АҚЖОЛТАЙ ЖАҢАЛЫҚТАР АРАЛ АУДАНЫНДА

Арал айдынын айнала мекен ететін аңыз бен абызға, өнер мен өнегеге, бақ пен бағдат өмірге малшынып отырған, қарғын ғұмырлы, тарғын тұғырлы, атан-қотан бір қауым текті ел бар. Теңіз табаны тамырланып, тілім-тілім сорға айналы кетіп жатса да, малы бағына, балығы бабына келіп тұрған атажұрт бұл. Аралға барсаң, көшеде қалып қайыр сұрап жүрген жанды көрмейсің. Осындай қайырлы мекенге қара теңізі де қайырылып келер күн туар. Оған дейін аралдықтар туған топырағын, жуалы жусанын, телегей теңізін тастап кетпек емес. Керісінше, жоқтан бар құрап, арқырап, барды бағалап, бағалысын қадірлеп келеді.

Аудан қазір дамудың жарқын жолына өз соқпағын салып, ұрпаққа теңіз толқынында туған жұрттың тектілігін танытып келеді. Қанында қасиеттің қайнары тулаған халыққа облыс әкімі Нұрлыбек Нәлібаев арнайы барып, қарға тамырлы қазақты ақжолтай жаңалығымен қуантып қайтты.

оқушылар енді жаңа мектепте білім алады

Аралдағы қауіпті мектеп жабылып, жаңасы бой көтерді. Иә, Қызылорда өңірінде су жаңа мектептер мен балабақшалар желісі көбеюде. Арал ауданына жұмыс сапарымен барған облыс әкімі Нұрлыбек Нәлібаев ел ағаларымен бірге бірқатар әлеуметтік нысандарды ашты.

Аймақ басшысы алдымен бүгінге дейін апатты деп танылған мектептің орнына жаңадан салынған №71 орта мектебіне барып, оқушыларға игі тілегін арнады. Апатты мектеп қауіптілігімен бірнеше жылдан бері ел ішінде өзара айтылып жүр еді. Бұдан бұрын облыстық қоғамдық кеңестің мүшесі Нұрлан Нұрмаханов ауданға сапарында орта мектептің құлағалы тұрған кейпін көріп, қоғамдық кеңестің алаңында алдағы уақытта білім ошағының орнына жаңа мектеп салыну керектігін айтқан болатын. Сол мезетте облыс әкімінен қолдау тауып, құрылыс жұмыстары басталып кеткен-ді. Міне, енді, жұмыстар аяқталып, жаңа мектеп пайдалануға берілді. Бұл бүлдіршіндер үшін зор қуаныш, үлкен сый екені даусыз.

– Мемлекет үшін де, адам үшін де бала өмірінен қымбат байлық жоқ. Сондықтан да, өткен жылы мектеп ғимаратының құрылысы басталып, өз уақытына сай жаңа оқу жылында пайдалануға берілді. Осы кезге дейін №71 мектеп-интернатының ескі мектеп ғимараты апатты деп танылып келді. Енді ол қауіп жойылды. Білім жолында еңбекқорлықтың өлшеусіз үлгісін көрсетер ұстаздар қауымының ұрпақ тәрбиелеу ісіндегі еңбектеріне сәттілік тілеймін,- деді Нұрлыбек Нәлібаев. Өңірде апатты деп танылған 4 мектептің 3-еуінің биыл шешімі табылып, оның екеуі қыркүйек айының ішінде табысталатыны аймақ үшін жағымды жаңалық.

Сөзімізге дәлел, Аралдағы Тоқабай елді мекенінде пайдалануға жарамсыз деп танылған №248 орта мектеп жеке инвестор есебінен қайта салынуда. Мектеп ұстаздары тәрбиелеген шәкірттері оған лайықты. Тоқабай ауылындағы 11-сынып оқушыларының барлығы биыл мемлекеттік грант иегерлері атанды.

Мұнан бөлек, алдағы 3 жылда Арал ауданының өзінде 8 мектептің құрылысы жүргізіліп, жаңа нысандар бой көтермек. Оның ішінде, асарлату әдісімен салынған Сапақ ауылдық округіндегі №69 орта мектеп пен Мергенсай елді мекеніндегі №58 орта мектебі келесі жылы салынатын мектептер тізімінде тұр.

Тізбелесек, Сыр елінде алдағы 3 жылда 32 мектеп салынбақ. Иә, бұл өз кезегінде Мемлекет басшысының жолдауынан туындаған тапсырмалардың орындалуына сай келіп тұр. Ендеше бүгінгі балалар үшін жасалып жатқан барлық шаралар – болашақ үшін, ұрпақ үшін құйылып жатқан инвестиция екендігі айтпаса да түсінікті. Ал, келешегі жарқын баланың еліне адал қызмет етері сөзсіз.

«Асылымның» ашылуы бүлдіршіндерді қуантты

Балабақшасы бар ауыл мен кенттер енді алаңсыз балаларын ауылда тәрбиелей берсе болады. Бұрындары ауылда спорт зал жоқ, балабақша жоқ, жоқ-жоқтар айтыла беруші еді. Қазір ауылдардың өзі қарап тұрсаңыз, қалаға айналып бара жатыр. Осы ретте, Қызылорда облысының әкімі Нұрлыбек Нәлібаев Аралға сапары барысында Жақсықылыш кентіндегі «Асылым» жеке балабақшасының ашылу рәсіміне қатысты. Жаңадан бой көтерген нысан 140 бүлдіршінге лайықталған. Облыс әкімі ауыл тұрғындарын жаңа нысанның ашылуымен құттықтап, білім саласына инвестиция құйған кәсіпкерге алғыс білдірді.

Бүгінде Арал өңірі – 3 пен 6 жас аралығындағы бүлдіршіндердің балабақшамен 100 пайыз қамтыған ауданның бірі. 2025 жылға қарай ауданда 16 жеке балабақша және 4 мектеп жанынан шағын орталық ашылу жоспарда. Бұл жұмыстар толығымен бітсе, аралдықтарда балабақша мәселесі түбегейлі шешіледі. Әрбір шаңырақтың анасы баласын бөбекжайларға беріп, тұрмысын түзеуде өздері жұмыс жасай алуға мүмкіндіктері туады.

Шөміште спорт қазаны қайнамақ

Талай талантты дарабоз спортшылар ауылдан шыққанын білеміз. «Ауылдың баласы» деген сөздің өзі бренд. Қарақұрым түліктің жайын жасап жүрген қарадомалақ баланың қара күш иесі атанып шығуы әп-сәтте. Сол үшін де ауылдағы балаларды спортқа баулу ең дұрыс шешім. Осыған орай, Нұрлыбек Нәлібаев Аралқұм ауылдық округі, Шөміш елді мекеніндегі «Латон-Маркет» ЖШС-ның демеушілігімен салынған әмбебап кіші спорт кешенін, ойын алаңын көріп, ауыл тұрғындарымен кездесті.

– Балаларға тарту ретінде өңірде парктер, скверлер салынуда. Жақында ғана Жаңақорғанда меценат 750 миллион теңгеге парк салу ісіне белсене кірісті. Ал, демеушілердің қолдауымен қалада 50, аудандарда 30 балалар алаңы бой көтереді. Тағы бір жанашыр азамат 1,5 миллиард теңгеге «Анаға тағзым» алаңын салып беруге ниет білдірді. Міне, осындай шағын алаңдарды балалардың игілігі үшін табыстау үлкен игілікті іс деп санаймыз,- деді Н.Нәлібаев.

Спорт алаңында 12 жас бір мезетте ойнай алады. Аумағы 800 шаршы метрді құрайтын теміртормен қапталған алаңда 6 жарықшам қойылып, газон төселген. Шара соңында спорт алаңына келген жастар облыс әкімімен тілдесті.

Аманөткелдегі келісті кешен

Спорт – жан серігі, дененің көрігі. Сол үшін де спорт десе ішер асын жерге қоятын ауылдықтар үшін ақжарма жаңалық келіп жеткен еді. Міне, осы қуанышты өңір басшысы Нұрлыбек Нәлібаев Аманөткел ауылдық округіне барып, «Ауыл – ел бесігі» бағдарламасы аясында салынған дене шынықтыру және сауықтыру кешенінің ашылу рәсіміне қатысып, елмен бөлісті.

– Спорт – ел мерейін асырып, абыройын арттыратын ауқымды сала. Өңірде «Балалар жылы» аясында демеушілердің қолдауымен 80 ойын алаңы салынуда. Арал ауданында соның бесеуі жыл аяғына дейін аудан тұрғындарының игілігіне қызмет ететін болады. Бұл кешенде байрақты бәсекелерде, Олимп шыңында көк туымызды желбіретер даңқты спортшылар жаттығып шығарына сенімдімін. Жаңа спорт ғимараты құтты болсын,- деді аймақ басшысы.

Нұрлыбек Нәлібаев спортпен шұғылдануға ниетті жастармен жүздесіп, пікірлесті. Мұнда бір мезетте 40 баланың спортпен шұғылдануға мүмкіндігі бар. Яғни баскетбол, волейбол, шағын футбол ойнай алады. Осындай денешынықтыру-сауықтыру кешені Жақсықылыш кенті мен Қамыстыбас елді мекенінде салынуда.

Құмының құны құйма алтыннан қымбат

Айдынды Арал өңірі өнер мен төрт түліктен, балықтан бөлек өндіріске де ерекше ден қойған өлке. «Құмының құны құйма алтыннан қымбат өңір» деп Аралды ауыз толтырып айтса болатындай. Арал ауданына сапары барысында облыс әкімі Нұрлыбек Нәлібаев Aral Quarts кварц құмын байыту тау-кен комбинатына барды. Жылына 120 мың тонна кварц құмын өндіретін кәсіпорын алғашқы кезеңде 40 маманды жұмыспен қамтыса, екінші кезеңде 172 мың тонна құрғақ құрылыс ұнтағын шығаруға ден қойып, 88 маман еңбекке тартылды. Өндіріс орны ішкі нарықты 80 пайыз өніммен қамтиды.

Нұрлыбек Нәлібаев шыны зауытына қажетті өнімді осы өндіріс қамтамасыз етуі керек екендігін алға тартып, комбинат жұмысын бағдарлады. Кәсіпорын айына 5500-6000 тонна өнім өндіруге қауқарлы. Қазіргі таңда 3,5 мың тонна өнім дайындалған.

Ел ырзығына айналған өндіріс тыным таппайды. Барлық уақытта жұмыс қызып жатады. Сондықтан да мекеменің табысы артып, жұмысшылардың да, жергілікті тұрғындардың да батасын алып келеді.

Қамыстыбастағы құтқару бөлімшесі

Қамыстыбас – қашаннан турист пен демалушылардың аяғы үзілмеген ауыл. Сондықтан бұл мекенде барлық қауіпсіздік шаралары сақадай сай тұруы қажет. Нұрлыбек Нәлібаев Аралдың Қамыстыбас ауылдық округінде құтқару бөлімшесінің модульдік станциясының жұмысын көрді. 9 бөлмеден тұратын бөлімшеде медициналық пункт, кезекші диспечерлік және компрессорлық бөлме қамтылған.

Аумағы 250 шаршы метрді құрайтын орталық төтенше жағдай кезінде тұрғындарға оперативті көмекті жылдам үйлестіруге мүмкіндік береді.

Облыс әкімі Нұрлыбек Нәлібаев Арал ауданындағы сапары соңында аудан әкіміне Президент Жолдауынан туындаған міндеттерді уақытылы әрі сапалы орындауды тапсырды.

Айдар САЙЛАУОВ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған