Қоғамдық көлік қиындығы шешімін таппақ

Бүгінде бұқара үшін басты мәселелердің бірі ауыз су мен қоғамдық көлік болып тұр. Қайткенмен де, тіршілік көзі – су екенін ескерсек, халықтың сапалы суға жарымай, сырттан сатып алып ішетіні өкінішті. Ал, көпті қажытқан қоғамдық көліктің жайы сан тарау. Бұрын жұртшылық жол ақысын сөз ететін еді. Қазір автобустың айналасында өрбитін әңгімелер тым көбейіп кетті. Кеш түссе жүрмей қалуын ақтап алғанның өзінде, таңертеңнен таппай қалып, сәске түсте жолын тосып, елеңдеп күтетіні титықтатып жіберетіні жасырын емес. Одан қалды бар адамды нығыздап жинап алып, төрт дөңгелекті тағандап жарыса жөнелетіндердің жол қауіпсіздігін ескермейтіндігі жаға ұстататын. Мұндайда көбі көз жұмып, тілін тістеп, «ұят болады» деп өзімізге салынып жағын ашпаса, енді бірі бассыздықты айтып, басшылық есігін қағып немесе жанайқайын желіге жазып жүктейді. Иә, аталған мәселелердің бар мәні қоғам һәм халықпен байланысты болғандықтан басшылық әрекет етуде барынша жұмыс жасап жатыр. Әйтеуір, берген сертін орындауға қолдан келгенін жасап әлек. Тек дегбірсіздік танытпай, әліптің артын баққан абзалырақ. Сонда ғана жылдан-жылға жыр болған мәселенің басы ашылып, бәрінің апақ-шапақ қуанатын кезі келер.

Қандай да ақпараттың анық-қанығына көз жеткізіп, сыбыстардың өзін сүзгіден өткізген әлдеқайда сенімді болар еді. Әйтпесе, әлденені қапылтып жіберетіндер, басшылықтың бастамаларын бұзып, жаңсақ пікірлердің толастауы әбден мүмкін. Әлгінде қаламызға жаңа қоғамдық көліктердің келетіні хабарланған. Енді көптің көкейіндегі күпті сұрақ пен алаң жұртты алаңдатып қойғаны «автобустардың айтылған уақытында келмеуі» боп тұр. Мұның өзі желіде талай талқыланып, өтірігі мен шындығы аралас әңгімелер қаптап кетті. Осы орайда, толассыз сауалдарға жауап беріп, мәселенің нүктесін қою үшін қала әкімінің орынбасары Ғалымжан Еркебай журналистер және қоғам белсенділерімен кездесті, әңгіменің ақ-қарасын ашып айтты. Алдымен ауыз су мәселесіне тоқталып, жағдайдың оңалатынын жеткізді.

– Екі күннен бері қаламыздағы ауыз су қысымы төмен түсіп, осыған байланысты әлеуметтік желіде бұқараның көп сауалы туындауда. Қызылорда қаласында 105 ұңғыма бар. Оның 70-і жұмыс істеп тұр. 8 ұңғыма істен шығып, жөндеу жұмыстары жүргізілуде. Бір күннің шінде қалыпқа келтіреміз деген жоспар болды. Соған қарай жұмыстар істелді. Ертең іске қосылып, ауыз су өз қалпына келеді,- деді өз сөзінде. Сондай-ақ, қала әкімі орынбасарының айтуынша, 2008-2009 жылдары Қызылорда қаласының аумағы 8 мың гектар еді. Қазір 13 мың гектарға ұлғайған. Сол себепті тиісті ұңғымалар қазылып, қаражаттар бөліну қажет. Бірақ лабораториялық тесерістер жүргізіліп тұру керек. Ең бастысы, беріліп жатқан ауыз су 100 процент таза, жерасты сулары.

Автобустардың мәселесі өзекті. Оның үстіне, оқу жылы басталғандықтан, оқушылардың мектепке уақытылы қатынауына жағдай жасалу қажет. Әйтпесе, жұмысына жете алмай асығып-аптығатын ересектерді айтпағанда, сандалып, әрлі-берлі жүгіріп жүру жеткіншектерге оңай емес. Ал, күнде таксилетіп жүруге бәрінің қалтасы көтере бермейді. Мұның барлығын басшылық біліп, қалың қауымның мұңын түсініп отыр. Сол үшін де жағдайды мейлінше тез шешуге тырысып, тырмысып-ақ жатыр.

– Қоғамдық көлікке қатысты халықтың сауалы жетерлік. Бұл туралы қосымша айтатын болсам, 1 қыркүйек күні 214 қоғамдық көлік халыққа қызмет көрсетті. Қаламызда «Қызылорда автобус паркі» және 4 жеке кәсіпкер қоғамдық көлікпен қамтамасыз етіп отыр. Десе де, автокөліктердің тозығы жеткеннен кейін интервал ұзақтығы пайда болып, халықтың наразылығын тудырды. Таңғы сағат жетіде автокөліктер қала бойынша қызмет етуге шығады. Күнделікті санын есептеп отырамыз. Мысалы, бүгін 262 қоғамдық автокөлік қаланың ішінде тұрғындарды тасымалдауда. Өздеріңіз білесіздер, қаламызға 150 автобус келетін болады. Мердігер мекеме «1 қыркүйекке дейін жеткізіп беремін» деп уәде етті. Сондықтан біз де осы ақпаратты халықпен бөліскен болатынбыз. Бірақ құжаттарға байланысты және Қытай мемлекетінен автокөліктер алынатын болған соң, уақыты шегеріліп келеді. Себебі өзге елдегі пандемияға байланысты екі ел арасында шекара жабық. Бірақ келісімшарттар жүргізіліп, жақын арада 40 автобус келеді. Жыл соңына дейін қалған автокөліктер толығымен жеткізіледі,- деді Ғалымжан Еркебай. Бұл туралы «Қызылорда автобус паркінің» басшысы Руслан Ерсұлтанұлы да баяндады. Оның айтуынша, бастапқы 40 автобус қыркүйектің аяғы немесе қазан айының басында келуі керек. Қалған 110 автобус қазан-қараша айларында келеді екен.

Кездесу барысында біраз ұсыныстар айтылып, басшылық барлығын қарастыратынын мәлімдеді. Қазір жүргізіліп жатқан жұмыстардың халық игілігіне, көпшіліктің қамы үшін екенін анық аңғаруға болады. Тіпті, шет аймақтардан қатынайтындарға жағдай жасап, автобус жүргізіп, бұқараның бабын табуға тырысуда. Сондықтан жақсылықтан күдер үзбейік, алдағы уақытта қоғамдық көліктердің мәселесі шешіледі, жергілікті тұрғындардың қажеттілігі қанағаттандырылатын болады.

Замира ҚОНЫСЖАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған