Жол-патрульдік полициясының жұмысын жеңілдетіп, заңсыздықты дер кезінде анықтайтын камералар қалада жетіп артылады. Төбеден төніп тұрған құрылғының көмегімен тәртіп сақшылары құқық бұзушылыққа жол беріп, жүгенсіз кеткен жүргізушілерді тәубесіне келтіріп, тәртіптік шара көруде. Сондай-ақ, құрылғы көмегімен аса ауыр қылмыстық істерде ашылып, қылмыскерлердің әрекеттері әшкереленуде.
Соңғы бір аптада қалалық Полиция басқармасының Жедел басқару орталығында полицейлер тәулік бойы жұмыстарын атқару нәтижесінде 423 құқықбұзушылықты анықтаған. Оның ішінде ҚР Әкімшілік құқық бұзушылық кодексінің қауiпсiздiк белдіктерiн немесе мотошлемдердi пайдалану жөніндегі талаптарды сақтамау, көлiк құралын басқару кезiнде жүргiзушiнiң телефонды не радиостанцияны пайдалану, жаяу жүргiншiлерге немесе жол жүрiсiнiң өзге де қатысушыларына жол беру талаптарын орындамау секілді бірнеше бабын басшылыққа алып, әкімшілік хаттама толтырылған. Одан бөлек бір аптада 102 нөмірне 738 хабарлама келіп түскен.
ҚР Қылмыстық кодексінің 200-бабы («Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу») және 296-бабымен («Есірткі, психотроптық заттармен, сол тектестермен өткізу мақсатынсыз заңсыз жұмыс істеу») бойынша 4 қылмыс ашылған.
– Біздің орталық өз жұмысын ешқашан кідірткен емес. Сондықтан Қызылорда қаласы тұрғындарының тыныш ұйқысы мен қоғамдық қауіпсіздікті қамтамасыз ету мақсатында өз жұмысымызды одан әрі де жалғастыра береміз деп сеніммен айта аламын,- дейді Қызылорда қалалық Полиция басқармасының Жедел басқару орталығының бастығы, полиция майоры Берікбол Жалғасұлы.
Осы ретте айта кету керек, жаңа жылдан бастап айлық есепкіш көрсеткіштің (АЕК) мөлшері 148 теңгеге артып, 1 АЕК 2269 теңгеге жетті. Осыған байланысты жолда жүру ережесін бұзғаны үшін салынатын айыппұл мөлшері артты.
Еліміздегі жолда жүру ережесін бұзып, көлікті мас күйінде басқарғаны үшін салынатын ең жоғарғы айыппұл мөлшері жарты миллион теңгеге жуық. Ол 200 АЕК-ті құрайды, яғни 453800 теңге. Сондай-ақ, аяғы ауыр келіншектер мен зейнеткерлер сынды әкімшілік арест қолданылмайтын тұлғалардан өзге азаматтар 3 жылдан 5 жылға дейін жүргізуші куәлігінен айырылады.
Одан кейінгі ірі айыппұл көлемі – 50 АЕК, яғни 113450 теңге. Ол көлікті тоқтатқан кездегі ережелерді бұзғаны үшін және мүгедектерге арналған көлік тұрақтарына көлігін қойған азаматтарға салынады. Былтырғы жылы аталған айыппұл мөлшері биылғыдан 7,5 мың теңгеге төмен еді.
Көлемділігі жағынан үшінші орында жылдамдықты 40 км/сағаттан асырған жолаушыларға салынатын айыппұл тұр. Мөлшері – 30 АЕК (68070 теңге). ІІМ әкімшілік полиция комитеті бастығының орынбасары Талғат Мұсақановтың айтуынша, бүгінде жол қиылысындағы камералар саны артып, 1772-ге жеткен.
Елдос Асан
