Сырдың руханият өкілдеріне «Тұран» сыйлығы табысталды

«Өнерліге есік ашық» дегендей, кез-келген талантты адамның құрметке бөленіп, өмірден өзіндік орнын табары анық. Өнерді ұлықтап, әлем танитын тұлғаға айналған өнерпаздардың есімдері тарихтан белгілі. Қазақ халқының өнерлі адамды құрметтеп, есімін жоғары көтеретінін білеміз. «Әу демейтін қазақ жоқ» деп, ата-бабамыз айтып кеткендей, жаны әнге құштар, көңілі күймен жұбанатын да біздің дана халқымыз. Музыка өнерін бойына дарытып, әсем даусымен талайды тамсандырған таланттарымыз көп-ақ. Кезіндегі Парижде тұрып ән салған Әміре Қашаубаевтың өнері бүгінгі қоғамда дүниені даусымен дүр сілкіндірген Димаш Құдайбергеновтың әні­мен жалғасын тапқандай. Ұл­тымыздың бет-бейнесі болып, қазақ халқының өнерлі келетінін, қаршадайынан талантты бола­тынын өнерден өз орнын тапқан өнерпаздар дәлелдеп жүр.

Сыр өңірі тыңдармандары өнер десе ішкен асын жерге қойып, дарындыларды қолпаштап, қолдау көрсетуден қалыс қалған емес. Жаны қазақы, жүрегі нәзік жандарды өнердің сиқыры арбап, көкке қалықтатып алып кетердей күйде қалдыруы – өнердің күші. Сыр халқының жергілікті таланттарды қолдап, мәдениет саласында атқарып жатқан істері көп. Мәдениет және өнер қызметкерлері күніне арналған салтанатты іс-шараға облыс әкімі Нұрлыбек Нәлібаев қатысып, Сыр елінің мәдениет қызметкерлері мен сала ардагерлерін кәсіби мерекемен құттықтады.

— Ел Президенті Қасым-Жомарт Кемелұлы Тоқаев «Ұлт мәдениеті – халық өмірінің айнасы, оның болмысы. Сол себепті азаматтарымыздың рухы әрқашан биік болуы үшін мәдениетімізге, яғни, руханиятымызға баса мән бергеніміз жөн», – деген болатын. Бүгін «Сырдың елі – жырдың елі» атанған қасиетті мекеннің абыройын асырып, бақ-беделін сақтауға үлес қосушы мәдениет және өнер, әдебиет өкілдерінің сан жылдан бергі тілегі – облыс әкімінің мәдениет және әдебиет өкілдеріне арналған «Тұран» сыйлығын табыстайтын боламыз. Жүлде қоры 500 мың теңгені құрайтын облыс әкімінің сыйлығы әдебиет пен өнер өкілдерінің шығармашылығын шыңдауға септігін тигізетініне сенімдімін. Он жылдан астам уақыттан соң арасы үзіліп қалған дәстүрді қайта жалғадық. Талай дарын мен талант түлеген Сыр өңірінде мұндай сыйлық пен марапаттың болуы – заңдылық, – деді аймақ басшысы.

Марапат өз иелерін тапты. «Тұран» сыйлығын табыстау, ҚР Мәдениет және спорт министр­лігінің «Еңбек ардагері», «Мәде­ниет саласының үздігі» төсбелгісімен марапаттау рәсімі өтті. Қызылорда облысының «Құрмет» грамотасымен бір­қатар мәдениет саласының қызметкерлері, облыс әкімінің Алғыс хатымен марапатталды. Олардың арасында Сыр өнері мен мәдениетіне еңбегі сіңген жырау Жұмабек Аққұлов, аралдық сазгер Мұрат Сыдықов, жазушы Сайлаубай Жұбатыров, режиссер Оңталап Нұрмаханов бар. Облыс әкімі Нұрлыбек Машбекұлы мәдениет ардагері Жұмабек Аққұловтың иығына шапан жауып, құрмет көрсетті.

Сонымен бірге аймақтың мәдениет ұйымдарындағы 8 өнер ұжымына 40 домбыра табыс­талды. Әріптестеріне мерекелік кеште ақын, Қазақ­стан Жазушылар одағы облыстық филиалының төрағасы Қаршыға Есімсейтова, ақын Шаһизада Әбдікәрімов тілегін айтып, сөз сөйледі. Өнер иелерін қолдағаны үшін облыс әкіміне алғыс айтты. Жергілікті өнерпаздардың қаты­суымен іс-шара соңы концерттік бағдарламамен жалғасты.

Сыр халқының игілігі үшін атқарылып жатқан жұмыстардың легі көп. Жергілікті басшылықтың қолдауымен жыл сайын өңірімізді алға басуы үшін ауқымды шаруалар жасалуда. Көтерілген мәселелердің арасын суытпай шешімін тауып, тұрғындардың жағдайын көтеру өңір басшы­ларының күн тәртібінен түскен емес. Мәдениет және өнер сала­сы бойынша Сыр өңірінде жағымда жаңалықтар бар. 1000 орын­дық көпфункционалды «Өнер орталығы» Қызылорда қаласында жыл соңында ашылады деп күтілсе, тамыз айында «Анаға тағзым» орталығы іске қосылмақ. Өнер әлеміне жақын мүмкіндігі шектеулі өнерпаздардың шығар­ма­шылығын дамыту мақса­тында инклюзивті театр жобасы мақұлданды. Бұған дейін үйірме ретінде жұмыс жасап кел­ген «Жастар театрын» өз ал­дына кәсіби ұжым ретінде құру жұмыстарын жақын арада Қызылорда қаласының әкімдігі мен облыстық мәдениет және спорт басқармасы қабылдайды.

Қазақ халқында айтыс өнерінің де алар орны ерекше. Қос ақынның жұптасып сөз жарыстырып, оған мән қосып, қағытпа қалжыңмен бір-біріне қарсы сұрақ қоюы айтыс өнерінде көрініс табады. Елдің жайын, халықтың әлеуетін де бас­шыларға баяндап, шешімін таппай жүрген мәселелерді айту ақындардың жұмысы іспет­­тес. Сыр топырағынан шығып, жырдың әлеміне түскен талант­тарымыз көп. Қазіргі айтыс әле­мінде ұшқыр ойлары мен әзілдері жарасымды, республикаға таны­мал ақын Мұхтар Ниязов. Осы себепті де өңірімізде тұңғыш рет «Айтыс олимпиадасы» ат­ты облыс­тық жасөспірімдер ай­тысы үш дүркін «Алтын домбыра» иегері, жерлесіміз Мұхтар Ниязов­­тың ізбасарларын дайын­дау мақ­­сатында өткізіледі. Бұл өңірі­міздің атын республикаға танымал етіп, Сырдың намысын лайық­ты қорғаған ақынымызға көрсе­тілген құрметтің бастамасы. Сонымен қатар, 18 жылдан соң ап­талық бағдарламамен өнердің қарашаңырағы Н.Бекежанов атын­дағы қазақ академиялық музы­ка­лық драма театры Алматы қала­сына гастрольдік сапарға аттанады.

Қазіргі таңда жасөспірімдер болсын, үлкен кісілердің де көпшілігі телефонды жиі тұтынып, оның ішіндегі дүниелерге қатты әуестенген. Соның ішінде видео­хостингтардағы теле­сериалдарға сұраныс көп. Әлемдік, отандық сериалдардың жарыса түсірілуі көрермендердің сұранысының жоғары деңгейде екендігін көр­сетеді. Телесериалдар арқылы халыққа белгілі бір дүние түсін­діріп, санасына сіңіру оңай. Қазіргі қоғам талабына байланысты бірінші рет бюджет тапсырысымен 12 сериялы имидждік телесериал түсіру жобасы, Қызылорда облысының құрылғанына 85 жыл, Қызылорда қаласының 205 жылдық мерейтойына орай қолға алынды. Аймақтың жағымды бет-бейнесін жасаумен қатар, инвестициялық тартымдылығы мен туристік мүмкіндіктері қазіргі заманауи трендке айналған телесериал арқылы респуб­лика­лық, халықаралық деңгейде насихатталмақ.

— «Мәдениет майданы» деген сөз бар, егінші жауында, балықшы дауылда тынықса, мәдениет ешқашан да дамыл таппайтын сала. Халықтың жан байлығын еселеп, көңіліне қуаныш сыйлайтын мәдениет пен өнер өкілдері қандай құрметке де лайық.

Аймақ басшысының руханият саласына баса көңіл бөлуі бәріміздің абыройымызды көтеріп, ісімізге оң серпін бергенін айту парыз. 2023 жылға облыс бюджетін нақтылау барысында мәдениет және өнер саласы мамандарының ұсынымдарын ескере отырып, аймақтың мәдениет саласына арналған бюджеті қосымша 1,1 миллиард теңгемен толықты. Бұл – қаражат көлемі соңғы 3 жылдағы бюджеттен салаға бөлінген қаржыдан 2 есе артық.

Мәдениет өкілдері – халықтың тарихи мұрасын жаң­ғыртып, болашақ иелерін тәрбиелеп отырған ұстаз. Олар­дың әрбір күні қуаныш үстіндегі қарбалас, халық алдындағы қызметпен байланысты. Сон­дықтан мәде­ниет пен өнер иелері ел-жұртпен бірге тыныстап, бірге қуанып, бірге мұңаятын жандар. Еліміз аман болсын, мәдениетіміз мәйекті болсын! – деп, өз тілегін білдірді облыстық мәдениет және спорт басқармасының басшысы Мира Қазбекова.

Кәсіби мерекеде өңіріміздің мәдениет саласында атқарып жатқан жұмыстарының маңыз­дылығына байланысты мәдениет қызметкерлері лайықты мара­патталды. Өнер әлемінде бой көрсетіп, Сыр топырағынан бойына сіңірген талантын жұртқа таныту жергілікті өнер­паздарымыздың жұмысы. Сыр халқының қолдауына ие болған өнерпаздарымыздың әлемдік сахнада атой салары сөзсіз.

\

Қазақбай ӘНДЕШҰЛЫ