Аймақ басшысы өңірлердегі өткір мәселелерді таразыға салды

Қоғамдық қауіпсіздікті қамтамасыз ету жүктелді

Сыр өңірінің түгелдей жасыл желекке оранып, көркеюі халықтың да, жергілікті басшылықтың да негізгі талаптары. Барлық аудандардың мәселелеріне қанық облыс әкімінің аудандарға сапары тұрғындардың көңіліне сенім ұялатқан. Аймақ басшысының кезекті сапары Қармақшы ауданында жалғасын тапты. «Ауыл – ел бесігі» жобасы аясында салынған дене шынықтыру-сауықтыру кешені ғимаратының ашылу салтанатына облыс әкімі Нұрлыбек Нәлібаев қатысып, Жосалы кентінің тұрғындарын жаңа нысанның ашылуымен құттықтады. Тұрғындардың бұқаралық спортпен айналысатын тәрбие ошағы осы спорт кешен екендігін тілге тиек етіп, тілектестік білдірді.

– Мемлекет басшысы Қасым- Жомарт Кемелұлы өз Жолдауында «Денсаулық кепілі – дене шынықтыру. Халықтың спортпен шұғылдануына барлық жағдай жасалуы қажет» деген болатын. Өңірде спорт инфрақұрылымын дамытуға ерекше мән беріліп келеді. Қазіргі таңда облыс бойынша 10 дене шынықтыру және спорт кешенінің құрылысы жүргізілуде. Оның бірін бүгін пайдалануға берудеміз.

Бұдан бөлек, биыл облыс орталығынан құны 6,9 млрд. теңгені құрайтын көпсалалы спорт кешенінің құрылысын бастау жоспарланған. Жанашыр жерлес­теріміздің, демеуші азаматтарымыздың арқасында аймағымызда көптеген жаңа нысанның құрылысы жүргізілуде, алдағы уақытта да ауқымды жоспарларымыз бар. Жергілікті «Қайсар» футбол клубы үшін заманауи жабық стадион салу жұмыстары демеуші есебінен атқарылуда. Былтыр «Балалар жылы» аясында демеушілер 1,6 млрд. теңгенің 80 спорт-ойын алаңын балдырғандарымызға тарту етті, – деді Нұрлыбек Машбекұлы.

Спорт кешенінің ішінде тренажер, фитнес, әмбебап залдар бар, жалпы аумағы 1500 шары метрден асады. 2021 жылдың қазан айынан бастап мердігер мекеме «Сапақ» өндірістік кооперативі құрылысты бастап, жуырда аяқтаған болатын.

Қармақшы ауданында биыл бірқатар әлеуметтік нысанның құрылысы басталмақ. Аймағымызда 10 мектептің құрылысы «Жайлы мектеп» ұлттық жобасы аясында басталса, оның екеуі Қармақшы ауданынан бой көтермек. 2023-2024 жылдары облыста 27 денсаулық сақтау нысаны «Ауылда денсаулық сақтауды жаңғырту» жобасы аясында жүзеге аспақ. Дүр Оңғар, Тұрмағанбет, Ақжар ауылдарында дәрігерлік амбулатория жоба негізінде салынады. ІІІ Интернационал, Дүр Оңғар ауылдарында спорт кешенінің құрылысы басталады.

Құны 580 млн. теңгені құрайтын ұзындығы 17,5 шақырымдық 21 көше «Ауыл – ел бесігі» бағдарламасы шеңберінде орташа жөндеуден өтсе, 24 көше 225,4 млн теңгеге жарықтандырылмақ. Самара-Шымкент жолынан Ақжар, Тұрмағанбет, Көмекбаев ауылдарына дейінгі жолдың 27 шақырымы облыстық бюджет есебінен орташа жөндеуден өтпек. Аталған жұмыстарға 503,4 млн. теңге қаралып отыр. Көмекбаев, Қармақшы, Алдашбай ахун ауылдарындағы су құрылғыны қайта жаңғыртуға 774,3 млн. теңге бөлінген. 654,5 млн. теңгеге Ақай ауылы мен Төретам кентіне газ тарту жұмыс­тары қолға алынуда.

Қармақшы ауданына жұмыс сапары кезінде облыс әкімі Нұрлыбек Нәлібаев ауданның әлеу­меттік-экономикалық дамуы жөнінде кеңейтілген мәжіліс өткізді. Қармақшы ауданына қарайтын ауылдық округтер, кенттердің жұмыстары талқыланып, алдағы даму жоспарлары қаралды.

– 2022 жылдың қорытындысымен аудандар мен Қызылорда қаласы бөлінісіндегі негізгі макроэкономикалық көрсеткіштер рейтингінде Қармақшы ауданы 2-орын алып, жоғары даму динамикасын көрсетті. Өнеркәсіп кәсіпорындары 4,4 млрд. теңгенің өнімін өндіріп, өндіріс көлемі 2021 жылмен салыстырғанда 4,6 пайызға артқан. Негізгі капиталға салынған инвестициялар көлемі 13,3 млрд. теңгені құрады. Бұл көрсеткіш бойынша алдыңғы жылмен салыстырғанда 12 пайыз өсім бар. Биылғы қаңтар-сәуір айларында 2 млрд. теңгенің өнімі өндіріліп, 2,6 млрд. теңге инвестиция салынған,– деді аймақ басшысы.

Халықтың өмір сүру сапасын арттыру, тұрмыс сапасын жақсарту үшін Нұрлыбек Машбекұлы аудан әкіміне бірқатар міндеттер жүктеді. «Ауыл – ел бесігі» және «Ауыл аманаты» жобасына ауданда елді мекендердің қатысу үлесі төмен. 1 кент пен 4 ауылдық округ биылғы жылы бағдарламаға жоба ұсынып, 1 млрд. 353 млн. теңгеге қолдау тауып отыр. «Ауыл аманаты» жобасына тек Дауылкөл мен Жаңажол округтері қатысқан. Аталған бағдарламалардың мүмкіндіктерін пайдалануды аймақ басшысы жауапты тұлғаларға тапсырып, елді мекендердегі өзекті мәселелер шешілу керектігін міндеттеді.

Былтырғы жылы кент және ауылдық округтерде 147 қылмыс тіркеліп, оның 63-і ашылған. Биыл қаңтар-сәуір айларында 31 қылмыс тіркеліп, 13-і ашылмаған. Осы тақырыпты сөз етіп, облыс әкімі ауданда қылмысты ашу көрсеткіші өте төмен екендігін алға тартты. Жағдайды жақсарту мақсатында іс-шараларды қолға алу керектігін ескертті. Аудандық полиция бөлімінің бастығы Бақытбек Жарқынбаевқа қоғамдық қауіпсіздікті қамтамасыз ету бағытындағы жұмысты күшейту жүктелді.

Жыл қорытындысына сәйкес төмен көрсеткіш көрсеткен әкімдерге кадрлық шешім қабылданатынын, жоғары нәтижеге жеткен әкімдерге ынталандыру шаралары қарастырылатынын аймақ басшысы жиын соңында айтып өтті.

Облыс әкімі жұмыс сапары кезінде аудан тұрғындарымен арнайы кездесу өткізіп, құқық қорғау органдары басшыларымен тұрғындардың мәселелерімен танысып, қабылдау өткізді. Алпыстан астам азамат қабылдауға келіп, баспана, білім салаларының, жұмысқа орналасудың мәселелері жайында өтініш-тілектерін жеткізді.

«Аймақ басшысының қабылдауында болып, ұзақ жылдар бойы өзім қызмет еткен білім саласындағы жаңалықтарды, өзімді қызықтыратын сұрақтардың жауабын білдім. «Жайлы мектеп» ұлттық жобасы бойынша жаңа білім ордалары салынатынына қуандым», – деді аудан тұрғыны, ардагер ұстаз Роза Қыпшақбаева.

«Облыс әкімінің жеке қабылдауында «Жосалы-Жалағаш» ішкі жолының жағдайы туралы айттым. Өткен жылы Сырдария өзенінде су деңгейі көтеріліп, жолды шайып кеткен болатын. Аймақ басшысы тиісті тапсырмалар беріп, жолды жөндеуге қаржы бөлінгенінен хабардар етті», – дейдi аудан тұрғыны Қуаныш Төреев.

Жауапты тұлғаларға облыс әкімі тұрғындарды алаңдатқан мәселелер бойынша тапсырма беріп, міндеттер жүктеді. Тұрғындардың өтініші жан-жақты қаралып, талқыланып, заң аясында шешім қабылданбақ. Құқық қор­ғау органдары басшыларының қа­был­дауына келген тұрғындар мә­се­лелерінің заңдық тұрғыда қалай шешілетіні жайлы ақпарат алды.

Ауыл әкімдері жұмыстарын күшейту тапсырылды

Облыс әкімі Нұрлыбек Нәлібаевтың жұмыс сапары Жалағаш ауданында жалғасты. Сапар кезінде ауданның теміржол көпірінің іргетасын қалау рәсіміне қатыс­ты. Теміржол өткелі жалағаштық тұрғындарды толғандырған мәселелердің бірі еді. Аудан тұрғындарын аймақ басшысы жаңа құрылыс­тың басталуымен құттықтады.

– Мемлекет басшысы Қасым- Жомарт Кемелұлы: «Аса маңыз­ды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» – деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Кент орталығынан Дәуімбай елді мекеніне теміржол арқылы өтетін жаяу жүргіншілерге бұл мәселе қиындық туғызып келген еді. Жалағаш кентін екіге бөліп жатқан теміржолдың бергі бетінде 9 мың, арғы жағында 6 мыңдай халық қоныстанған. Осы тұстан пойыз өткенде жаяу жүргіншілер үшін өте қауіпті. Халықтың өткел салу туралы сұранысы назарға алынды. Кент тұрғындарының екі жаққа қатынауындағы қиын түйін осылайша шешілмек, – деді Нұрлыбек Машбекұлы.

Көпірдің ұзындығы 55 метрді құрайды, құны 328,7 млн. теңге. Мүмкіндігі шектеулі жандарға арналған шахталық лифт аспалы көпірге орнатылмақ. Мердігер «Гүлнұр МК» жауапкершілігі шектеулі серіктестігі құрылысты 7 ай ішінде аяқтауды жоспарлауда.

Аймақ басшысы Жалағаш кенті М.Шәменов көшесіндегі күрделі жөндеу жұмыстарымен танысты. Жобаның құны 359,1 млн. теңге, мердігер мекеме – «Қызылорда жолдары» ЖШС. Қазіргі уақытта көшенің ескі асфальттары қырылып, тас төселген, жаяу жүргіншілер бордюрлары да салынуда.

Жалағаш ауданының Мырзабай ахун, Есет батыр ауылдарында биылғы жылы дәрігерлік амбулаторияның құрылысы басталады. 2023 жылға 2,2 млрд. теңге аудандағы автомобиль жолдарының сапасын жақсарту үшін бөлінді. Жалпы құны 559 млн. теңгені құрайтын, ұзындығы 9,5 шақырым болатын 6 көше «Ауыл – ел бесігі» бағдарламасы шеңберінде жөнделуде. 40 млн. теңге қаржы Ақсу, М.Шәменов ауылдарына газ тарту жұмыстарына бөлініп, мемлекеттік сатып салу жұмыстары жүргізілуде. Жобаның жалпы құны 1,2 млрд. теңге.

Жалағаш ауданына жұмыс сапары кезінде облыс әкімі Нұрлыбек Нәлібаев ауданның жұмыстарын талқылап, кеңейтілген мәжіліске қатысты. Барлық саланың даму жолындағы мәселелер қаралып, міндеттер талқыланды.

– Мемлекет басшысы «Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасы туралы» Жарлыққа қол қойды. Ауылдық аумақтарды дамыту және тиімділігін арттыру, сондай-ақ ауылдық жерлерде өмір сүру сапасын жақсарту мақсатында қабылданған бұл шешімді жүзеге асыруымыз керек. Биылғы 19 сәуірде Үкіметтің кеңейтілген мәжілісінде ел Президенті барлық деңгейдегі әкімдердің жұмысына жыл сайын бағалау жүйесін енгізу керектігін айтып, оның ішінде ауыл әкімдерінің қызметіне ерекше тоқталды. Күн сайын тұрғындардың мұң-мұқтажын тыңдап, олардың мәселелерін шешу, әр отбасының жағдайымен жіті таныс болу – ауылдық округ әкімдерінің тікелей міндеті, – деді аймақ басшысы.

Аудан әкіміне әлеуметтік- экономикалық жағдайды жақсарту мақсатында тапсырмалар берілді. Халықты кәсіппен айналысуына жағдай жасау керектігін де ескертті.

«Ауыл – ел бесігі», «Ауыл аманаты» ауылдың әл-ауқатын арттыруға негізделген жобаларға қатысу ынтасы төмен. 1 кент пен 3 ауылдық округ қана биылғы жылы жоба ұсынған және 584,2 млн. теңгеге қолдау тапқан. 5 елді мекенге бағдарлама бастау алғалы мүлде қаржы қаралмаған. Ауыл әкімдері жұмысты дұрыс ұйымдастырмағанын облыс әкімі сынап, алдағы уақытта осы мәселелер бойынша жұмыс жасауды міндеттеді. «Ауыл аманаты» жобасына Жалағаш ауданынан Мырзабай ахун, Аққұм, Таң ауылдық округтері ғана қатысқан. Облыс әкімі ауыл әкімдеріне бағдарлама бойынша жұмыстар атқаруды тапсырды.

Аудан әкімі Асқарбек Темірбекұлына аймақ басшысы халықтың түйткілді мәселелеріне дер кезінде мән беріп, кәсіпке ынталы азаматтарды қолдау керектігін ескертті. Жазғы демалыс кезінде балалардың қауіпсіздігін қатаң сақтауды да айтып өтті. Ауданға қарас­ты елді мекендерде былтыр­ғы жылы 72 қылмыс тіркеліп, оның 17-сі, биылғы қаңтар-сәуір айларында 37 қылмыстың 10-ы ашылмаған. Аудандық полиция қызметкерлеріәне қылмыс ашу көрсеткіші төмен екендігін алға тартып, ескерту жасап, облыс әкімі тиісті шараларды атқару керектігін тапсырды.

Жалағаш ауданына жұмыс сапары кезінде облыс әкімі Нұрлыбек Нәлібаев құқық қорғау органдары басшыларымен бірге аудан тұрғындарымен кездесті. Алпыстан астам тұрғын аймақ басшысының қабылдауына келіп, өтініш-тілектерін айтты. Денсаулық саласындағы жұмыс­тар, тұрғын үй мәселелері, жұмысқа орналасудың кедергілері жайлы тұрғындар айтып өтті. Аймақ басшысы қабылдауға келген кісілердің мәселелерімен толық танысып, тиісті тұлғаларға тапсырмалар жүктеді. Мамандар тұрғындардың мәселелерін зерттеп, заң жүзінде шешімін табатынынан хабардар етті.

Қабылдауға келген бір топ аналардың тұрғын үй мәселесі бойынша өтініштері шешімін тапты. Жаңа кәсіп ашуға көмектескені үшін аймақ басшысына алғыстарын айтты. Сонымен қатар, аудан тұрғыны Еркінбай Ақшабаев әлеуметтік осал топ санаты бойынша үй кезегінде тұрғанын жеткізді. Баспана алуға кезектілікті сақтай отырып көмектесуге аймақ басшысы уәде етті.

Жобаларды тиімді пайдалану ескертілді

Сырдария ауданының әлеу­меттік-экономикалық дамуы жөнінде облыс әкімі ауданға сапары барысында кеңейтілген мәжіліс өткізді. Жұмыс нәтижелері, ділгір мәселелер жиында талқыланды. Ауданға қарасты ауылдық округ әкімдері, облыс­тық басқармалар және аудандық бөлім басшылары қатысты. Кәсіпкерлікті дамыту мүмкіндігі Сырдария ауданының ауылдық округтерінде жоғары. Себебі, облыс орталығына жақын орналасқандықтан кәсіп саласы қарқынды жүзеге асуда. 2023 жылы Сырдария ауданы жылдың 3 айының қортындысы бойынша 2-орын алса да, рейтингтегі 10 көрсеткіштің 4-інде орташа және төмен даму динамикасы қалыптасқандығын аймақ басшысы айтып өтті.

– Қазіргі кезде ауыл тұрғындарының өмір сүру сапасы мен әл-ауқатын жақсарту, ауылдарды тұрақты дамыту бағытында мемлекеттік бағдарламалар іске асырылуда. Соның бірі – «Ауыл – ел бесігі» жобасы. Былтырдың өзінде осы жоба арқылы аймақтағы ауылдарға 7,8 млрд. теңге бағытталып, тиісті жұмыс­тар жүргізілді. Сырдария ауданына бағдарлама шеңберінде 11 жобаны жүзеге асыруға 801,2 млн. теңге бөлінді. Биыл 1 кент 4 ауылдық округтің 1 млрд. 858 млн. теңгені құрайтын жобалары қолдау тапты. Дегенмен, осы бағдарлама бастау алғалы ауданға қарасты 6 елді мекенге мүлде қаржы қаралмаған. Айдарлы, Жетікөл, Бесарық, Іңкәрдария, Сәкен Сейфуллин және Асқар Тоқмағамбетов елді мекендері спутникті және тіректі ауылдар тізімінде бола тұра, ұсынылған мүмкіндіктерді тиімді пайдаланбаған, – деді аймақ басшысы.

Аманкелді, Айдарлы, Шаған және Іңкәрдария ауылдық округтері ғана «Ауыл аманаты» жобасына қатысқан. Скринингтен өткен ауылдардан басқа да елді мекендер бойынша кемінде 2 млрд. теңгеге жоба жасап ұсынуды аймақ басшысы аудан әкімдерінен талап етті. Алдағы уақытта барлық тетіктерді қосып, қаржы тарту жұмыстарын жасау керектігін ескертті.

Елдің мұң-мұқтажына дер кезін­де көңіл аударып, шешу ке­рек­тігін, демалыс кезінде бала­лар қауіпсіздігін сақтауды облыс әкімі Нұрлыбек Нәлібаев ау­дан әкімі Берік Әбдіғаппарұлына тапсырды.

Биылғы жылдың қаңтар-сәуір айларында аудан көлемінде 37 қылмыс тіркеліп, 8-і ашылмаған. Осы қылмыстарды ашу жұмыстарын дұрыс атқармаған полиция басшыларына облыс әкімі ескерту жасады.

Облыс әкімі жиын соңында аудан әкіміне барлық кемшіліктерді жойып, жаңаша бағытта жұмыс жасауды тапсырды.

Жиыннан соң, облыс әкімі аудан тұрғындарын қабылдады. Алпыстан астам азаматтың көтерген мәселелерін жіті тыңдап, тиісті басшыларға мәселелерді шешуді тапсыр­ды. Жұртшылық пікірінен халықпен тікелей қарым-қатынас­та болу тиімді екенін түсінуге болады.

«Мен Асқар Тоқмағамбетов ауылынан келдім. Облыс әкімі мен құқық қорғау органдарының басшылары келіп, мәселелерімізді реттегені қуантады. Қазіргі таңда әрбір ауылда игі істер мен жағымды жаңалықтар болуда, соған орай облыс басшылығына алғыс айту үшін келдім», – дейді аудан тұрғыны Әубәкір Махамбетов.

«Жерге қатысты мәселеміз облыс басшысының араласуымен оң шешім тапты. Биыл егін егудеміз. Мұндай басқосулар бізге өте қажет екен. Ойыңды тікелей айтуға, күрмеулі мәселенің шешілуіне ықпал етеді» – дейді аудан тұрғыны Ғалия Жәрекеева.

Құқық қорғау органдары да қабылдауға келген тұрғындарға заң тұрғысында көмек көрсетіп, түсіндірме жұмыстарын жасады.

Облыс әкімінің аудандарға сапары оң шешімін беруде. Халықпен тығыз байланыс орнатып, тұрғындардың өтінішін өздерінен естігеннен кейін, мәселелердің шешілу жылдамдығы артады деп сенеміз. Қазіргі таңда облысымыздағы барлық аудандардың негізгі проблемалары шешіліп, өңір басшысы халықтың ризашылығына бөленуде. Алдағы уақытта шешімін табады деген күн тәртібіне қойылған мәселелердің де, уақыт өте жүз пайызға орындалып, тұрғындардың тілегі орындалады. Жыл сайын Сыр аумағының тазалығы, әсемдігі үшін аймақ басшылығы бар күшін салуда. Республикалық, облыстық бюджеттен бөлінген қаржылардың есебінен бірқатар нысандардың жұмыстары аяқталып, өзге нысандардың құрылысы жалғасын табуда. Аудандардың, ауданға қарасты елді мекендердің мәселелері ұмыт қалмай, аймақ басшысының тікелей араласуымен жұмыстар атқарылуда. Халық пен жергілікті басшылықтың бірігіп атқарған жұмыстары нәтижесінде Қызылорда облысының барлық мәселелері уақыт өте түгелдей шешілетініне тұрғындардың сенімі мол.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған