ҚЫЗЫЛОРДА УНИВЕРСИТЕТІНДЕ ЖАСАНДЫ ИНТЕЛЛЕКТ ЖӘНЕ ИНФОРМАТИКА ЖОҒАРЫ МЕКТЕБІ АШЫЛДЫ

Апта басында Қорқыт ата атындағы Қызылорда университетінің базасында Жасанды интеллект және информатика жоғары мектебінің ресми ашылу рәсімі өтті. Іс-шараға ҚР Ғылым және жоғары білім министрі Саясат Нұрбек, Қызылорда облысының әкімі Нұрлыбек Нәлібаев, LUPIC халықаралық ынтымақтастық бойынша жетекші университет жобасының өкілдері, профессор-оқытушылар құрамы және IT саласы бойынша жұмыс берушілер қатысты. Бұл бастама Мемлекет басшысы Қасым-Жомарт Кемелұлы Тоқаевтың еліміздегі үш жоғары оқу орны базасында жасанды интеллект саласындағы кадрлар даярлау және осы салада зерттеу жүргізетін орталықтар ашу жөніндегі тапсырмасы шеңберінде іске асырылды.

Алдымен келген қонақтар университеттің кәсіпкерлік орталығының жұмысымен танысты. Кәсіпкерлік орталық 2017 жылы ашылған. Бүгінде QazInnovations ұйымы, Astana Hub технопаркімен бірлесіп семинар, тренинг, IT жобалар байқауын өткізуде. Орталық басшысы Жанарыс Түбекбаев кәсіпкерлікті дамыту бағытында атқарылған жобалар және алдағы жоспарларды, сонымен бірге бизнес-инкубатордың резиденттері Елдос Тұрсынбай «Dmenu», Оралбек Абдуллаев «Zenhimia», Айбек Оразбақов «Techai», Раушан Тұрғанбай «Fingerprint recognition», Жұлдызай Мұнайтпасова «EcoDabyl», Азамат Ибрагимов «Janarym AI», Асылжан Абдуллаев «Оrda studio», Қази Сұлтан «Museum» жобаларын таныстырды. Мәселен, Janarym AI – зағип жандарға арналған жасанды интеллект қамтылған мобильді қосымша. Қосымшада волонтер, видеоқоңырау, ақылды камера, инклюзия академиясы, инклюзивті қоғамдастық сынды бірегей функция­лар қамтылған. Үлкен волонтерлік жүйені қалыптастыру, еріктілерді ынталандыру мақсатында бонустық жүйе де ойластырылған.

Енді жаңадан ашылып жатқан Жасанды интеллект және информатика жоғары мектебіне келетін болсақ, ол жасанды интеллект, киберқауіпсіздік және информатика саласында кадрлар даярлайтын болады. Студенттер Сеултехпен бірлескен бағдарламалар бойынша білім алады, бұл әлемдік IT технологияларға қолжетімділікті қамтамасыз етеді. Жоба аясында оқу орны Кореяның заманауи зертханалық құрылғыларымен жабдықталады, ал студенттер бірнеше тілді меңгеріп, орыс және қазақ тілдерінен бөлек, ағылшын, корей тілдерінде білім алады. Жиында ҚР Ғылым және жоғары білім министрі Саясат Нұрбек жобаның маңыздылығына тоқталды.

– Президент Қасым-Жомарт Тоқаев жасанды интеллект технологияларының дамуы ел болашағы үшін стратегиялық маңызды бағыт екенін атап өтті. Жасанды интеллект технологияларын қолданысқа енгізу ерекше назар аударуды қажет етеді. Сондықтан Ғылым және жоғары білім министрлігі осы бағыт бойынша білім беру бағдарламаларын іске асыруға жылдам кірісті. Қорқыт ата университетінде Сеултехтің жоғары жасанды интеллект мектебінің ашылуы IT технологиялар саласында адами капиталды қалыптастыруға, ғылыми зерттеу нәтижелері және өзара тәжірибе алмасуға, сондай-ақ Корея мен Қазақстан арасындағы жоғары білім беру саласындағы екіжақты ынтымақтастықты одан әрі ілгерілетуге серпін береді. Сондай-ақ, алдағы уақытта шетелдік университеттің филиалы мен қос дипломды бағдарлама ашу жоспарланып отырғанын хабарлағым келеді, соның нәтижесінде түлектер Сеултехтің және Қорқыт ата атындағы Қызылорда университетінің дипломын ала алады,- деді министр.

Cапар барысында министр Мемлекет басшысы Қ.Тоқаевтың тапсырмасын орындау мақсатында Қазақстанда соңғы екі жылда М.Қозыбаев атындағы СҚУ базасында Аризона университеті, Қ.Жұбанов атындағы Ақтөбе өңірлік университеті базасында Хериот-Уотт университеті (Шотландия), Есенов университетінің базасында Неміс жоғары оқу орындарының консорциумы және басқа да жетекші шетелдік жоғары оқу орындарының 8 филиалы ашылғанын атап өтті. Министрдің айтуынша, шетелдік университеттердің филиалдарын ашу Қазақстанда білім беру саласын дамытуға және халықаралық аренада жоғары білім саласы бойынша көшбасшы атануға маңызды қадам болмақ.

LUPIC жобасының Қазақстандағы орталығының директоры, Сеул Ұлттық Ғылым және технологиялар университетінің (СеулТех) кванттық жасанды интеллект қауіпсіздігі жаһандық орталығының директоры Джесу Ким жоба аясында Жоғары мектеп ашу ғана емес, Қорқыт ата университетінің базасында бизнес-инкубатор құру көзделіп отырғанын атап өтті. «Бизнес-инкубатор аясында қазақстандық студенттер өз таланттарын шыңдап, стартаптар әзірлеп, алған білімдерін бүкіл әлем бойынша жасанды интеллектті дамыту үшін пайдаланатынына сенімдімін», – деді Джесу Ким.

2023 жылдың қыркүйегінен бастап Қорқыт ата атындағы Қызылорда университетінде IT мамандыққа түскен және Сеултехтің бағдарламасы бойынша оқуға іріктелген 1-курс студенттері үшін тілдік даярлау жұмыстары басталған болатын. Қазір олар жалпы білім беретін пәндерді оқып, жеделдетілген тілдік курстардан өтуде. Болашақта студенттер мен профессор-оқытушылар құрамы академиялық ұтқырлық және бірлескен білім беру бағдарламалары бойынша Сеулде оқуға және ғылыми тағылымдамадан өтуге бара алады, ал Сеулден келген оқытушылар өз тәжірибесімен бөлісу үшін Қызылордаға шақырылады.

Сеул Ұлттық Ғылым және технологиялар университеті – Кореяда 1910 жылы негізі қаланған ұлттық университет. Оқу орнында 23 факультет, 15 мыңға жуық студент бар. СеулТех Жоғары мектебінің ашылуына Қызылордада өмір сүрген Кореяның ұлттық батыры, генерал Хон Бом До сүйегінің тарихи отанына қайтарылуы ықпал етті.

ҚР Ғылым және жоғары білім министрі Саясат Нұрбек Қызылорда облысына жұмыс сапары барысында Қорқыт ата атындағы Қызылорда университетінің жатақханаларын аралап, жұмысымен танысып, жастармен кездесті. Министр алдымен «Өркениет» жатақханасына барып, студенттердің ортасында болды. Студенттер үйінде университет жастарына 274 орын бөлінген, қазіргі уақытта мұнда жалпы саны 255 білім алушы орналасқан. Саясат Нұрбек шәкірттердің жағдайымен жете танысып, университет жастарының ұсыныс-пікірлерін тыңдады. Кездесу барысында республика бойынша студенттердің жатақханамен қамтылуы басты назарда екенін, өңірлерде бұл мәселе оң шешімін тапқанын атап өтті.

Мұнан кейін министр «ДилМаш» жатақханасындағы жастармен кездесті. Жатақхана 170 орынға лайықталған, бүгінде 162 білім алушы қоныстанған. Сондай-ақ, министр университет базасындағы «Сейхун» спорттық-сауықтыру кешенінің жұмысын да өз көзімен көрді. Мұнда білім алушылардың салауатты өмір салтын қалыптастыру мақсатында дене шынықтыру сабақтары, спорт кешенінде шағын футбол, волейбол, жүзу, үстел теннисінен спорт секциялары ұйымдастырылады. Сонымен қатар, жарыстар мен барлық деңгейдегі спартакиадалар өткізіліп тұрады.

Министр №5 студенттік жатақхананы да аралап, студенттердің тұрмысымен танысты. Оқу орнының №5 жатақхана ғимараты 400 студентке арналған. Қазіргі уақытта 386 білім алушы орналасқан. ЖОО өкілдері жатақханадағы жастардың білім алуына, бос уақытын тиімді өткізуіне барынша жағдай жасалғандығына тоқталды. Жатақханадағы бөлмелер 2 және 4 адамға арналған, қажетті жиһаздармен қамтылған. Ғимаратта семинар-тренинг өткізуге арналған кабинеттер, кітапхана және компьютерлік сыныптар, асхана, кір жуатын бөлме, теннис залы бар. Ал, аулада спорттық жаттығулар жасауға арналған алаң бар, сонымен бірге биыл жаңа футбол алаңы пайдалануға берілген. Негізі университет балансында 1230 орындық бес студенттік жатақхана бар. Алдағы уақытта 350 орынға арналған жатақхана құрылысы басталмақ.

Жоғары оқу орнының профессор-оқытушы құрамы және студенттермен кездесу барысында ҚР Ғылым және жоғары білім министрі­нің Алғыс хатымен дзюдодан халықаралық дәрежедегі спорт шебері, ҚР Ұлттық құрама командасының мүшесі, 2023 жылғы Азия ойындарының алтын жүлдегері Олжас Оразалыұлы, дзюдодан халықаралық дәрежедегі спорт шебері, ҚР Ұлттық құрама командасының мүшесі, 2023 жылғы Азия ойындарының қола жүлдегері Жұбаназар Абылайхан және бапкерлер марапатталды.

Б.Бағдатұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған