Үкімет отырысы: Тапсырмалар тиянақты орындалу керек

Үкімет басшысы Әлихан Смайыловтың төрағалығымен өткен жиында биылғы жылдың қаңтар-шілде айындағы әлеуметтік-экономикалық даму қорытындысы және республикалық бюджеттің атқарылу барысы қаралып, атқарылған жұмыстар таразыға салынды. Онлайн режимде болған отырысқа бірқатар министрлер мен барлық өңірдің әкімдері қатысты.

Жиында Ұлттық экономика министрі Әлібек Қуантыров, Ұлттық банк төрағасының орынбасары Ақылжан Баймағамбетов баяндама жасап, негізгі көрсеткіштерге тоқталды. Соның ішінде Қызылорда облысындағы жасалып жатқан жұмыстар оң бағасын алды. Айтар болсақ, Қызылорда өңірі негізгі капиталға салған инвестиция көлемі және тұрғын үйді пайдалануға берудің көлемі бойынша алдыңғы қатарға шыққан.

Әлихан Смайылов инфляцияны тежеу үшін қажетті құралдар барын, бұл ретте мемлекеттік органдар мен әкімдіктер оларды тиімді пайдалануы тиіс екенін қадап айтты.

Үкімет отырысынан кейін аймақ басшысы Нұрлыбек Нәлібаев өңірде бірқатар әлеуметтік-экономикалық көрсеткіштер төмендегенін ескертіп, сала басшыларына жиын өткізді.

– Өңдеу саласындағы өндірісті арттыру тетіктерін анықтау міндеті тұр. Құрылыс жұмыстары қалада қызу жүргізілуде. Жүргізіліп жатқан құрылыстардың статистикалық органдарда есепке алынуын қамтамасыз ету керек. Жуырда ғана барлық аудан әкімдерін жеке-жеке қабылдап, бұл мәселелер егжей-тегжейлі қаралды. Тиісті тапсырмалар берілді. Осы тапсырмалардың сапалы орындалуын қамтамасыз ету керек. Барлық аудандар мен Қызылорда қаласының әкімдеріне экономикалық өсімді ай сайын қамтамасыз ету бойынша шаралар қабылдауды тапсырамын.

Биыл пайдалануға берілуі жоспарланған әлеуметтік нысандардың мерзімінде берілуін, индустрияландыру бағдарламасы шеңберінде 2022 жылға жоспарланған жобаларды іске қосылуын қамтамасыз ету қажет. Әлеуметтік маңызы бар азық-түлік өнімдеріне бағаны тұрақтандыру бойынша жұмыстарды күшейту керек,- деді Н.Нәлібаев.

Сонымен қатар облыс бюджетінің игерілуі бойынша да атқарылған жұмыстар сөз болды. Облыс әкімі бюджет қаражатының уақытылы игеріліп, мақсатты жұмсалуын қамтамасыз ету бойынша бірқатар тапсырма берді.

Премьер-министр Әлихан Смайыловтың екінші қозғаған мәселесі оқу жылына дайындық барысы болды. Үкімет басшысы жаңа оқу жылына дайындық жұмыстары жоспарға сай жүргізілу қажет екенін айтты.

Осы мәселеге орай облыс әкімі Нұрлыбек Нәлібаев сала басшыларына тапсырмалар берді. Жаңа оқу жылында аймақтағы 295 мемлекеттік, 16 жекеменшік мектепте 182 мың оқушы білім алмақ. Осы ретте, екі апатты мектеп: Арал қаласындағы №71, Жаңақорған кентіндегі №169 мектеп ғимараттары жаңа оқу жылына тапсырылады.

Аймақ басшысы жаңа оқу жылын бастауда еш кедергі болмау қажет екенін ескертті.

– Қала, аудан әкімдеріне жергілікті жердегі барлық мәселеге жауапты екендіктеріңізді тағы да бір еске саламын. Сабақ процесі еш кедергісіз басталуы керек. Көмекке мұқтаж отбасының балаларына қажетті барлық қолдау шараларын жүзеге асырыңыздар. Бұл тек басқарманың ғана емес, қала, аудан әкімдерінің де тікелей міндеті,- деді Н.Нәлібаев.

Сондай-ақ, білім саласындағы тағы бір көтерілген мәселе – оқулықтардың жеткізілуі. Нұрлыбек Машбекұлы бұл мәселеде мектеп оқушыларына тиісті берілетін кітаптарды үлестіру жұмыстарын ерте ұйымдастыруды тапсырды.

Сонымен қатар, биылғы жылы жалпыға міндетті оқу қоры аясында ҚР Үкіметінің қаулысына сәйкес тиісті көмек түрлерін алатын арнайы санаттағы 31322 бала анықталғанын, бұған жергілікті бюджеттен қажетті қаржы бөлінгенін жеткізді.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған