Қэттк АҚ мекемесі нені жасырып жүр?

Оқырманға жақсы таныс, өткен жылдың желтоқсан айы­ның аяғында әлеуметтік желіде көптің көкейінде жүрген бір мәселені көтерген болатынмын. Қызылорда қаласында электр бағаналарын ауыстыруды бастаған тиісті мекеме алты ай уақыттан бері мардымды жұмыс жасамаған-ды. «Оның үш айдан астамында жұмыс жасалмады. Бұл не: жауапсыздық па, немқұрайлылық па, салақтық па, түсінбедік. Электр жарығын өшіруде де тұрғындарға ескертілмеді. Қазу бір жұмыс, бөрене көму екінші жұмыс болды. Шашып кеткен арттарыңды жинап кетуді де білмейсіңдер. Не болды енді, қазір әр жерде қосарланған бөренелер. Оның біреуі дімкәс, құлағалы тұр. Сендерге біреу өлу керек пе әлде өрт шығу керек пе? Қашан жаңа Қазақстан боламыз?!» деп, ашынғаннан ащы дауыс шыққан-ды.

Содан жауап хат та жазылды. «Қазіргі таңда инвестициялық жоба аясында ескі бағаналарды жаңарту жұмыстары жүргізілуде. Аталған жоба 2023 жылдың ақпан айында аяқталады. Ал, ескі бағаналар жаңа бағаналар іске қосылған соң алынып тасталатын болады!» Қэттк АҚ осылай нақты жауабын берді.

Уақыт бір орнында тұра ма? Зымырап ақпан айы да келді. Өткен жылдың 26 желтоқсанында желіде қозғалған мәселеге жауап қатқан көшедегі біреулер емес, жауапты мекеме уәдесін беріп еді. «Қыс мезгілі ғой, түсіністік танытайық» деп, сабырмен күттік. Наурыз өте шықты. Тағы күтейік дедік. Сәуір өтті. Шыдамның да шегі бар, мамырдың аяғына келдік. Содан тағы да желіде ескерту жасадық.

«Бүгін 23 мамыр. Уәде қайда, жұмыс қайда? Ескі бөренелер алынған жоқ, көшенің сәнін бұзып тұр. Қэттк АҚ мекемесінің немқұрайлығы, жауапсыздығы қашанға дейін созылмақ? Неге өтірік айтады, неге жалған уәде береді? Көзбояушылық жасауды, халықты алдауды қашан қоясыңдар? Бір сәт көшеге шығып, жан-жақтарыңа қарасаңдаршы! Құрысып қалған мойындарыңды көтеріп, айналаға зер салсаңдаршы! Көшеде бір-біріне жабысқан «махаббат бөренелер» тұр. Ертеңгі күні ұрпақтарың ұялмайтындай, тарих тас атпайтындай еңбек етсеңдерші» деп, намысын қажадық.

Айтпақшы, «бөренеден үйге тартылғанда ескі сым жаңа сыммен ауыстырылады» деп тұрғындардан сүйінші сұраған мекеме қызметкерлері тұрғындар үйлерінде жоқ кезде ескі сымды жалғап, тайып тұрды. Жаңа сымдарды қайда пайдаланылғаны өздеріне аян.

Сол күні облыс әкімінің орынбасары Серік Қожаниязов қаладағы электрмен қамту нысандарын аралап, жұмыстарымен танысты. «Электр желілерінің тозу деңгейі 70 пайыз­ға жетті» деген ақпарат таратылды. Бірақ, ескі электр бағаналары туралы еш нәрсе айтылмады.

Бұл жазбаны оқыған Қэттк АҚ мекемесі ойлана келе бір күннен кейін жауап қатты. «2022 жылғы инвестициялық монтаждау жұмыстары толығымен аяқталды. Қазіргі таңда демонтаждау жұмыс­тары кезең кезеңімен жүргізілуде. Аталған көшедегі демонтаждау жұмыстары тамыз айының соңғы күндеріне дейін жүргізілетінін хабарлаймыз». Мәссаған! «Шілде айы деп айтсақ, орындалмай қалар, одан да әрі жылжытайық» деп, тамыз айы деп айта салғандай көрінді бізге. Не болса да, бірдеңе жасырып жүр…

Амал жоқ, Майқы биге жүгінеміз:

Естіге айтқан тура сөз,

Шыңға тіккен тумен тең.

Езге айтқан тура сөз,

Құмға сіңген сумен тең.

Н.КӨБЕГЕНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған