Жаздың жаймашуақ күндері басталса, балалардың да шаттанын сәті һәм қуанатын мезеті. Өйткені, жыл бойы оқуға ынта-шынтасымен кіріскен оқушылар жазғы демалысқа шығып, тыңғылықты тынығуға бел буады. Осы ретте «жазғы мектепке» барып білімін жетілдіріп, білігін шыңдайтындар табылса, енді бірі еліміздегі көрікті қалаларды аралап, сапарға жоспар құрады. Жаһанданудың жалына жармасып, заман көшінен кейін қалмаған әрбір жастың әрекетінде берекет болатыны белгілі. Бүгінде әрбір оқушының талпынысы жоғары, дамуға құштарлығын көріп көңіл тояды. Оның үстіне, бақтың біліммен баянды болатынын білген, еркіндіктің есігін емін-еркін ашу керектігін ескерген ата-ана балаға оңтайлы демалыс ұйымдастыруды көздейді. Расында үш ай демалыс өнегелікпен өлшемін тапса, жаз айын пайдалы өткізгенінің тұтас тұрпаты байқалмай ма?
Мектеп қабырғасында жүрген оқушыларға жазғы демалыс үшін лагерьге жолдама беріледі. Жолдамаға ие болғандар жолға дайындалып, жаңа ортаны жатсынбай қабылдауға үйренеді. Лагерь – жаңа таныстықтың мекені, мәнді мәдениеттің ошағы, бірнеше білім ордасының оқушылары бас қосатын орта. Әрі балалық пен шалалық байқалатын, қызықты сәттердің көп болатын кезі. Жаныңа жақын құрбы-дос тауып, емен-жарқын араласып, әзілдесіп-әңгіме айтып, шүйіркелесіп шер тарқатып, одан қалды қызықты ойындармен кеш батыру – лагерьдегі жазғы демалыстың жарқын кезеңдері. Түрлі тентектіктің, еркеліктің, ісмерліктің, шеберліктің көрініс табатын, жастықтың лебі есетін лагерьде көптеген қызықтың да, шырғалаң шыжықтың да орын алатыны сіз бен бізге мәлім. Қысқасы, мұнда тек ойын-күлкі қуалап, күнді босқа өткізу деген ұғым жоқ. Сауық-сайраннан гөрі сауаттылыққа да басымдық беріледі. Арнайы қосымша сабақтар өткізіліп, әр тақырыпты тереңдетіп оқытып, түрлі кештер де өткізіледі. Демек, бала жан-жақты дамуда жасқанбай, әр істе белсенділік танытуға кіріседі. Жазғы демалысты жайлы өткізу облыста да оңтайлы шешімін тапқан. «Балаларды лагерьге жіберу жалғасып жатыр. Сыртқы лагерьге – 913, ішкі лагерьге – 14700 бала жіберілетін болады. Өткен жылы пандемия салдарынан балалар аз барғаны белгілі. Ал, биылғы жылы демалысқа жіберілген балалар саны көп. Сондай-ақ, лагерь Қызылорда қаласы және Жаңақорған ауданында ұйымдастырылды» деді қалалық білім бөлімінің баспасөз хатшысы Ж.Қуанышбайұлы.
Иә, дүниені дүр сілкіндірген тәжді вирустың кезінде балалар онлайн оқуға көшіп, көпшілігі үйде демалған еді. Осы жылы қанатты кеңге жайып, еркін тыныстап тынығуға мүмкіндік мол. Осы ретте бірқатар атаумен жазғы тынығу лагерьлері ашылып, балаларды жақсы демалыспен қамту жайы қолға алынды. Ұйымдастырылған жазғы демалыс орындарының жайын көріп көңіл қуанды. Қайткенде де бәрі бала үшін жасалғандықтан, шегінен асатын шикілік болмайтындығына әу бастан сенім мол болған. Дегенмен, «бір құмалақ бір қарын майды шірітеді» демекші, Қызылорда қаласындағы «Сыр төресі» лагерінің сыртқы бейнесі сүйсіндірсе де, ішкі көрінісі қынжылтып тұрғаны әлеуметтік желіде жария етілді. Әлеуметтік желіде желдей тараған бейнежазбадан жаға ұстатқан жайтты байқауға болады. Өйткені, бала демалады деп жоспарланған лагерьде жөндеу жұмыстары енді басталған сыңайлы. Әйтеуір, құрылысы бітпеген үй ішінің келбетін көргендей болдық. Жабдық деген аты болмаса, қажетті заттар қатары жоқ. Қысқасы, аты бар да заты жоқ, тұрпаты бар да, ұсқыны жоқ орын. Осы орайда, ата-аналардың да қамығып, шошитын жөні бар. Бірақ көп кешіктірмей бұл мәселе өз шешімін тапқандай болды. «Бүгінгі күні «Сыр төресі» жеке лагерінің келісім-шартта көрсетілген талаптарды орындамауына байланысты екіжақты келісім-шартты бұзу жұмыстары жүргізіліп жатқандығын жеткіземіз. Сонымен қатар, аталмыш лагерьден барлық балалар қайтарылып, олар тиісінше жазғы тынығумен қамтамасыз етілетін болады» деп облыстық білім басқармасы әлеуметтік желіде жазба жариялады.
«Балалар жылы» деп бәйек боламыз-ау. Бірақ кейбір істің кері кеткені кім-кімді болмасын алаңдатады. Басты әрі маңызды мәселені назарға алған жауапты орын бәрін реттейді деген сенімдеміз.
Замира ДАСТАНҚЫЗЫ
