Сыр елі саяхатшылар үшін қауіпті ме?!

Соңғы жылдары әлемде табиғатты тамашалауға арнайылап өзге елге баратын туристер мен саяхатшылардың саны артқан. Қазақстандықтар да елге турист тартудың түрлі амалдарын қарастыруда. Десе де, біздегі қызмет көрсету сервисі көп сыналып жатады. Анығында, өзге елден келетін туристер бірінші қызмет көрсету сапасына емес, елдің қауіпсіздігін ескереді.

Жыл басындағы қаңтар оқиғасы Қазақстанды қауіпсіз елдер қатарынан төмен қарай құлдилатқаны анық. Сол себепті, елге турист тарту үшін бастысы саяхаттаушылар үшін ел қауіпсіз болғаны маңызды.

Хош, жалпы елді былай қойғанда, туристер үшін Қызылорда қаншалықты қауіпсіз? Облыс бойынша биылғы жылдың 3 айында 972 қылмыс тіркелген. Бұл өткен жылдың үш айымен салыстырғанда 12,2 процентке төмен. Атап айтсақ, ауыр қылмыстар 7%, ауырлығы орташа қылмыстар 33,6% азайған. Бұл туралы құқықтық статистика және арнайы есепке алу жөніндегі комитетінің Қызылорда облысы бойынша басқармасының қылмыстық саладағы құқықтық ақпаратты қалыптастыру бөлімінің бастығы Қанат Жалғасов айтып берді.

– Биыл тіркелген қылмыстарды талдау барысында тонау 33,3 пайызға, зорлық-зомбылық 44,4 пайызға, ал алаяқтық қылмыс бойынша 56,8 пайызға азайды. Жалпы қылмыстың әрбір үшіншісі ұрлық қылмысы болып отыр. Сонымен қатар биыл 22 қылмысты жасыру фактісі анықталды. Бұл іс бойынша тиісті құжаттар прокуратура органдарына жолданды,- деді Қанат Аралбайұлы.

Жыл басынан бері 43209 әкімшілік құқық бұзушылық анықталған. Сәйкесінше былтырғыдан 15,6 процентке кеміген. Оның басым бөлігі уәкілетті органдармен қаралды.

– Жалпы тіркелген әкімшілік құқық бұзушылықтардың көп бөлігі полиция органдарына тиесілі. Былтырдан бастап әкімшілік рәсімдік-процес кодексі қолданысқа енгізілген болатын. Осыған байланысты «e-Өтініш» ақпараттық жүйесіне 17 мыңға жуық жеке және заңды тұлғалардан өтініш келіп түсті. Аталған өтініштердің 9893-і қаралды,- дейді Құқықтық статистика және арнайы есепке алу жөніндегі Комитетінің Қызылорда облысы бойынша басқармасының бөлім бастығы Тұрсынқожа Үсенов.

– Осы жылдың үш айында соттылықтың болу не болмауы туралы анықтама алуға 184 өтініш келді. Оның барлығы Азаматтарға арналған үкімет мемлекеттік корпорациясы арқылы келіп түсті. Архивтік анықтамаларды немесе архивтік құжаттардың көшірмелерін беру түріндегі қызметті алу үшін «Электронды үкімет» веб-порталы немесе «Азаматтарға арналған үкімет» мемлекеттік корпорациясы арқылы жүзеге асырылады,- дейді Құқықтық статистика және арнайы есепке алу жөніндегі Комитетінің Қызылорда облысы бойынша басқармасының бөлім прокуроры Дана Ахылбекова.

Сала мамандарының келтірген дерегіне сүйенсек, соңғы үш айда қылмыс саны төмендеген. Десе де, бұл туристер үшін қауіпсіз дегенді білдірмейді. Себебі, әр қылмыстың үшіншісі ұрлық болып тіркелген.

Елге туристер тартып, тұмса табиғатты одан бөлек тарихи жерлерді тамашалату үшін алдымен елдегі қылмыс санын төмендеткен абзал.

Елдос АСАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған