Ақындық қасиет екінің біріне бұйыра бермейтін бақыт, басына қона бермейтін бақ. Әсте қаламына қара өлең құйылғандар жүрек деп аталатын сезім патшалығының толқынысы мен тебіренісін, қасіреті мен қасиетін сөзбен өрнектейді. Жылулық сезсе жүрегі жібіп салатын, сұлулыққа сүйсініп өлең өретін ақын жаны қашан да терең, қашан да жұмбақ. Жалғыздықтан жабырқап құсалы болған шақта, көңіл көгіне бұлт торлап торыққан мезетте мейірімді мекен іздеп, оңашада ой бағатыны да содан. Қырық жамау жүрегінің жарасын таңып, ішкі дертін інжуге, мұңын маржанға айналдырып, шабытпен шаттығын бөлісетін ақындардың сезімді сөйлетіп, тіршілікке тіл бітіретініне талас жоқ. Өмір көріністері, беймазалық пен тыныштық ақын назарынан тыс қалмайды. Көңілге шер боп тұнғанды жүректен тұп-тұнық жыр етіп төкпелейтін сөз иелерінің өнеріне тәнті болмау мүмкін емес. Сыр елінде ақын деген ардақты атты абыроймен арқалап, сөз салмағын саралаған, адамдық аузында қасиет, ақындық болмысында өзіне тән өрлік бар өресі биік жандар жетерлік. Соның бірі – Айдар Әділжанұлы Сайлауов.
Айдар Әділжанұлы – алдыңғы буынның ізін жалғаған талантты ақын. Білім жолы М.Мәметова атындағы Қызылорда педагогикалық жоғары колледжінен басталған. Осы іргелі шаңырақта, алғашқы жыр жинағы жиырма жасында «Баспалдақ» атауымен жарық көріп, ойлы оқырманға жол тартты. Сонымен қатар, ақын Қорқыт ата атындағы Қызылорда университетін журналистика мамандығы бойынша тамамдаған. Қазіргі таңда ол республикалық «Ұстаз мәртебесі» газетінің жауапты хатшысы қызметін атқарады.
![](https://ustazmartebesi.kz/wp-content/uploads/2022/11/foto-2-kesh-1-1024x682.jpg)
Жақында лирик ақынның «Аман жүр ме екен, ауылдағы анам?!» атты шығармашылық кеші қалалық орталықтандырылған кітапханалар жүйесіне қарасты №19 кітапхананың ұйымдастыруымен облыстық Жастар ресурстық орталығында өтті. Ақын өлеңдерінен театрландырылған қойылым көптің көңілінен шығып, кейін жиналған қауым ақын туралы арнайы түсірілген видеороликті тамашалады. Өлең-жыр дегенде ішкен асын жерге қоятын поэзиясүйер қауым түрлі тақырыптағы ақын өлеңдерін құлақ түріп тыңдады.
Елге танымал сазгер Нұртуған Жаңабай мен белгілі әнші Ақтілек Көшербаев және дарынды жас өнерпаздар Қонысбек Мәлік, Күмісбек Айжарық, Нұрдәулет Сақтапберген ақынның сөзіне жазылған әуезді әндерді шырқап, Жамбыл Бақытәлі жырмен арнау айтты.
«Өлең – сөздің патшасы» дейтін болсақ, бүгін жиналған қауымға патша қызмет етті деп ойлаймын. Шығармашылық кешім көрерменге керемет көңіл сыйлаған болуы керек. Төрт қабырғада жазылып, төрт тұяғын тең басқан өлеңіміз төрткүл дүниеге тарап жатса, бұл да – маңдайдағы бағымыз. Осы күні менің сөзіме жазылған әндерді Төреғали Төреәлі, Жандос Қаржаубай, Мұхтар Ханзада, Нұртуған Жаңабай т.б. әншілер қазақ эстрадасында орындап жүр. Алдағы уақытта ауқымды жұмыстарды да жалғастыра береміз, – деді кеш иесі.
Тырнақалды туындылары талайды тәнті етіп жүрген ақынның әдеби-сазды кешіне жиналған жұрттың құрметі мен қошеметі бөлек болды. Шығармашылық кеш соңында қалалық орталықтандырылған кітапханалар жүйесінің директоры Гүлмира Рахметова мен облыстық Жастар ресурстық орталығының директоры Талғат Тілес сөз алып, лебізін білдіріп, кеш иесіне арнайы алғыс хат, сый-сияпат табыстады. «Айдар Сайлауов лирикалық бағытта да, танымды бағытта да еркін қалам сілтей алатын ақын» деп пікір білдірген Ақжол Түменбай поэзияның құдіретін де тілге тиек етті. «Поэзия мен музыка өте киелі ұғым. Себебі, ол ауа сияқты, ол бар. Біз оны тек сезбейміз бар екенін, көзге көрінбейді, қолға ұсталмайды. Егер бір күнде адамзаттан поэзия мен музыканы алып тастайтын болса, үлкен тоқырау болады. Өйткені, кез келген адамның жан-дүниесінің емі музыка немесе поэзия» деді ол. Расында да, жүрек тыныш тапқан поэзия әлемінде көптің қалғысы келгендей, әсерге толы кешті қимай тарқасты. Руханиятқа шөліркеп келген көрермен ақынның жүрекке жеткен өлеңімен сусындап, қанығып қайтты.
Замира АХМЕТ