала Ташкент қаласында әскери дайындықтан өтеді. Мәскеу іргесіндегі Смоленск қаласына әскери эшелонмен келіп, 150-зеңбіректі атқыштар полкінде қолына қару ұстап, майдан даласындағы ұрыстарға қатысқан. Бір жылдан кейін 291-атқыштар полкі құрамына жіберіліп, Белоруссияны, Польшаны, Чехословакияны, Кинигсберг, Калининград қалаларын жаудан азат етуге қатысқан. Маршал Г.Жуков басшылық ететін 158 гвардиялық полктің 28-ші автомат ротасы сапында Отан алдындағы борышын өтеп, бірнеше рет батылдығымен көзге түсті.
Қатардағы жауынгер 1945 жылдың 9 мамырында Ұлы Жеңіс күнін Берлин қаласында қарсы алып, соғыстан кейін неміс-фашист басқыншыларының тұтқынға алынған жауынгерлерін күзетуге қалдырылған. Туған жерге 1947 жылғы тамыз айының аяғында елге оралғаннан бастап зейнет жасына дейін теміржол саласында абыройлы қызмет еткен.
Қарт майдангер І дәрежелі «Отан соғысы» орденімен, «Берлинді азат еткені үшін», 1941-1945 жылдардағы Ұлы Отан соғысында «Германияны жеңгені үшін», «Жуков» медалімен, «Беларуссияның неміс-фашист басқыншыларынан азат етілгеніне — 60 жыл», «Ұлы Отан соғысындағы қажырлы еңбегі үшін», «СССР Қарулы Күштеріне –70 жыл» және Ұлы Жеңістің 20,25,30,40,50,60,65 жылдығы, «Еңбек ардагері» медальдарымен марапатталған. «Қазалы ауданының құрметті азаматы».
Биыл Ұлы Отан соғысындағы Жеңіске 80 жыл толады. Жеңістің 80 жылдығына орай облыста бірқатар іс шаралар аталып өтеді.
