Мамыр айында Қызылорда облысының әкімі Нұрлыбек Нәлібаев Сеул Ұлттық Ғылым және технологиялар университетінің президенті Ли Донг Хун мырзамен кездесуде Президентіміздің Қазақстанда жетекші шетелдік жоғары оқу орындарының филиалдарын ашу туралы тапсырмасына орай Қызылорда қаласында аталған оқу орнының филиалын ашу туралы ұсынған болатын. Аймақ басшысы өңірде осы жобаны табысты іске асыруға жан-жақты қолдау көрсетілетінін, білім алушыларға жыл сайын облыс әкімдігі, сондай-ақ Ғылым және жоғары білім министрлігі гранттар беретінін айтқан-ды. Жақында айтылған сөздің іске асуының алғышарты жасалды.
Сеул Ұлттық Ғылым және технологиялар университеті (СеулТех) мен Қорқыт ата атындағы Қызылорда университеті арасындағы ынтымақтастық аясында «Халықаралық ынтымақтастық бойынша жетекші университеттік жоба» (LUPIC) жүзеге асырылуда. Жоба бойынша Қорқыт ата атындағы Қызылорда университетінде жасанды интеллект мектебі құрылып, жасанды интеллект (AI), киберқауіпсіздік (CS) және информатика (CS) мамандары даярланады.
Сыр өңіріне жұмыс сапарымен келген СеулТех университетінің делегациясымен облыс әкімінің бірінші орынбасары Серік Қожаниязов кездесіп, өзара әріптестік мәселелерін талқылады. Профессор және директор Часу Ким мен оның орынбасары Сунггон Ким бастаған LUPIC жобасының өкілдері 9 шілдеге дейін Қорқыт ата атындағы Қызылорда университетінде зертханаларды орналастырудың кеңістіктік аспектілерін және бизнес-инкубация орталығын (BIC) құруға қатысты мәселелерді зерттеп, талқылайды.
