Мәдениет – ұлт дамуының басты рөлі. Мәдениет пен өнердің қатар жүруі екеуінің егіз ұғым екендігін көрсететіндей. Қазақ халқының мәдениеттілігінің жоғары екендігі ерте кезден дәлелденген. Қонағын құдайдай сыйлап, бар жақсысын алдына тосып күтуі – үлкен мәдениеттіліктің белгісі. Өнер атаулыдан ұлтымыз кенде қалған емес. Бабаларымыздан қалған дәстүр, өнердің жұрнағы бүгінгі ұрпақтан көрінеді. Ел ішінде, алды шетел асып, өнерімен елді сүйсіндіріп жүргені ақиқат. Бұл қазақ халқында өнердің әлі биікте екендігін аңғартады.
Төл мәдениетіміздің дамуына, өркендеуіне зор үлес қосып, жас ұрпақты отансүйгіштікке тәрбиелеп, тарихымызды насихаттап, салт-дәстүрімізді жаңғыртып, елді бірлікке шақыру жолында аянбай еңбек етіп жүрген мәдениет пен өнер саласы қызметкерлерінің жұмысы үлкен маңыздылыққа ие. Руханиятты дамытуға, адамгершілікті, қайырымдылық пен өзара түсіністікті өрістетуге жол ашып, үздік мәдени дәстүрлерді сақтауға, молайтуға өлшеусіз үлес қосып келе жатқан өнер иелерін мәдениет пен өнер қызметкерлері күні қарсаңында қала әкімі Асылбек Шаменов құттықтады.
— Ел Президенті Қасым-Жомарт Кемелұлы Тоқаев өз Жолдауында: «Әлеуметтік жаңғырудың жаңа кезеңіне қадам басудың бір тетігі — мәдениет қызметкерлерін қолдау» деген болатын. Расында, елдің рухани дамуы мен кемелденуі мәдениеттің қарқынды дамуымен ұштасып жатыр. Шаһардағы мәдениет және өнер қызметкерлерінің кәсіби шеберлігі мен ерекше таланты, қажыр-қайраты қаламыздың рухани кемелденуіне игі ықпалын тигізуде. Бұл ретте, мәдениет саласының дамуына үлес қосып, бүгінде арқа сүйер ақылшысы болып жүрген сала ардагерлеріне де құрметім мол,- деген қала әкімі Асылбек Өмірбекұлы облыс әкімінің Алғыс хаты және арнайы марапаттарды бірқатар үздіктерге тапсырды.
Қала өнерпаздарының концертімен мерекелік шара жалғасын тапты. Жиналған жұртшылық күмбірлеген күй, құлақтан кіріп бойды алар әуезді ән тыңдап, жарасымды әзіл-сықақ қойылымдарын тамашалады.
Тарихымыздың естелігі ретінде ата-бабаларымыздың жүріп өткен жолдарының дәлелі болып табылатын түрлі жәдігерлер қаламыздың тарихи мұражайында сақтаулы. Әр ұлттың өткені бар екендігі, кез-келген ұрпақ өткенінен шабыт алып, ата-бабалары салып кеткен жолдан адаспауы үшін тарихи жәдігерлерге зер салып қарары сөзсіз. Қызылорда қаласының тарихы мұражайында халықаралық музейлер күніне орай шара ұйымдастырылды. Қала әкімінің орынбасары Жанмұрат Сейілов рухани кешке арнайы барып, музей қызметкерлерін төл мерекесімен құттықтады. Шаһар басшысы Асылбек Шаменовтың алғыс хатымен бірқатар сала үздіктерін марапаттады.
Мемлекетіміздің өткенінен естеліктер сақтап, бүгінгі тарихын жалғастыруда музей ісінің орны ерекше. Бабаларымыз жүріп өткен, тарихымыздан сыр шертетін құндылықтарымызды, құнды жәдігерлерімізді, мәдени ескерткіштерді сақтап, асыл мұраны ұрпаққа аманат ету жолында музей қызметкерлерінің мәдениетіміздің дамуына қосып жатқан үлестері көп.
Мерекелік кеште спорттық және интеллектуалдық ойындар ойнатылып, қала өнерпаздары ән айтып, кешке көрік берді. Жиналған жұрт шара соңында «Музейге сый» акциясы аясында мұражайға тапсырылған жәдігерлерден дайындалған көрмені тамашалады.
Қаламызда мәдениет пен өнер саласында тоқтаусыз еңбек етіп жүрген қызметкерлердің жұмысы еленбей қалмақ емес. Қала әкімінің сала қызметкерлерін құттықтап, арнайы марапаттар табыстауы соны дәлелдегендей. Қызылорда өңірінен шыққан таланттар өткенімізде де, бүгінімізде де жетіп артылады. Таланттарды танып, даңғыл жолға келуіне көмектесіп, оларға мүмкіндік сыйлайтын мәдениет қызметкерлері. Мәдениет пен өнер қызметкерлеріне қандай марапат берілсе де жарасады. Жыл сайын қаламызда мәдениет пен өнер саласының үздіктеріне құрмет көрсету жалғасын таба бермек. Себебі олар ұлт рухын көтеріп, адал қызмет етіп жүрген жандар.
Қ.ӨТЕБАЙ
