БАСҚАРМА БАСШЫСЫ ҚОС АУДАНҒА ЖҰМЫС САПАРЫМЕН БАРДЫ

Қызылорда облыстық білім басқармасының басшысы Асқарбек Есжанов Сырдария ауданында жұмыс сапарымен болып, бірқатар білім беру ұйымдарын аралады. Әуелі аудан орталғындағы колледжге бас сұқты. Сырдария аграрлы-техникалық колледжі 8 мамандық, 12 біліктілік бойынша ауыл шаруашылығы саласындағы мамандарды даярлайды. Қазіргі таңда колледжде 142 студент мемлекеттік тапсырыс негізінде білім алуда. Басқарма басшысы өндірістік шеберханалар, токарлық цех және пән кабинеттерін аралап, оқу орынның жағдайымен танысты.

Асқарбек Темірбекұлы мұнан соң О.Әбілпаттаев атындағы №210 орта мектебінде болды. Білім ордасындағы кітапхана, спорт зал, акт зал және пән кабинеттерін көріп, балалармен тілдесті. Ал, №137 орта мектепте болғанда өткен жылы жабдықталған, жоғары сапалы визуалды-интерактивті құрылғылармен сабақ өтілетін цифрландыру бағытындағы жаңа модефикациялы «STEM» биология кабинетін көрді.

Білім саласын бес саусақтай білетін басқарма басшысы мектептерді аралау барысында оқу-тәрбие сапасын арттыруды, кітапханада оқырмандар санын көбейтуді және нәтижеге жұмыс жасауды тапсырды.

Сапар барысында ауданда «Жайлы мектеп» ұлттық жобасы аясында бой көтеретін 300 орындық мектептің құрылыс алаңымен танысты. Заманауи білім ордасының құрылысы келер жылы басталмақ.

Басқарма басшысының жұмыс сапары мұнан соң Шиелі ауданында жалғасты. Аудан орталығындағы бірнеше мектепті аралап көріп, ұстаздардың ұсыныс-пікірлерін тыңдады. Аралау барысында Асқарбек Темірбекұлы Шиелі аудандық «Сыр ұланы» лагерінің жұмысымен және жаңадан салынып жатқан Жаңатұрмыс ауылындағы №207 орта мектебінің құрылысымен танысты. Білім ордасы жыл соңына дейін пайдалануға беріледі деп жоспарланған.

Шиеліде №48 мектеп-лицей және №252 мектеп-гимназиясы орын тапшылығына байланысты қосымша құрылыс қажет етіп тұр. Бүгінгі күні аудандық білім бөлімі тарапынан жоба сметалық құжаттары әзірленіп, сараптамадан өткізілген.

Асқарбек Темірбекұлы сондай-ақ кент орталығынан салынатын 200 орындық оқушылар үйі мен 50 орындық өнер мектебінің құрылыс алаңына да барды. Сапар қорытындысында тиісті тапсырмалар жүктеп, жүйелі жұмыс жасауға шақырды.

Қ.Әндешұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған