Ескі жыл есіркемесе, жаңа жыл жарылқай ма?

Күнтізбе бойынша 2024 жылдың алғашқы аптасы басталды. Бір сәт өткен жылға қарап, не тындырғанымызды ой елегінен өткізетін үрдіс бар. Әр облыс әкімі жан-жағына қарап, өңір тұрғындарының алдында есеп беруге дайындалады. Кеткен кемшіліктер болса, сабақ алуға тырысады. Осындай дайындықты Қызылорда облысы бастап кеткен тәрізді. Жыл басталған сәтте облыс әкімі Нұрлыбек Нәлібаевтың төрағалығымен 2023 жылғы бюджет қаражатын игеру нәтижесі бойынша мәжіліс өтті.

Аймақ басшысы ә дегеннен бөлінген қаржыны толық игермеген мекемелерді сынға алды. «Бюджет қаражатының сапалы игерілуі өткен жылы ай сайын тұрақты қаралды, тиісті тапсырмалар да берілді. Дегенмен, 2023 жылдың қорытындысында облыс бюджетінің игерілуі 99,3%-ды құрады. Мен барлық облыстық мекеме басшыларына, аудан, қала әкімдеріне бюджет қаржысының тиімді жоспарлануына, пайдаланылуына қатысты қатаң талап қойылатынын ескерттім. Бюджеттің әр тиынының сұрауы бар. Дегенмен, кейбір бюджеттік бағдарлама әкімшілері және әкімдіктер жұмысты дұрыс үйлестіре алмады», – деді Нұрлыбек Машбекұлы.

Аймақ басшысы қаржының толық игерілуін қамтамасыз ете алмаған басқарма басшылары мен қала, аудан әкімдері жағдайды баяндап, қабылданған шаралар туралы ашық айтты. Көрсеткіші нашар мекемелердің жұмысына орынды сын айтып, кемшіліктерді шұғыл арада түзетуді міндеттеді. Мәселен, республикалық бюджеттен бөлінген 120,8 млн теңгені игермеген облыстық энергетика және тұрғын үй-коммуналдық шаруашылығы басқармасына биылға қаржының қайта бөлінуін қамтамасыз етіп, жоспарланған жұмыстарды аяқтау тапсырылды. Ұлттық қор қаржысы есебінен 247,3 млн. теңгені, республикалық бюджеттен бөлінген 32,4 млн. теңгені игермеген Қызылорда қаласы әкімдігінің көрсеткіші өте төмен. Қаржыны игеруде межені жеткілікті орындамаған Арал ауданы әкімдігіне де ескерту жасалды.

Мәжіліс соңында облыс әкімі жыл қорытындысымен республикалық бюджеттен бөлінген игерілмеген қаржыны биыл толық пайдалану үшін министрліктермен тиісті жұмыс жүргізуді, басталған қаржы жылының ай сайын жоспарланған қаражатының толық игерілуін қамтамасыз етуді тапсырды. Тиісінше бірқатар басқарма басшылары ауыстырылып, оларға жауапты қызметте істерін тиянақты орындалуын тапсырды.

Министрліктердің атауы өзгеруіне байланысты Қызылорда облысының дене шынықтыру, спорт және туризм басқармасы құрылып, облыс әкімінің өкімімен жаңа басқарма басшысының міндетін атқарушы орынтағына Жанмұрат Жақсымұратұлы Сейілов отырды.

Н.Меңдібай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған