Әлеуметтік салада 311 сыбайлас жемқорлық қылмысы тіркелген

Апта басында Мәжілістің Әлеуметтік-мәдени даму комитетінде әлеуметтік саладағы сыбайлас жемқорлыққа қарсы іс-қимыл мәселелері бойынша тақырыптық отырыс өтті. Жиынға комитет төрағасы Асхат Аймағамбетов жетекшілік етті.

Сыбайлас жемқорлыққа қарсы іс-қимыл агенттігінің Превенция қызметінің басшысы Саян Ахметжанов әлеуметтік блокқа бюджеттен миллиардтаған қаржы бөлінетініне тоқталды. Биыл бұл сома 8,8 трлн. теңге, былтыр 8,1 трлн. теңге болған. Дегенмен тиісті бақылау мен ашықтықтың болмауынан сыбайлас жемқорлық азаймай отыр. 2023 жылы әлеуметтік салада 311 сыбайлас жемқорлық қылмысы тіркелген.

Отырыс тақырыбы бойынша Денсаулық сақтау вице-министрі Вячеслав Дудник, Ғылым және жоғары білім вице-министрі Талғат Ешенқұлов, Туризм және спорт вице-министрі Мирас Төлебаев, Еңбек және халықты әлеуметтік қорғау вице-министрі Ақмәди Сарбасов баяндама жасады.

Баяндамаларды тыңдаған соң депутаттар жауапты мемлекеттік органдардың өкілдеріне тақырыпқа қатысты сұрақтарын қойып, әлеуметтік саладағы сыбайлас жемқорлыққа қарсы іс-қимыл бойынша ұсыныстарын айтты. Мәселен, медициналық техника құнының оның сапасына сәйкестігі, білім саласындағы қылмыстар бойынша кімдердің жауапқа тартылатыны, қоғамда жемқорлық ісі туралы өтініш қабылдау қалай жүргізілетіні, себептерімен күрес шаралары, саланы жетілдіру үшін әлемдік тәжірибені пайдалану және тағы басқа мәселелер көтерілді.

– Бүгінгі жиынға дайындық барысында біз біраз жүйелі проблеманы көрдік. Мәжілісте қазір сыбайлас жемқорлыққа қарсы заң жобасы қаралып жатыр. Оған біршама жаңа түзетуді дайындап отырмыз. Үкіметтегі әріптестерімізбен бірлесіп, осы салалар бойынша қажетті түзетулерді енгізуіміз қажет. Олар бүгінгі отырыстың нақты нәтижесі болады, – деп қорытындылады Асхат Аймағамбетов.

Б.Бек

Пікір үстеу

Э-пошта мекенжайыңыз жарияланбайды. Міндетті өрістер * таңбаланған