Халықаралық жастар күніне орай Қызылорда қаласы әкімі Асылбек Шаменовтің қолдауымен жастар апталығы бекітіліп, 2023 жылдың 7-12 тамыз күндері аралығында қалалық қоғамдық даму бөлімінің жастар орталығы жастар арасында түрлі бағыттағы шаралар өткізді. БАҚ-та және әлеуметтік желілерде жастар күнін атап өтуге бағытталған шараларды ақпараттандыру жұмыстарынан бастаған қызылордалық жастар келесі күні «ECO Marathon», яғни қала тұрғындары мен жастарының арасында тазалықты дәріптеу мақсатында сенбілік акцияларын ұйымдастырды. Акция барысында «Барлық игілік балаларға» шарасы, яғни қала аумағында жөндеуді қажет ететін, балаларға арналған ойын алаңдарын қалыпқа келтіруде және қайырымдылық шарасында белсенділік танытты. “Тазалықшыларға құрмет” акциясы бойынша қала тазалығы үшін күні-түні қызмет жасап жүрген тазалықшыларға құрмет көрсету мақсатында жастар дәмді тәттілерін ұсынды.
Ал, «Мүмкіндіктер керуенінде» Титов қыстағы, Шанхай мөлтек ауданы секілді қаланың шет аймақтарындағы жастар мен тұрғындар үшін мемлекеттік бағдарламалар мен жобалар бойынша көшпелі кеңес берілді. Өз сұрақтарына жауап алған жастар ұйымдастырушыларға алғыстарын білдірді.
Апталықтың төртінші күні «Мүмкіндіктер алаңында» бас қосқан жастар «Aray City Mall» сауда үйі алдында бос жұмыс орындарының жәрмеңкесін өткізді. Жаңа жұмыс орнын іздеген жас мамандар жұмыс берушілер туралы, жаңа жұмыс орындары туралы мағлұматтар алды. Кешке шығармашыл жастар заманауи би байқауын қыздыру үшін «Qosyl Dance» байқауына жиналды. Жастық шақтың белгісіндей ортаға биге шыққан жастар өз өнерлерін көпшілікке көрсетті. Тартысты өткен байқаудың жеңімпаздары бағалы сыйлықтармен марапатталды.
Бесінші күн тас қалаушылар сайысына ұласты. «Самғау» жастар сыйлығы аясында қала жастары арасында қала көлеміндегі құрылыс нысандарының басында «Тас қалаушылар» сайысын өткізді. Еңбекке баулыған, мамандықтың қыр-сырына қаныққан сайыста жеңімпазға қаржылай сыйлық берілді.
Кешкілік Сыр жастары өткізген OPEN AIR кешінде “QOSYL” командасы мен Қызылорда жайдарман өнерпаздары және “Qosyl Dance” ұжымы өнер көрсетті.
Салауатты өмір салтын қалыптастыруда қала жастары үнемі белсенділік көрсетіп келеді. Апталықтың алтыншы күнін спортқа арнаған жастар QOSYL SPORT сайысын ұйымдастырды. Қала және қалаға қарасты кент және ауылдық округтердегі жастар арасында волейбол, үстел теннисі және ұлттық спорт түрлерінен, арқан тартыс, гір тасын көтеру, қол күрестен сайысқа түсті. Сайысқа белсене кіріскен жастар бір-бірінен асып түсті. Алайда сайыстың аты сайыс. Мықтылар жеңіс төрінен көрінді. Жеңімпаздар алғыс, диплом, кубок, медальдармен марапатталды.
12 тамызда халықаралық жастар күні мерекесіне орай қала жастарына арналған апталық шара мәресіне жетті. Осы күні қалалық қоғамдық даму бөлімі жастар орталығының ұйымдастыруымен қалалық паркте “Жастармен бірге” мерекелік жастар кеші өтті. Мерекелік шара аясында қала көлемінде мемлекеттік жастар саясатының жүзеге асырылуына үлес қосып жүрген бірқатар жастар қала әкімінің марапатына ие болды. Сонымен қатар, қаламыздың шығармашыл танымал өнерпаздары заманауи әндерін тарту етіп, жайдарманшылар өз өнерін көрсеткен мерекелік шара DJ-лердің сүйемелдеуімен би кешіне ұласты. Би кешіне Қызылорда қалалық мәдениет және спорт бөлімі қызметкерлері қолдау білдірді.
Қ.Әндешұлы
