«Денсаулықты – зор байлық» дейміз. Себебі, деннің сау болуы – қымбат қазынадан да құнды, бар асылдан да ардақты. Әсіресе, балалардың денсаулығы алаңдаушылық тудырмағаны абзал. Өскелең ұрпақтың денінің сау, ауру-сырқаудан азат болғаны маңызды. Өйткені, қоғамның қалыптасып, дамуы балалармен тығыз байланысты болса, елдің үмітін ақтап, еркіндікке құлаш сермейтін де кішкентай бүлдіршіндер. Әсіресе, қазір түрлі белгілі, белгісіз аурудың қаптап кеткен тұсында балаларға қауіп төнбеуі тиіс. Осы ретте, білікті мамандардан ата-аналарға кеңес берілсе, ем-дом шаралары жүргізілсе, сырқаттың салдары анықталса, аурудың алдын алуға болады.
Өткен аптада облыстық денсаулық сақтау басқармасының ұйымдастыруымен «Aray City Mall» ойын-сауық орталығында «Барлық мейірім балаларға» ұранымен ашық есік күні өткізілді. Аталған шарада арнайы мамандар онко-гематолог, эндокринолог, хирург, невролог, педиатр, гастроэнтерологтар қызмет көрсетті. Толассыз кезекті тосып отырмай, келген балалар кезексіз, тегін тексерістен өтіп, ақ халаттылардың керекті кеңесін алды. Негізі ашық есік күнінің өткізілуі жөнінде әлеуметтік желіде хабарландыру жарияланған болатын. Содан болар, көпшілік орталыққа жиылып, арнайы мамандардың қабылдауында болды. Тіпті, балаларын жетектеп, алыстан ат арылтып келген ата-аналар да табылды. Себебі, «тексерілеміз» деп тіркеліп, одан кезек күтіп уақыт жоғалтқанша, осындай ұйымдастырылған денсаулық акциялардың негізінде қаралуды дұрыс санаған секілді. Біз сала мамандарына «Неліктен тек осы тар буынды 6 маман ғана қарастырылған, әлде облыста осы санаттағы аурулар көп тіркелген бе?» деген сауал қойдық. «Балалар арасында бұл салалар бойынша ауру көп тіркелген жоқ, дегенмен олар аса қажетті мамандар болғандықтан, кеңес беру акциясын өткіздік. Шағымдар тыңдалып, кеңес беріліп, аймақтық дәрігерлеріне жіберіледі. Әрі қарай қосымша тексерістерден өткізеді» деді облыстық денсаулық сақтау басқармасы басшысының орынбасары Мая Мирзанова.
М.Миранбайқызының айтуынша, осы күнге дейін әр аудан бойынша ашық есік күні өткізіліп келген. Мұндай ашық есік күндері алдағы уақытта да жалғасып, кезең-кезеңімен өткізіліп тұрады. Енді облыс деңгейінде аудандарда ұйымдастырылады екен. Арнайы мамандар 3 сағаттың ішінде 203 баланы қабылдап үлгерген. Яғни, педиатр 29, гастроэнтеролог 39, эндокринолог 18, онко-гематолог 34, хирург 31, неврапатолог 52 баланы қараған. Әсіресе, көп келген балалар қатары 5 жасқа дейінгі бүлдіршіндерді құраған. Шарада балаларға тек кеңес беріліп, тексеріліп ғана қоймай, аниматорлар балақайлардың көңілін аулап, жүздеріне күлкі ұялатты. Сондай-ақ, сыйлықтар да табысталды. Егер бала денсаулығы осылай бақыланып тұрса, еш қатердің туындамайтыны хақ.
Замира ҚОНЫСЖАН
