Бұқаралық ақпарат құралдары қызметкерлері күні жақындағанда осы күннің мәнін ашу үшін шаралар ұйымдастырылып жатады. Әдетте журналистермен билік өкілдері кездесетін, ұсыныстарына құлақ тосатын. Ол үрдістен облысқа Қырымбек Көшербаев келгенде айырылып қалдық. Дегенмен облыс әкімі Қуанышбек Ысқақовпен бір рет кездесіп үлгіріппіз. Одан кейін Гүлшара Әбдіхалықова ақпарат құралдары қызметкерлерін жиып, жасалып жатқан жұмыстар жөнінде баяндаған, сұрақтарға жауап берген еді.
Қазір жергілікті журналистер жан-жаққа қарап қалды. Осындай сәтте өзге партиялардан бұрын Жалпыұлттық социал-демократиялық партиясы Қызылорда облыстық филиалы төрағасы Нұрбек Дәуренбеков жергілікті журналистерді шақырып, медиа саласындағы өзекті мәселелер бойынша ортаға сауал тастап, дөңгелек үстел басына жиналғандар талқыладық. Кей партиялар секілді, «мені мақтадың, сол себепті сені шақырамыз» деп, басқосуды есепке құрмайды. Ортақ тақырып, ортақ мәселе, ортақ мүдде.
Аймақтағы тілшінің көтерген мәселесі шын мәнінде биліктің күн тәртібіне шығуы үшін алдымен оның үні сол билікке жету керек. Ал, қазір сол үн – әлсіз, кейде өлімші күйде. Себебі оны біріктіріп тұрған алаң жоқ, қолдайтын орта жоқ, жеткізетін жүйе жоқ. Осы түйткілдерді ашық қозғау үшін жиынға өңірдегі белді басылымдар мен телеарналардың бас редакторлары, республикалық ақпарат құралдарының аймақтық тілшілері қатысты.
Жиынның ашылуында сөз алған ЖСДП Қызылорда облыстық филиалының төрағасы Нұрбек Дәуренбеков қазіргі медианың ахуалына тоқталып, бұл басқосудың басты мақсаты өңірлік журналистиканың шынайы проблемаларын ашық айту және оны шешудің нақты жолдарын бірге ойластыру екенін атап өтті. Оның айтуынша, аймақтағы интернет-журналистиканың дамуына техникалық және материалдық базаның әлсіздігі, контент сапасының біркелкілігі, кәсіби даму мүмкіндіктерінің жетіспеушілігі және тәуелсіз медиажобаларға қолдаудың жоқтығы кедергі болып отыр екен.
– Біз бұл мәселелерге бейжай қарай алмаймыз. Аймақтағы журналистер үшін жүйелі оқыту курстарын ұйымдастыру, цифрлық медианы дамытуға арналған бірлескен жобалар жасау, редакциялар арасында ынтымақтастықты арттыру, сондай-ақ тәуелсіз бастамаларға құрылымдық қолдау көрсету бүгінгі күннің нақты қажеттілігіне айналып отыр. Жергілікті журналистиканың дамуы үшін нақты қадамдарға баруға, әріптестік орнатуға және бірге жұмыс істеуге дайынбыз, – деді Нұрбек Сағатұлы.
Бізде ақпаратты уақытылы алу мәселесі күн тәртібінен түспей тұр. Журналист сұрау салғанда ақпаратты беру заңмен нақтыланған. Алайда облыстық басқармалардың БАҚ-пен тікелей жұмыс жасайтын баспасөз хатшылары немесе соның жұмысы жүктелгендер ақпаратты журналистерге дер кезінде бермейді, негізсіз созбалаңға салады. Тіпті, арасында қайбір басқарма басшысына «арқа сүйеп», журналистерге жауап бермейтін «мықты хатшылар» да бар. Негізсіз жауап бермеу — заң бойынша жауапкершілікке тартылуы тиіс. Ал, созбалаңға салынған ақпарат ескіреді, құны жойылады. Ол мемқызметкерлер үшін қолайлы. Осы жөнінде дөңгелек үстел басында әңгіме болып, алдағы уақытта жұмысты бір жүйеге қою үшін жергілікті билікке хат жолдау жөнінде бір шешімге келдік.
Тек ақпарат алуға қатысты емес, журналистің әлеуметтік мәселелері, яғни жалақысы, баспанасы, мәртебесі де назардан тыс қалмауы керек екені көтерілді. Салада қаржылай тұрақтылық жоқ. Егер жастар еңбегінің әділ бағаланатынына сенсе, олар да осы саладан орын алар еді.
Тағы бір мәселе, дәстүрлі БАҚ-та ашық сыни материалдар жариялауға кедергілер бар екені, ал қоғам үшін маңызды тақырыптарды терең қозғаған жағдайда тосқауылдарға тап болатын жайттар қозғалды. «Әкімдікке жиналып алып, ода айтатын заман кетті, бізге шындықты айту еркіндігі керек» деді жиналғандар.
Отырыста «Масс-медиа» туралы заңның шикі тұстары сөз етілді. Заңға өзгерістер мен толықтырулар енгізу жайы қозғалды. Ол үшін социал-демократиялық партиясынан сайланған депутаттармен кездесу ұйымдастыру филиал төрағасына ұсынылды. Ол бұл ұсынысты қолдап, алдағы уақытта жергілікті БАҚ өкілдерін партия атынан сайланған депутаттармен кездестіруді қолға алатын болып келісілді.
Тіпті филиал төрағасы журналистер кездесіп, ой-пікірлерін ортаға тастап тұру үшін филиалдың есігі айқара ашық екенін айтып қалды.
Сең қозғалған секілді. Енді алдағы уақытта журналистің құқығына кері әсер ететін, «Масс-медиа туралы» заң талаптары бұзылатын жайттар орын алып жатса, Жалпыұлттық социал-демократиялық партиясы қолдау көрсетпек. ЖСДП Қызылорда облыстық филиалының төрағасы Нұрбек Сағатұлы барлық пікірлер мен ұсыныстарды қағазға түсіріп, келешекте нақты бастамаларға ұласатынын, айтылған ұсыныстар жиын қорытындысымен хаттамаға тіркеліп, алдағы жұмыс бағыттарының негізіне айналатыны айтылды.
Н.Көбегенұлы
