Жастар театры жаңа белеске аяқ басты

2016 жылы белгілі режиссер-сценарист, ҚР мәдениет қайраткері Оңталап Нұрмахановтың жетекшілігімен үйірме ретінде ашылып, кейінірек аймақ басшысының тікелей қолдауымен қанатын кеңге жайған қалалық Жастар театры бүгінде бірнеше қойылымдарды сахналап, биік белестерді бағындырды. Қызылорда қаласының жастарына арналған өз театры керектігін, театр саласында шығармашылықпен айналысатын дарындыларды қолдау қажеттігін Оңталап Дүйсенәлі үнемі айтып отыратын.

Оңталап Нұрмаханов – Жастар театрының іргетасын жалаң қолымен қалап, керегесін керіп, уығын шаншып, шаңырағын көтерген, қазақ мәдениеті пен өнері жолында өзін аямай, сарқа жұмсайтын жаны сірі, шығармашылығы бөлек, сегіз қырлы, бір сырлы, үлкен жүректі азамат. Жастарды өзі дайындап, қанаттандырған Жастар театрына қала әкімінің де, облыс басшысының да көзқарасы бөлек. Жақында Жастар театры туралы жағымды жаңалық шықты. Театр өз еңбектерінің арқасында тағы бір биікке қол жеткізді.

Облыстық сессияның кезекті отырысында театрдың өз алдына мекеме болып құрылып, штаттар беру жөніндегі жоба қолдау тапты. ҚР Мәдениет қайраткері, ақын, режиссер Оңталап Нұрмахановтың жетекшілігімен жетістікке толы жеті жылды өткерген, өзінің қалың көрерменін қалыптастырып үлгерген Жастар театрын жыл соңына дейін ұлғайту жөнінде шешім қабылданды. Енді көрермендер көзайымына айналған, талай спектакльдерге жан бітірген, талай додада жүлдеге ие болған Жастар театры өз алдына мекеме ретінде құрылып, арнайы штаттық бірліктері бөлініп, дамудың жаңа деңгейіне көтерілгелі отыр. Бұл Қызылорда мәдениеті үшін үлкен жетістік, зор мақтаныш.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған