Бастамашыл жобалараудан мектептерінде жүзеге асып келеді

Қызылорда облысының білім беру саласы бойынша оқушылардың білім сапасын жоғарылату және мұғалімдерді қолдау мақсатында бірқатар шаралар атқарылуда. Республикалық деңгейде жүргізілуі ұсынылған «Оқуға құштар мектеп», «Мектеп парламенті», «Дебаттық қозғалыс», «Мектеп театры» жобаларын облыс көлемінде жүзеге асырумен қатар, Қызылорда облысының білім басқармасы бірқатар облыстық бастамашыл жобаларды да абыройлы атқарып келеді.

Білім беру ұйымдарын түрлі бағыттар бойынша «Тірек білім беру ұйымдары» ретінде қалыптастырып, тәжірибелерін облыс көлемінде нысаналы тарату қолға алынған. Атап айтар болсақ, «Балалар кітапханасы» облыстық жобасы, «ІТ-балабақша» жобасы, «Бағдарламалау мектебі» жобасы, «Жасыл мектеп» жобасы, «Кәсіпкерлік мектебі» жобасы, «Мектеп парламенті» жобасы, «Мектеп обсерваториясы» жобасы, «Инновациялық мектептер» жобасы, «Ғылыми бағдар беру шеберханасы» жобасы, «Отбасылық тәрбие мектебі» жобасы, «ІТ-Математика» жобасы, «Геотехнология» жобасы, «Жасыл балабақша» жобасы, «Балабақша театры» жобасы және т.б. жобалар баланың бүгінгі қоғам талаптарына сай дамуына арналған.

2022-2023 оқу жылында облыстық жобаларды аудан мектептеріне енгізу, тәжірибесін тарату басталды. Мәселен, Сырдария ауданындағы №137 мектеп «Бағдарламалау мектебі» жобасын ендірді. Ерекшелігі сол, ауылдық орта мектеп жағдайында қолда бар мүмкіндіктерді пайдаланып, ақпараттық технологиялар бағытындағы қосымша үйірмелер ұйымдастырып, «ІТ-журналистика» бағытындағы компьютерлік бағдарламаларды меңгеруді бастады. Төменгі сыныптан бастап цифрлық платформалар көмегімен пәндерді қосымша оқыту, тиімділігін арттыру бағытында жұмыстар жүргізуді қолға алды. Сырдария аудандық білім бөлімі аудан мектептеріндегі компьютерлік техникаға түгендеу жүргізіп, аталған мектепке қосымша кұрылғыларды баланстан-балансқа беру тәртібімен жабдықтады.

Ал, Қармақшы ауданы, Байқоңыр қаласындағы №277 мектеп-лицей «Мектеп обсерваториясы» жобасын ендірді. Жоба бойынша білім ошағында Қызылорда қаласындағы ендірілген жоба аясындағы жұмыстарға қосымша, «Ракетамодельдеу» шеберханасы жұмыс жасайды. Оқушылар ракеталардың макет үлгілерін арнайы ұшыруға арналған ракеталар әзірлеуді үйренуде. Төменгі биіктікте ұшырылатын рекеталарды сынақтан өткізу, оларды ұшыру тәжірибелері ҚР Оқу-ағарту министрі Ғани Бейсембаевтың қатысуымен көпшілік назарына таныстырылды.

Бұдан басқа «Жасыл мектеп» жобасы Қызылорда қаласындағы Ә.Мүсілімов атындағы №101 мектептен бастау алып, бүгінде көптеген білім мекемелері осы жоба бойынша тиянақты жұмыстар атқарып келеді. Бұл жоба қазірде аудан мектептерінің де тәжірибесіне енді. Алдағы уақытта облыстық деңгейдегі тәжірибелерді аудан мектептеріне енгізу алдағы оқу жылында да білім бөлімдері тарапынан жалғасатын болады.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған