1 қаңтардан бастап мемлекеттік жәрдемақылардың барлық түрлері және базалық зейнетақы төлемі Ұлттық банкі айқындайтын инфляцияның болжамды деңгейіне сәйкес 7%-ға, ынтымақты зейнетақы 9%-ға, яғни инфляция деңгейінен 2% — ға артпақ.
Еңбек және халықты әлеуметтік қорғау министрлігі өкілдерінің айтуынша, зейнетақы төлемдері жасына және еңбек сіңірген уақытына байланысты жыл сайын республикалық бюджет туралы заңда тиісті қаржы жылына белгіленген мөлшерде көтерілетінін айтып отыр.
«Әлеуметтік-экономикалық даму болжамына сәйкес, 2024 жылға арналған инфляция деңгейі 6-8 пайыз дәлізде көзделетінін ескере отырып, «2024-2026 жылдарға арналған республикалық бюджет туралы» заң жобасында жасына және еңбек сіңірген жылдарына байланысты зейнетақы төлемдеріне бағытталған қаражат олардың мөлшерінің 2024 жылғы 1 қаңтардан бастап 9 пайызға өсуін ескере отырып көзделеді»,- делінген министрлік хабарламасында.
Сондай-ақ, «Бюджет туралы» заң жобасында 2024 жылы ең төменгі зейнетақы 57853 теңге, ал базалық зейнетақы төлемінің ең төменгі мөлшері 28215 теңге болады» деп көзделгені айтылған. 2024 жылы жасына байланысты зейнетақы төлемдерінің ең жоғары мөлшері 152295 теңгеге жетпек.
Бұдан басқа, Мемлекет басшысының тапсырмасы бойынша 2023 жылдан бастап бес жыл ішінде ең төмен базалық зейнетақыны ең төмен күнкөріс деңгейінің 70 %-на дейін, ең жоғары – 120 %-ға дейін жыл сайын кезең-кезеңімен арттыру жүзеге асырылмақ. Мәселен, 2024 жылғы 1 қаңтардан бастап базалық зейнетақының ең төмен мөлшері ең төмен күнкөріс деңгейінен 60 %-дан 65 %-ға дейін өсті, бұл 28215 теңгені құрайды. Ал, ең жоғары мөлшері ең төмен күнкөріс деңгейінен 100-ден 105 %-ға дейін арттырылып, 45578 теңге болмақ.
2024 жылғы 1 қаңтардан бастап мемлекеттік жәрдемақылардың ұлғаюы өзге де жәрдемақыларға әсер етпек. Мәселен, 1, 2, 3 баланың тууына берілетін жәрдемақы 131100 теңгеден 140296 теңгеге дейін, 4 және одан да көп бала тууына берілетін жәрдемақы 217350 теңгеден 232596 теңгеге дейін ұлғаймақ. Балалар санына байланысты көпбалалы отбасыларға берілетін жәрдемақы да көбеймек. 4 баласы бар отбасылар үшін 55304 теңгеден 59183 теңгеге дейін, 10 баласы бар отбасылар үшін 138000 теңгеден 147680 теңгеге дейін ұлғаймақ.
I топ мүгедектігі бар адамдарға арналған жәрдемақы 89248 теңгеден 95496 теңгеге дейін, II топтағылар үшін 71398 теңгеден 76397 теңгеге дейін, ал III топтағыларға 48681 теңгеден 52089 теңгеге дейін көбеймекші.
Сондай-ақ, Мемлекеттік әлеуметтік сақтандыру қорынан асыраушысынан айырылу және еңбекке қабілеттілігінен айырылу бойынша төлемдер 7%-ға ұлғайтылып отыр екен. Аталған төлемдер міндетті әлеуметтік сақтандыру жүйесіне қатысушыларға бюджеттен берілетін мемлекеттік жәрдемақыларға қосымша жүзеге асырады. Төлемдердің мөлшері жеке-жеке және соңғы 2 жылда МӘСҚ-ға әлеуметтік аударымдар жүргізілген орташа айлық табыс, еңбекке қабілеттілігінен айырылу коэффициенттері, асырауындағы адамдар саны, міндетті әлеуметтік сақтандыру жүйесіне қатысу өтілі және табысты алмастыру жағдайына байланысты болады.
Е.Асан
